荔灣湖公園

荔灣湖公園（粵拼：lai6 waan1 wu4 gung1 jyun4），係廣東省廣州市荔灣區入面嘅其中一間公園，係喺廣州嘅西邊風景比較靚嘅荔枝灣、泮塘湧、荔香園等嘅基礎上開闢出來嘅。

史

呢間公園喺西關荔枝灣畔，民國時期未開闢公園前，就係廣州市度嘅唯一嘅消暑地，唔少人會專登過去扒艇暢遊，夕陽時分啲風情號稱比得上「西子湖邊秦淮河畔」。1930年代初以來，伴隨巴士線開達多寶橋同多寶路等馬路開闢，程天固等市政府官員，就有計劃喺呢度推動開闢公園。初頭係計劃過整公園式馬路，後尾計劃係沿用荔香園舊址，擴大成片地區做荔灣娛樂公園。不過民國政府一路都未有實行。

到咗中共接掌後嘅1958年，卒之喺廣州市人民政府嘅發動下，愛啲市民做義務勞動，嚟到民國時經計劃嘅地方度開工，整出嚟人工湖先，喺1960年，呢噠地先至改咗名叫「荔灣湖公園」，佢嘅掛牌係有由前民盟主席同埋最高人民法院院長沈鈞儒嚟寫咗呢間公園嘅名。係屬於荔灣區級文化休息公園。而呢個地名好西關化，公園附近同入面重有豐富嘅人文景觀。重有附近冇幾遠有間仁威廟同埋荔枝灣涌就喺公園隔離。

概覽

地理位置

呢間公園東邊靠住龍津路同泮塘路；南邊去到西關口；西邊去到黃沙大道；北邊去到中山八路。

面積

呢間公園嘅佔地面積大概400000平方米，其中湖面大概霸咗成間公園嘅三分之二。

公園嘅特色同復建

呢間公園喺以湖泊嚟做主體，公園入面有4個湖，佢係由小翠湖、玉翠湖、如意湖、五秀湖呢4個湖嚟組成。

其中公園入面有亭、台、榭、廊、軒、閣呢六個全部都喺碧波嘅綠樹入面，有南國風光嘅氣派。佢重係一棟有遊覽、文體、娛樂、休息喺埋一齊嘅多功能、綜合性公園。公園入面重有好多種遊樂設施、健身場館、國際標準嘅游水池、遊艇、BB樂園等。入面重有飯店、酒廊、小賣部、燒烤場等呢啲服務設施。

喺小翠湖嘅浮香塢度有茶藝樂園。為咗重現舊陣時嘅荔枝灣園林同埋景觀嘅關係，荔灣區政府試過由庫房度掟咗幾百萬蚊，落去喺五秀湖邊整返個仿大清名園——海山仙館嘅大屋，重有兩個水亭同埋兩層樓高嘅展覽大廳。

而五秀湖入面嘅菱洲島已經種嗮荷花同埋荔枝樹，宣稱係恢復咗舊時荔枝灣嘅風景。喺1985年，經過組織公眾嘅推薦同埋專家嘅鑑定，公園入面重揀咗荔灣湖入面嘅八景：花坪舞緣、榕蔭歌聲、玉湖泛舟、荔擁虹橋、仙祠古渡、春波松影，紫微秀徑同埋沙渚菰蒲。而呢八景都係遊覽荔灣湖嘅地方。公園附近重有間廣州市嘅三大園林酒家嘅其中一間酒家——泮溪酒家，呢個都係中外嘅遊客成日都嚟呢度食廣州啲靚嘢嘅。

主要活動場所

呢間公園嘅主要活動場所都係集中喺玉翠湖嘅範圍同埋周邊，入面有各種遊樂、健身器械同埋設備。喺公園嘅南邊重有佔地1755平方米嘅國際標準游水池嘅康樂中心。而喺小翠湖附近嘅浮香塢，依家係名貴花卉、鳥、魚、蟲同埋名家字畫、民間藝術珍品嘅展覽欣賞區。而如意湖附近嘅拾蔭洲就有霧插室同埋組培室，而呢兩個地方都係名貴稀有品種嘅花卉苗木培育欣賞區。喺五秀湖附近重有全市最長嘅貼水長廊，佢係由橋、亭、廊、軒呢四樣嚟組成，全長有192.8米。