عوام 2020

من لفوق ل لتحت، من ليمن ل ليسر: الجايحة د كوڤيد 19 نتاشرات معا لبدية د عوام 2020 ف لعالم كامل، و كانت حالة ديال الطوارئ تال 2023؛ الرئيس د ؤكرانيا ڤولوديمير زيلينسكي ف مدينة خيرصون بعدما بدا الجتياح الروسي د ؤكرانيا، لي كان طرف من لحرب الروسو-ؤكرانية؛ الطيليسكوپ دجيمس ويب لي تصيفط ف 2021 و خدا تصاور د لكون لي ماعمّر شي طيليسكوپ قبل منو ماخداها، كيتّعتابر من أهم التطورات ف مجال لفضاء ف هاد لعقد ل حد الساعة؛ تصويرة صايبها لپروڭرام ديال الدكا لإصطناعي دال-ي، لي جا معا لموجة ديال تطور سريع ديال الدكا لإصطناعي، سيرتو ف لمجال د التوليد د التيكست و التصاور؛ تشارلز التالت و مراتو كاميلا ولّاو ماليك و ماليكة د بريطانيا، بعدما ماتت لماليكة إليزابيط التانية؛ إيض ينّاير، ؤلا راس لعام لأمازيغي ولّا عطلة رسمية ف لمغريب ب قرار ملكي من 2023

عوام 2020 ؤلا عقد 2020 ؤلا لعشرينات د لقرن واحد و عشرين هوّ لعقد ديال الزمان لي عايشين فيه دابا، بدا ف 1 يناير 2020 و غادي يسالي ف 31 دجنبر 2029. هوّ لعقد التالت ديال لقرن 21.

لعقد بدا ب الجايحة د كوڤيد 19 لي ضارت لعالم كامل، بعد خروج التقرير اللولاني على لڤيروس د كورونا ف 31 دجنبر 2019، وخا أول ضهور ليه ف الشينوا كان علاين شهر قبل.^[1] هاد الجايحة تسببات ف أزمة قتيصادية.

مجموعة د لمطايفات لعسكارية، بحال لحرب ف سوريا، لحرب د ميانمار، و لحرب الروسو-ؤكرانية بقاو مستامرين، وخا هاد اللخرة طرا فيها تصعيد كبير ف فبراير 2022 ملي روسيا جتاحت ؤكرانيا. ف شمال إفريقيا كانو مناوشات محدودة معا جماعات إسلامية بحال لقاعدة ف لمغرب لإسلامي. و ف لمكسيك باقة لحوكومة ف حرب معا لكارطيلات ديال لادروڭ.

التبدال د لمناخ لي عطا طقس غادي و كيخياب عام على عام، خلا بزاف د لقيّاد ف لعالم يطالبو ب "سياسات حاسمة" ضدو، باش يحدّو من لكوارت لبيئية لي غايجيو بسبابو.^[2]^[3] ف فبراير 2023، طرا واحد من أميت الزلازل د لقرن 21 ف سوريا و تركيا، لي قتل كتر من 57000 واحد.

الطيكنولوجيا بقات كاتطور بشكل سريع، ب نتيشار الجتيماع على لبعد ب صوفتويرات بحال زوم، التعلام ؤنلاين، و السرابس ديال توصال السلاعي ل الدار، باش يعاونو بنادم ف لفترة ديال لحجر الصحي بسباب كوڤيد 19. ف نفس لوقت بانت و نتاشرات الطيكنولوجيا ديال الريزو 5 جي، الدكا لإصطناعي زاد تطور بشكل كبير و ولّا مستعمل من عند لملاين د الناس ف لعالم، و الطيكنولوجيا د لفضاء ديال شركات پريڤي بحال سپيس إكس وصلات مستويات جديدة، ف نفس لوقت لي تلونصا الطيليسكوپ دجيمس ويب، أقوى طيليسكوپ صنعو بنادم ل حد دابا.

ف 15 نونبر 2022، التعداد د بنادم ف لعالم وصل ل 8 د لمليار، و ف 2023، لهند فاتت الشينوا ب عتيبارها لبلاد لي عندها أكبر عدد د السكان.^[4]^[5]

شوف تا

ليستة د لعقود، لقرون، و لألفيات

كرونولوجيا

مقالات د لعقد د 2020:

عيون لكلام

^ "Chinese officials investigate cause of pneumonia outbreak in Wuhan". Reuters (ب نڭليزية). 2019-12-31. مأرشيڤي من لأصل ف 17 شتنبر 2023.
^ "COP26: First day ends with Queen's message of statesmanship". Financial Times. 1 نونبر 2021. مأرشيڤي من لأصل ف 10 دجنبر 2022.
^ "Cop26: Biden urges unity in 'decisive decade' for planet". The Guardian. 1 نونبر 2021. مأرشيڤي من لأصل ف 4 أبريل 2023.
^ World population reach 8 billion United Nations 15 November 2022
^ "UN DESA Policy Brief No. 153: India overtakes China as the world's most populous country - Department of Economic and Social Affairs". www.un.org.

هادي زريعة ديال مقالة خاصها تّوسع. تقدر تشارك ف لكتبة ديالها.

[1] "Chinese officials investigate cause of pneumonia outbreak in Wuhan". Reuters (ب نڭليزية). 2019-12-31. مأرشيڤي من لأصل ف 17 شتنبر 2023.

[:5-2] "COP26: First day ends with Queen's message of statesmanship". Financial Times. 1 نونبر 2021. مأرشيڤي من لأصل ف 10 دجنبر 2022.

[:6-3] "Cop26: Biden urges unity in 'decisive decade' for planet". The Guardian. 1 نونبر 2021. مأرشيڤي من لأصل ف 4 أبريل 2023.

[4] World population reach 8 billion United Nations 15 November 2022

[5] "UN DESA Policy Brief No. 153: India overtakes China as the world's most populous country - Department of Economic and Social Affairs". www.un.org.

[1]

[2]

[3]

[4]

[5]