Yukon

Yukon
(Vlag van Yukon) (Landswapen van Yukon)
Leuse :
Ander provinsies en gebiede van Kanada
Land	Kanada
Hoofstad	Whitehorse 60°43′00″N 135°03′00″W
Grootste stad	Whitehorse
Goewerneur-generaal	Angélique Bernard
Eerste Minister	Sandy Silver (Liberale)
Oppervlakte	482 443 km²
- Land	474 391 vk km
- Water	8 052 vk km (1,7%)
Bevolking (2010)
- Totaal	34 246 inw.
- Digtheid	0,065 inw./vk km
Toelating tot die Kanadese Federasie
- Datum	13 Junie 1898
Verteenwoordiging in die Parlement
- Parlement	1
- Senaat	1
Posafkorting	YT
Voorsetsel by poskode	Y
Tydsone	UTC -8
Internet-domein	.yk.ca

Yukon is een van Kanada se grootste en ylbevolkste provinsies. Die hoofstad en grootste stad van die gebied is Whitehorse. In 2010 het Yukon 'n bevolking van 34 246 mense gehad. Die gebied het 'n oppervlakte van 482 443 km² en is vernoem ná die Yukonrivier.

Geskiedenis

Die eerste westerse setlaars het omstreeks in 1750 in die gebied aangekom. Hulle het hoofsaaklik gejag vir die pelse van diere en het in en uit die gebied getrek. In 1848 stig Robert Campbell Fort Selkirk aan die mond van die Pellyrivier namens die Hudson's Bay Company. Yukon het in 1896 'n gewilde bestemming geword toe goud in Bonanza Creek naby Dawson City ontdek is. Dit was die begin van die Klondike Goudstormloop. Goudmyners is in bootvragte vanaf Kanada en die Verenigde State aangebring.

Die White-pas en Yukonroete is ook gedurende hierdie tydperk gebou. In 1898 het die Kanadese regering die Yukon-gebiedswet goedgekeur wat Yukon 'n onafhanklike subgebied gemaak het; voorheen was dit deel van die Noordwestelike Gebiede. Van 1898 tot 1953 was Dawson City die hoofstad van die gebied. Daarna is hierdie funksie aan Whitehorse oorgedra.

Geografie en klimaat

Die gebied het 'n totale oppervlakte van 482 443 km², ongeveer dieselfde grootte as Spanje. Dit lê noord van die 60ste breedtegraad tussen Alaska en die Noordwestelike Gebiede. In die noorde word Yukon vir 430 km begrens deur die Beaufortsee, in die weste deur Alaska met 'n lengtegraad van 141° wes as die staatsgrens, in die suide British Columbia en in die ooste die Noordwestelike Gebied (NWT). Die grens met die NWT loop grotendeels langs die kontinentale kloof. Aan die ander kant is die Mackenzie-kom wat in die Beaufortsee vloei.

Die hoogste punt van die gebied is Mount Logan op 5 959 m bo seespieël. Dit is ook die hoogste berg in Kanada en deel van die Kluane Nasionale Park.

Die Yukonrivier is die belangrikste rivier in Yukon en Alaska. Die rivier is 3 185 kilometer lank en vloei met 'n wye delta in die Beringsee. Ná die Mackenzierivier is dit Kanada se grootste rivier.

Meer as die helfte van die gebied se landoppervlakte is met naaldwoude bedek. Die klimaat toon baie uiterstes. In die somer kan dit warmer as 30 °C word, terwyl die temperatuur in die winter tot minder as −60 °C kan daal.

Demografie

Die Yukon Hotel in Dawson City.

Volgens sensusopnames het die gebied 35 862 inwoners in 2012 gehad waarvan 23 272 in 2005 in die hoofstad Whitehorse gewoon het.

Gedurende die goudstormloop van 1896 het Dawson City se bevolking tot 40 000 gestyg. Toe daar nie meer goud te vinde was nie, het die inwonertal vinnig gedaal. Tans woon daar ongeveer 2 000 mense in Dawson City.

Ekonomie

Landbou

Slegs 'n baie klein deel van die grond word vir die landbou gebruik. Die landbouarea is ongeveer 12 500 hektaar, waarvan ongeveer die helfte vir akkerbou of tuinbou gebruik word. Die meeste landbougebiede is naby die bevolkingsentrums en soveel as 70% van die plase is binne 'n radius van 100 km vanaf Whitehorse. Meer as die helfte, ongeveer 270 000 km², is bedek met naaldbome. Ongeveer 'n derde van hierdie bos is geskik vir houtkap. Dit word op beperkte skaal gebruik, die hout word in huiskonstruksie en as brandstof gebruik.

Energie

Die meeste elektrisiteit word deur waterkragaanlegte opgewek. Daar is ook tekens van steenkool, olie en aardgas, maar hierdie reserwes word nie ontgin nie. 'n Klein hoeveelheid natuurlike gas word in die Kotaneelee-veld onttrek.

Vervoer

Yukon het nie sy eie hawens nie, maar gebruik wel twee ysvrye hawens in Alaska: Skagway en Haines. Yukon het paaie wat heeljaar oop is, met 'n totale lengte van ongeveer 4 700 kilometer, wat dele van die Alaska-snelweg insluit. Die Dempster-snelweg is 'n grondpad van 735 kilometer lank. Dit gaan vanaf Dawson City tot in die noorde en eindig aan die kus met die Beaufortsee. Die internasionale lughawe Whitehorse is die belangrikste lughawe met binnelandse en internasionale bestemmings, maar laasgenoemde slegs in die toeristeseisoen.