轉注
轉注（粵音：zyun2 zyu3）係六書其中一種構成漢字嘅方法，大致係話同一類嘅字，意思可以互通。
例字
[編輯]- 考、老
- 顛、頂
界定
[編輯]睇埋：說文解字
轉注者，建類一首，同意相受，考老是也。
喺六書入面，轉注嘅定義一直都充滿爭議。許慎對轉注嘅解釋好簡略，而《說文》全書九千幾個字入面都冇具體講明邊啲字係轉注字。所以後世學者對轉注嘅真正意思有好多唔同睇法，到廿一世紀初都仲未有一致定論。
對於轉注，一種常見理解如下。如果話假借係一個字有幾個意思，轉注就可以理解做一個意思有幾個字嚟表達[1][2]。有學者用咗個比喻：「將一碗水倒入杯度，外形雖然改變，但內容係一樣。音義就好似水咁，形狀可以係碗可以係杯，即係形體雖然唔同，但實質內容係一樣。」譬如唔同地方因為方言等嘅分別，對老呢個概念[註 1]口語上有唔同叫法，有啲地方叫做 lou5，有啲叫做 haau3，有啲叫做 zi2。當人哋要為「年老」呢個意思整字嘅時候，就約定用老做部首，將呢個義符加喺聲符上面，造出老、考同耆（想像粵語口語都會用嘅耆英一詞）。呢啲字就係互相嘅轉注字。
批評
[編輯]因為轉注呢個概念咁模糊，有學者乾脆建議而家嘅人唔使理會呢個概念。好似裘錫圭就噉講（原文係中文書面語，下面譯做粵文）：
而家研究漢字，完全唔需要理會轉注呢個術語。（就算）唔講轉注，（都）一樣可以將漢字嘅結構解釋清楚。[3]