愚公移山

2006 年影到嘅香港大帽山；如果愚公同佢啲子孫一路係噉掘，有冇可能終有一日會令大帽山成座唔見咗呢？

《愚公移山》（粵拼：jyu4 gung1 ji4 saan1）係出自戰國時期道家典籍《列子》嘅一個神話故事。個故事講一個年紀好大嘅阿伯（愚公）好努力噉掘土石，諗住掘走佢屋企附近嗰兩座山。佢嘅鄰居笑佢話佢傻，但愚公照樣繼續做，話佢啲仔同孫可以延續佢做嘅工作。上天嘅神靈見佢咁有恆心，就施法將兩座山移開咗。

粵音文言

睇埋：列子 (書)

《愚公移山》個故仔出自《列子．湯問》，係用文言文寫嘅。原文如下，當中現代少見嘅漢字標咗粵拼讀音。

太行、王屋二山，方七百里，高萬仞jan6。本在冀kei3州之南，河陽之北。

北山愚公者，年且九十，面山而居。懲山北之塞，出入之迂jyu4也。聚室而謀曰：『吾與汝畢力平險，指通豫南，達於漢陰，可乎？』雜然相許。其妻獻疑曰：『以君之力，曾不能損魁父之丘，如太行、王屋何？且焉置土石？』雜曰：『投諸渤海之尾，隱土之北。』遂率子孫荷擔者三夫，叩kau3石墾壤，箕畚bun2運於渤海之尾。鄰人京城氏之孀妻有遺男，始齔can3，跳往助之。寒暑易節，始一反焉。

河曲智叟sau2笑而止之曰：『甚矣，汝之不惠。以殘年餘力，曾不能毀山之一毛，其如土石何？』北山愚公長息曰：『汝心之固，固不可徹，曾不若孀妻弱子。雖我之死，有子存焉；子又生孫，孫又生子；子又有子，子又有孫；子子孫孫無窮匱也，而山不加增，何苦而不平？』河曲智叟亡以應。

操蛇之神聞之，懼其不已也，告之於帝。帝感其誠，命誇娥氏二子負二山，一厝cok3朔東，一厝雍南。自此，冀之南，漢之陰，無隴斷焉。

粵文譯版

《愚公移山》依個故仔譯做現代粵文如下：

太行同王屋依兩座高山，方圓七百里，成萬丈咁高。本來喺冀州以南，河陽以北。

北山嗰度住咗位愚公，佢成九十歲人，住喺兩座山對面。佢飽受山北路途阻塞，出入成日都焗住要兜遠路。於是佢就聚集佢啲家人商量：『我同你哋一齊竭盡全力剷平門前大山，等道路可以直通豫州南部，抵達漢水南邊，行唔行得通？』佢班屋企人紛紛贊同，但佢老婆就有啲猶豫：『憑你啲咁啄力，連嗰個叫魁父嘅土丘仔都搞唔掂，更何況係好似太行、王屋噉嘅大山呢？再講，啲泥土同石要點處置？』一眾家人講：『將啲土石掟落渤海岸邊，隱土嘅北面囉lo1。』於是愚公就率領幾個做得粗重嘢嘅仔同孫，揼石頭掘土壤，將啲土石運去渤海岸，佢隔離屋嗰戶人京城氏嘅寡母婆有個仔，七八歲啱啱換牙，都跳過嚟幫手。佢哋由冬到夏，能夠往返一次。

河曲有個有智慧有學問嘅老人嘲笑愚公：『你噉未免太蠢喇。你年紀都咁大，靠住你淨低嘅時日同氣力，連山上便嘅小草都催毀唔到，仲想掘走晒啲土石？』愚公長嘆一聲，答：『你諗嘢咁盟塞，盟塞到冇得變。你簡直不如寡母婆同乜都唔識嘅細路。就算我死咗，我嘅仔仲喺度吖嘛；仔又會生孫，孫又會生仔；孫嘅仔又會生仔，佢嘅仔又會有孫；子子孫孫無窮盡；而山唔會無啦啦多咗土石，仲唔掘得平座山咩？』河曲智者聽到，無言以對。

山神聽到愚公講嘅依番說話，驚愚公佢哋會沒完沒了噉掘，就走去將成件事話畀天帝知。天帝畀愚公嘅誠心感動，就命令大力神誇娥氏嘅兩個仔去孭起兩座山，一座搬去朔方嘅東邊，一座擺去雍州嘅南邊。從此以後，冀州南部直通漢水嘅北邊，道路暢通無阻。

道理

睇埋：恆心

一般認為，《愚公移山》依個故仔，係講緊恆心：個故仔嘅主角係愚公，佢最大嘅特徵係鍥而不捨，不畏艱辛，就算遇到有人（河曲智者）笑佢話佢蠢，佢依然繼續堅持做「掘走座山」依樣望落冇可能嘅工作；到咗最後，就連天上嘅神靈都畀愚公打動咗，命令大力神搬走大山，等愚公可以喺有生之年睇到自己努力嘅成果——愚公憑住佢嘅堅定精神得到回報，於是成個故事就道出咗有志者事竟成噉嘅道理。

廿世紀中國畫家徐悲鴻畫嘅《愚公移山》 廿世紀中國畫家徐悲鴻畫嘅《愚公移山》

睇吓

• 斯薛佛斯：依個希臘神話故事，都係講有個人係噉重複做望落冇意義嘅嘢，不過佢個理由就冇咁勵志。
• 比話：愚公嘅故事，可以當係一個比話。
• （香港繁體） 愚公移山 終極指南，學博教育