張獻忠

張獻忠（1606年 9月18號—1647年 1月2號），字秉忠，號敬軒，自號「八大王」，係中國明末民變領袖。

生平

張獻忠萬曆三十四年（1606年）九月十八日生於延安衛柳樹澗堡（家下陝西省定邊縣郝灘鄉劉渠村），屬於軍籍，做過捕快、軍吏，後因犯法被除名。

崇禎三年（1630年），張獻忠喺米脂追隨府谷人王嘉胤起事，自號八大王。王嘉胤死後改投高迎祥。

1635年參與滎陽之會，議決進取，同高迎祥等人一齊攻打東方。冇幾耐張獻忠同李自成因故分裂，張獻忠帶部下攻長江流域，李自成就攻黃河流域。1637年，俾明軍總兵官左良玉部攻打，張獻忠嘅起義部隊嚴重受損，張獻忠自己都受傷。

1638年，張獻忠喺湖北谷城受招安授予副將。駐地王家河，易名太平鎮，以示休兵。1639年，重舉起反明大旗。轉戰四川境。1641年破襄陽，殺襄王朱翊銘。1643年佔據武昌，稱大西王。1644年8月9日攻破成都，巡撫龍文光、蜀王朱至澍同佢啲妃嬪全部自殺死咗。張獻忠號稱60萬大軍，好快控制咗四川大部分州、縣。8月16日登基成為大西國皇帝，改元大順。以成都為西京。

順治三年（1646年）清兵南下，由於俾叛徒劉進忠出賣，張獻忠喺鳳凰山（西充縣同鹽亭縣交界，西充縣城東南15公里嘅多扶場西）多寶寺前太陽河畔俾清軍將領豪格射殺。張獻忠死後，佢四個義子李定國、孫可望、劉文秀、艾能奇率領餘眾聯明抗清，轉戰貴州、雲南。

屠殺

鳳陽大屠殺

彭孫貽嘅《平寇志》記載崇禎八年（1635年）張獻忠焚毀南直隸鳳陽府，「士民被殺者數萬，刨孕婦，注嬰兒於槊，焚公私廬舍2650餘間」。呢年張獻忠攻佔安徽和州，「是時殺戮慘毒，有縛人去淫其妻殺之者；有趨人父淫其女而殺之者；有裸孕婦共卜腹中嬰兒男女刨驗以為戲者；有以大鍋沸油擲嬰孩於內觀其跳躍啼號以為樂者……所虜子女萬千，臨行不能多帶，盡殺兒趨，暴殘恆古未有。」

四川屠殺

據史料記載，順治三年（1646年）張獻忠退出成都時，絕望之下，喺四川進行空前嘅燒殺破壞；有40萬人嘅成都得番二十戶居民；天府之國四川遭到毀滅性破壞，人口由至少三百萬一度銳減到得八萬人，導致後來清朝時期長達一個幾世紀嘅「湖廣填四川」。同年十月二十，張獻忠喺鹽亭縣鳳凰山中箭死咗。

清代彭遵泗所寫嘅四卷《蜀碧》詳細記述張獻忠喺四川嘅殘忍至極大屠殺。當時嘅西洋傳教士亦有類似記載。但亦有學者懷疑，四川幾百萬人係唔係真係俾張獻忠殺晒？四川人口由萬曆六年（1578年）嘅三百一十萬二千七十三（《明會要》卷五十）到清康熙二十四年（1685年）估算嘅一萬八千零九十丁（嘉慶《四川道志》卷十七），足足少咗三百幾萬人。但嗰時張獻忠已經死咗成四十年，而順治十六年（1659年）清軍至攻陷渝城（重慶）。因此，呢啲學者懷疑所謂嘅「七殺碑」亦可能只係「天生萬物與人，人無一物與天，鬼神明明，自思自量」嘅誤植。