可測試度

可測試度（粵拼：ho2 caak1 si3 dou6）喺科學哲學上係指一句假說可以有嘅特性。一句假說嘅可測試度包含咗兩樣嘢：

1. 句假說係咪有可否證度？研究者可唔可以想像到最少一個可能情況，一旦睇到呢個情況真係發生，就會證實句假說係錯誤嘅？
2. 句假說喺實行上係咪可以測試到？

有關條件 1，可以睇可否證度嘅嘢。

有關條件 2，舉個例說明，想像有人提出咗句噉嘅假說：

「一位天使對翼係 50 kg 咁重。」

如果要驗證呢句嘢，就要去搵一位天使返嚟，再用某啲方法磅吓佢對翼，睇吓佢對翼係咪真係 50 kg 咁重，但問題係以廿一世紀初嘅認知，冇人能夠搵到天使返嚟，所以冇任何方法可以證實句嘢係一個錯嘅預測。因為噉，上面呢句有關「天使對翼幾重」嘅假說純理論上可以話係有可否證度（想像到個情況可以證實句假說錯誤），但並唔可測試。

睇埋

• 可否證度
• 可運算度