't Hôôd
't Hôôd (Nederlands: Havenhoofd) is een klein durp op Goeree-Overflakkee mee 360 inweuners (2020). 't Hôôd lei zo'n twêê kilometer van de stad Goeree vandaen an 't ende van et haevenkanaal tegen de duun'n an. Vlakbie 't bekende natuurgebied 'De Kwaejen Hoek'.
Tot an 2012 lag 't durp in de voormaelige gemeênte Goereê.
Ontstôôwen in geschiedenisse
[bewerk | brontekst bewerken]Deurdat de haevene van Goeree steeds vaorder van zêê of kwam te liggene binne ze in de 19e eeuwe begonne mi 't bouwen van huuzen an 't ende van het haevenkanaal. Vooral vissers, die duchte bie d'r waerrek woue weune, deeje da. De vissers liete d'r schepen deer naemelijk ligge as ze thuus wazze. Langzaemerand is et uutegroeid tot een durpie.
In d'n Twêêden Wereldoorlog is 't durpie helemaele esloopt vanwege de anleg van de Atlantikwall zoas de Duusters dat noemende. Dat heit diep inegrepe in de gemêênschap. Nae d'n oorlog is 't durp weer opebouwd. De haevene van 't Hôôd is noe ofesloote van zêê deur de anleg van de Deltawaereken rond 1970. Schepen kunne d'r noe nie meer komme.
Vandaeg den dag
[bewerk | brontekst bewerken]De durpsstructuur is echt die van een durp in niejt die van een gehucht. De huuzen bin vrie duchte op mekoare ebouwd in in de Blaeuwe Distelstraete stoa een antal huurhuuzen. D'r bin vuuf straeten in 't durp, naemelijk Haeveneind, 't Diekje, Brêênstraete, Blaeuwe Distelstraete in 't Duunroosplein. Bie mekoare bin d'r 120 huuzen in dat bluuft etzelfde want d'r geldt een bouwstop. De leste jaeren is de discussie over wè of gin nieuwbouw wè weer de kop op estoke.
't Hôôd heit een eige schoole, de Christelijke lêêgere schoole 'Eben-Haezer', weer oak veel kinders uut de stad Goeree naer toe goa. Normaal gesproke doewe ze dat op de fiets mar in 't verlejen ist oak wè voor ekomme dat de Goereese kinders, ast vroos in de wintere, op de schaessen naer schoole ginge, heen in vromme over 't haevenkanaal.
De haevene wor zôôas ezeid nie meer gebruukt, behalve de keren dat et gebruukt is voor 't tobbedansen op sommige fêêstdaegen. An de haevene stoat een klein standbeeld van een visserman mi een mande onger z'n aerrem as een symbool voor 't Hôôd. Nog steeds weune d'r veel vissers in kottereigenaers op 't Hôôd.
Zie oak
[bewerk | brontekst bewerken]Lienks nae buten
[bewerk | brontekst bewerken]
