蘇格拉底反詰法

呢幅油畫描繪一個後生男人跟蘇格拉底（右手邊嗰個）學嘢。

蘇格拉底反詰kit3法，簡稱蘇格拉底法（英文：Socratic Method），係由古希臘哲學家蘇格拉底所創嘅一種教學方法。呢種做法主要係透過一連串提問，幫助討論嘅參與者反思自己係點諗嘢嘅（而唔係直接畀個答案佢），仲要係佢哋諗諗吓發現自己思路當中有矛盾，最終有動力去求知。蘇格拉底法強調對話嘅力量，認為透過係噉提問同反思，人可以睇清自己幾咁無知，從而獲得智慧。

蘇格拉底法呢種教學法，到咗現代都仲有人用。無論係教育、哲學甚至心理學，都有人會運用蘇格拉底法，務求提升啲人嘅思考能力。

諗頭

睇埋：批判思維

蘇格拉底法嘅大目標係要推動批判思維。蘇格拉底唔係想畀出一個「正確答案」，反而係希望討論過程可以幫助參與者自己發現真相。喺成個過程裡便，參與者首先要提出自己嘅見解，然後透過被質問發現自己最初諗嘅嘢查實有矛盾，最後焗住承認自己對手上嗰個問題嘅認識有漏洞。

蘇格拉底相信，真正嘅智慧唔係知晒所有嘢，而係要知道自己唔知道乜嘢。呢個理念亦成為咗佢教學法嘅重心。通過問問題，蘇格拉底一步步揭示對方思想嘅錯誤，而呢點響應咗佢對知識嘅觀點：

「	世上唯一真正嘅智慧，係知道自己咩都唔知。	」
——蘇格拉底

做法

十六世紀嘅《尤西弗羅篇》文本；上面同時用拉丁文同希臘文寫咗啲內容响度。

蘇格拉底法通常以對話形式進行。喺對話過程中，蘇格拉底（或者教學者）會以一啲簡單嘅問題開始，引對方畀答案，對方嘅答案包含咗佢嘅睇法，然後蘇格拉底就會引導對話者自我反思，透過發問嚟指出佢個觀點有咩唔妥（甚至自相矛盾）嘅地方。一旦對話者發現自己畀嘅答案根本自相矛盾，佢就焗住要審視自己嘅諗法，甚至可能要放棄之前堅信嘅嘢。喺呢個過程裡便，對話者唔會即時得出答案，但係就進入一種反思嘅狀態，呢個狀態就係蘇格拉底所追求嘅。

舉個具體例子說明，古希臘文獻《尤西弗羅篇》就有提到蘇格拉底同尤西弗羅討論咩係虔誠或者有神心。尤西弗羅被指係當時雅典一位祭師，段對話其中一段大致係噉嘅：

• 蘇格拉底：「我問你，點先算係虔誠？」
• 尤西弗羅：「虔誠嘅嘢，就係天神鍾意嘅嘢。」
• 蘇格拉底：「天神唔鍾意嘅嘢，就係唔虔誠嘅？」
• 尤西弗羅：「冇錯。」
• 蘇格拉底：「噉如果眾神之間對某樣事物有分歧，有啲天神鍾意，有啲天神唔鍾意，噉呢樣事物係虔誠定係唔虔誠嘅呢？」
• 尤西弗羅：「呀...」

喺呢段對話當中，尤西弗羅一開始嗰陣諗住自己好清楚咩係「虔誠」，但係蘇格拉底問咗佢幾句，佢就發現自己初頭講嘅嘢根本自相矛盾。佢可以選擇抗拒蘇格拉底嘅提問，或者承認自己對呢個問題無知。

睇埋

• 矛盾
• 辯論
• 認知行為治療

拎

• （英文） 蘇格拉底方法，不列顛百科全書