個名怪嘅小妖

少女：「唉，我做唔到將禾稈草變做金，今次死梗喇。」
小妖：「小姐唔使閉翳，我可能幫到你。」

《個名怪嘅小妖》（德文：Rumpelstilzchen；英文：Rumpelstiltskin）係《格林童話》有收錄嘅一個童話故事。

個故仔嘅情節講到有隻仙子，佢個名好怪叫 Rumpelstilzchen。佢幫女主角將禾稈草變做金，代價係想要得到女主角嘅頭一個親生細路。然後過咗好多年，個女人生咗個啤啤bi4 bi1，隻仙子再出現想夾硬帶個細路走。

情節

喺好耐好耐以前，有個磨坊主人。佢向國王講大話，話自己個女（女主角）能夠將禾稈草織到變做金絲。國王聽到就召見個女仔，仲將佢韞咗入間密室，密室裏面淨係得禾稈草同埋紡車。國王下命令，叫個女仔要喺聽日朝早之前將啲禾稈草織到變成金，如果唔係就要處死佢。

正當女主角諗住自己實死冇生嗰時，有一隻小妖出現喺佢面前。小妖開口，話佢可以施法將啲禾稈草變成金，不過佢想要女主角條頸鏈。女主角肯交易，然後小妖就將啲禾稈草變咗做金。不過到咗第二朝，國王要求女主角再做多次「禾稈草變金」，當晚小妖再出手幫女主角，今次係攞走女主角隻戒指。到咗第三日朝早，國王又要求女主角做多次，今次女主角冇嘢可以畀小妖，小妖就話想要女主角嘅第一個親生細路。

後嚟國王決定要娶女主角做老婆—於是出身寒微嘅少女就做咗皇后。過咗好幾年，皇后生咗個啤啤bi4 bi1，啱啱生完嗰晚小妖真係出現，仲想夾硬帶走個細路。救子心切嘅皇后哀ai1小妖。小妖於是就提出：

「如果你可以喺三日內估啱我真名係乜，我就唔會搶走你個啤啤。」

皇后周圍打探，打探咗一輪之後，發現佢有個使者知隻小妖叫乜名：

「呀，皇后陛下，我早排咁啱撞到隻小妖喺森林裏面唱歌，佢啲歌詞提到佢個名叫 Rumpelstilzchen 。」

而到咗最後嗰晚，皇后去到小妖面前，估小妖個名係 Rumpelstilzchen —估啱咗。小妖跟住就發晒爛渣，係噉喺度跳嚟跳去，跳跳吓大力得滯，將自己個身體撕咗做兩半。

故仔完。

亦都有啲版本話，隻小妖最後係好嬲噉坐住隻大湯殼飛走。

睇埋

• 《格林童話》
• 《史力加萬歲萬萬歲》有取材自呢個童話故事。

拎

• Rumpelstiltskin （英文），不列顛百科全書講呢個故仔。
• Rumpelstiltskin （英文），《個名怪嘅小妖》一個英文譯版。
• Literature / Rumpelstiltskin （英文），TV Tropes 講《個名怪嘅小妖》呢個故仔。