Glasgow-moltrein

Die Glasgow-moltrein is 'n moltreinstelsel in Glasgow, Skotland. Die moltrein is in 1896 in gebruik geneem en is die derde oudste moltreinstelsel ter wêreld (Londen en Budapest se moltreine is ouer). Dit stelsel bestaan uit 'n ondergrondse dubbelsporige ringlyn van 10,4 kilometer met 15 stasies. Die tonnels het 'n diameter van slegs 3,35 meter. Die moltrein is daarom slegs 2,34 meter breed en 2,69 meter hoog. Die spoorwydte is 1 219 millimeter (4 Engelse voet).

Geskiedenis

Die lyn is vanaf 1891 deur die privaatmaatskappy Glasgow District Subway Company gebou en is op 14 Desember 1896 geopen. In 1923 word dit deur die munisipale vervoermaatskappy van Glasgow oorgeneem. Die trein is tot in 1935 deur kabels getrek. Daarna is die lyn met 600 volt gelykstroom geëlektrifiseer.

In 1977 word die metrolyn vir drie jaar vir opknappingswerk gesluit. Al die stasies is heeltemal oorgebou. 'n Bogrondse opstelterrein (Broomloan Depot) is by stasie Govan gevoeg. Omdat 'n hyskraan nie meer nodig was om treine op die lyn te sit en af te haal nie, kon die ritfrekwensie sedertdien by die aanvraag aangepas word.

In 1980 word die gemoderniseerde netwerk weer onder die naam Glasgow Underground geopen. In 2003 is die naam weer na Glasgow Subway terug verander.

Diens

Op weeksdae en Saterdae vertrek 'n trein elke 4 tot 8 minute. Die diens word van soggens vroeg tot laataand gelewer. Op Sondae is dit beperk tot 'n 8-minutediens tussen 11:00 en 18:00.

Stasies

Die metrostasies van die Glasgow-moltrein is (vanaf die noordelikste stasie kloksgewys):

Hillhead
Kelvinbridge
St. George's Cross
Cowcaddens
Buchanan Street (langs die 'Queen Street'-treinstasie)
St. Enoch (die Glasgow Central-treinstasie is binne loopafstand)
Bridge Street
West Street
Shields Road
Kinning Park
Cessnock
Ibrox
Govan
Partick (met die Partick-treinstasie gekombineer)
Kelvinhall

Eksterne skakels

Wikimedia Commons het meer media in die kategorie Glasgow-moltrein.