餘部橋梁

新橋

舊橋

餘部橋梁，日本一橋，行火車，歸入火車橋一類，一九一二年啟用，喺兵庫縣美方郡香美町香住區餘部。原為鐵橋，二〇一〇年改建石屎橋。舊橋大部份已拆，留有西端部份留做空之驛。條橋為西日本旅客鐵道一部份，歸山陰本線。橋底有長谷川同國道一百七十八號。

由於戰後一度廢除部份唐字，餘化為余，故此亦寫做余部橋梁。之不過戰後橋頭開咗新站，為咗唔撞名，寫成餘部驛，用返原字。橋有新有舊，史上有好多叫法，如鐵橋，如高架橋，如陸橋等。梁字為樑本字，日本戰後一度廢除，故此曾改用平假名。

原本鐵橋話就話做得觀光建設，之不過話要拆先引來大量遊客。

鐵橋來自明治時期，當時同俄國打仗，亦即日俄戰爭。山陰即山北面，南面日光有山遮住叫陰，日本來講，中部對住日本海嗰邊。橫渡日本海，另一邊就到俄國。鐵道院想打通依邊鐵路。鐵橋就屬依一環。由於唔想起長橋，亦唔想起長隧道，決定餘部起鐵橋。鐵橋技術由美國引入，故此有啲美國風格。起好多座鐵架，承擔上面鐵路。一九〇九年起橋時，法令唔用得無技術大清勞工，然而同朝鮮簽約，起用咗唔少朝鮮勞工。

不過鐵架要承受海風，風中水份鹽份，會侵蝕鋼鐵。外面要油油防鏽。第二次世界大戰，唔夠料油，侵蝕加劇。戰後逐步換過晒啲鋼材，換造工字鐵，防鏽油都用啲勁。四五年就油一次。不過長年保養亦所費不菲，會落喺地方之上。

一九八六年，有單嚴重意外，有班車唔理大風照過，跌咗落橋，責冧間廠，同部份住宅。話就無搭客，不過車上人員同下面廠房就有死。事後建碑安慰死者。件事令風速要求更嚴格，周不時停駛。

事實上橋附近一向有唔好經歷，一來好嘈，二來周不時跌有嘢落來，行車零件沙石雨雪之類固然有，車上廁所跌屎尿落來又有，風吹爆火車玻璃都有，甚至有人跳橋自殺。

保養、交通同安全等因素，就促成換新石屎橋。新橋東端有個屈曲位，新舊交替痕迹。舊橋仍然運行時，新橋喺側邊起。換用新橋就要屈一屈。