會意
會意（粵音：wui6 ji3）係六書其中一種構成漢字嘅方法，將兩個或更多嘅字符拼埋一齊表達意思。東漢學者許慎就係噉樣描述會意概念嘅：「會意者，比類合宜，以見指撝（同「揮」），武信是也。」句嘢話武同信都係會意字嘅例子。
字例：傳統漢字
[編輯]會意字係指一隻漢字由多過一個漢字組合埋一齊而形成嘅，通過依啲組成部份嘅結合，隻新字表達出一個新嘅意思，而唔係單純睇各個字本身嘅意思。例如以下依啲漢字，都成日歸類為會意字[1]：
漢字 粵音 解釋[註 1] 仁 jan4 人（企人邊亻）加上二，兩個人喺埋一齊，即係仁慈能引致嘅狀態。 休 jau1 由人企喺木側面而形成，暗指一個人企喺樹下面休息。 信 seon3 人加上言，信一個人講嘅嘢（言）係講求信賴嘅。 明 ming4 日同月結合，太陽同月亮一齊照，令到周圍一片光明。 林 lam4 由兩個木字組成，木代表樹木，所以砌埋一齊就代表好多樹嘅地方，即係森林。 武 mou5 甲骨文裡便嘅武字由戈同止構成，戈係古代一種兵器，而戈下面有隻腳（止），就好似士兵練武噉。 歪 waai1/
me2 [註 2]不砌落正度，是為不端不正，東歪西倒噉解。 男 naam4 田結合力，古代社會男女分工，好似耕田噉嘅粗重工夫通常係男人做嘅，即係話喺田入便出力嘅都係男人。
字例：粵語用字
[編輯]睇埋：粵字
有一部份粵字（粵語專用嘅字，有古字又有新造字）被指係屬於會意字，譬如：
粵字 粵音 解釋 冇 mou5 攞住個有字，「將裡便有嘅嘢攞走」就形成冇字。 奀 ngan1 話人奀挑鬼命就係話佢生得細粒，奀就係將不同大砌埋一齊，意為不大。
睇埋
[編輯]- 形聲：同形聲字唔同嘅係，會意字組合起上嚟同組成部份嘅讀音無關，所以一隻會意字嘅讀音通常都同佢啲組成部份差天共地。