Bloedvat

Die term bloedvat (meervoud: bloedvate) verwys na slagare, are en kapillêre vate. Die struktuur van bloedvate in die liggaam van 'n soogdier kan beskryf word as 'n netwerk van buise waardeur bloed na die res van die liggaam vervoer word.

Arteries

Slagare of arteries is die bloedvate wat geoksigineerde (suurstofryke) bloed weg van die hart af vervoer. Die uitsondering is die pulmonêre arterie (longslagaar), wat die enigste arterie is wat gedeoksigineerde (suurstofarme) bloed vervoer. Bloed word onder druk van die hart in die arteries geforseer. Die wande van arteries is baie elasties en daar is geen kleppe in arteries nie. Daar is drie spierlae wat die arterie vorm, nl. die dik vesellaag buite, elastiese weefsel en spierweefsel in die middel en 'n endoteellaag binne. Arteries vertak om arteriole te vorm.

Kappilêre Vate

Kappilêre vate of haarbloedvaatjies is mikroskopies en word aan die einde van die arteriole aangetref. Hulle is die kleinste van al die bloedvate en elke sel in die liggaam lê naby 'n kapillêr. Bloed vloei stadig deur hierdie bloedvate wat een sellaag dik is en bloedplasma gaan deur die wande en spasies tussen die selle in. Die plasma tussen selle word weefselvloeistof genoem. Suurstof en voedingstowwe beweeg uit die bloed na die selle terwyl koolstofdioksied en afvalstowwe uit die selle na die bloed beweeg.

Vene

Vene word algemeen are genoem. Vene vervoer suurstofarme boed na die hart. Die uitsondering is die pulmonêre aar wat suurstofryke bloed vervoer. Die druk by vene is baie laer as dié by arteries. Vene bestaan uit drie lae, naamlik 'n buitenste vesellaag, 'n middelste elastiese laag en 'n binneste endoteellaag. Anders as by arteries kom daar wel kleppe by vene voor.