Lipsinchronisasie

'n Stemakteur skep 'n stem vir 'n animasiefilm. Na die opname sinchroniseer die tegnikus (hier in die voorgrond) die stem met die bestaande beeld.

Lipsinchronisasie behels die sinchronisasie van afsonderlik-opgeneemde klank met die beweging van die lippe van 'n kunstenaar. Hiervoor word die klank en die visuele materiaal gesinchroniseer. Dit kan benut word tydens die terugspeel van 'n opname in 'n lewendige opvoering, maar ook tydens die opname ("skiet") van 'n film of TV-reeks.

Lipsinchronisasie word gereeld in die filmbedryf gebruik indien dit nie moontlik is om klank van voldoende kwaliteit op die toneelplek op te neem nie, of om 'n klankeffek te skep wat slegs in 'n ateljee moontlik sou wees. Die klank word later in 'n klankateljee opgeneem, met die nodige sorg dat die gesproke woorde ooreenstem met die reeds-opgeneemde beelde.

Om die karakters se lippe van nature in 'n animasiefilm te laat beweeg, word 'n omgekeerde strategie gebruik: die stemakteurs neem eers die dialoë op, waarna die animator dit animeer.

Hierdie artikel is in sy geheel of gedeeltelik vanuit die Nederlandse Wikipedia vertaal.