Trias

Periode/ sisteem	Epog/ serie	Tydsnede/ etage	M. jaar gelede
Jura	Vroeg	Hettangium	jonger
Trias	Laat	Rhaetium	201,3–208,5
		Norium	208,5–~228
		Karnium	~228–~235
	Middel	Ladinium	~235–~242
		Anisium	~242–247,2
	Vroeg	Olenekium	247,2–251,2
		Indusium	251,2–252,2
Perm	Lopingium	Changhsingium	ouer
Die verdeling van die Trias (IKS).

Die Trias is die eerste geologiese periode van die Mesosoïese Era en strek van die einde van die laaste periode van die Paleosoïese Era, die Perm, sowat 250 miljoen jaar gelede tot die begin van die Jura sowat 200 miljoen jaar gelede. Dit is ook die eerste chronostratigrafiese sisteem van die Mesosoïese erateem.

Beide die begin en einde van dié periode word gekenmerk deur groot uitwissings. Die Trias is in 1834 so genoem deur Friedrich von Alberti, na aanleiding van die drie duidelik onderskeibare rotslae wat dwarsdeur Duitsland en Noordwes-Europa voorkom – rooi sandsteen, kalksteen en moddersteen, wat die "Trias" genoem word.

Die Trias het begin net ná die Perm-Trias-uitwissing, wat die Aarde se biosfeer uitgeput gelaat het; dit sou tot omtrent die helfte van die periode duur om die vorige diversiteit te herstel. Therapsida en Archosauria was die twee belangrikste gewerweldes in dié tyd. ’n Subgroep van die Archosauria, die dinosourusse, het in die Laat Trias vir die eerste keer hul verskyning gemaak, maar het nie oorheers tot die daaropvolgende Jurassiese Periode nie. Die eerste ware soogdiere, ’n subgroep van die Therapsida, het ook in dié periode ontwikkel, asook die eerste vlieënde gewerweldes, die pterosourusse, wat nes die dinosourusse ’n subgroep van die Archosauria was. Die groot kontinent Pangaea het tot in die middel van die Trias bestaan, waarna dit in twee landmassas verdeel het, Laurasië in die noorde en Gondwana in die suide.

Die klimaat in die Trias was hoofsaaklik warm en droog, met woestyne oor ’n groot deel van Pangaea. Die klimaat het egter vogtiger geraak namate Pangaea uiteengedryf het. Die einde van die periode word weer eens gekenmerk deur ’n groot katastrofe, die Trias-Jura-uitwissing, waarin baie groepe uitgewis is. Hierna kon die dinosourusse die Jura-periode oorheers.

Eksterne skakels

• "The Triassic world" Geargiveer 22 Februarie 2016 op Wayback Machine
• "Douglas Henderson's illustrations of Triassic animals"^{[dooie skakel]}
• Die Trias-uitwissings Geargiveer 1 Augustus 2017 op Wayback Machine
• Voorbeelde van Trias-fossiele

• Wikimedia Commons het meer media in die kategorie Trias.
• Wikiwoordeboek het 'n inskrywing vir Trias.