یوں تو کہا جاتا ہے کہ خوبصورتی ایک ریلیونٹ ٹرم یعنی ایسی اصطلاح ہے جو متعلقہ ہو، لیکن عموماً خوبصورتی سے جڑے عمومی تصورات کو ہی معیار سمجھا جاتا ہے۔کاسمیٹکس انڈسٹری یا میک اپ کرتے ہوئے جہاں بہت سی باتوں کا خیال رکھا جاتا ہے وہاں یہ بھی ذہن میں رکھنا ضروری ہوتا ہے کہ اس وقت میک اپ کا کیا ٹرینڈ چل رہا ہے۔آج ہم آپ کو کچھ ایسی ٹپس دینے جا رہے ہیں جو میک اپ کرتے ہوئے مددگار ثابت ہوں گی اور اس کے لئے آپ گھر پر آسانی سے ٹرینڈنگ میک اپ کے اسرار و رموز سے بھی آگاہ ہو سکیں گی۔
یاد رکھیں کہ میک اپ لک کا انتخاب کرنے میں جہاں ایونٹ کی اہمیت ہوتی ہے وہیں موسم کو مدنظر رکھنا بے حد ضروری ہے۔کیونکہ اگر آپ گرمیوں کے موسم میں ایک ڈیوی میک اپ کر لیتے ہیں تو ایسے میں مزید پسینہ آنے سے وہ خراب دیکھائی دے گا۔میک اپ کو زیادہ دیر تک قائم رکھنا بھی ایک فن ہے۔موسم سرما میں میک اپ کرنے سے پہلے اپنی سکن کو موئسچرائز ضرور کریں تاکہ آپ کی جلد میک اپ کے لئے تیار ہو سکے۔اب یہاں بہت سی خواتین یہ کہیں گی کہ ان کی جلد تو آئلی ہے اس پہ موئسچرائز کرنے سے مزید آئل آئے گا تو اس کا جواب یہ ہے کہ مارکیٹ میں ایسے بہت سے پرائمرز دستیاب ہیں جو آئلی سکن کو مدنظر رکھتے ہوئے تیار کئے گئے ہیں۔کوشش کریں کہ ٹینٹڈ موئسچرائزر استعمال کریں۔اس کے استعمال سے آپ کے چہرے پر چمک آ جاتی ہے بلکہ چہرے کی نمی بھی برقرار رہتی ہے اس طرح کی پراڈکٹس میں سن بلاک بھی شامل ہوتا ہے جو کہ آپ کی جلد کی حفاظت کرتا ہے۔یاد رکھیں پرائمر ہمیشہ لیکویڈ بیس یا فاوٴنڈیشن سے پہلے استعمال کریں۔سٹک بیس سے پہلے پرائمر استعمال نہ کریں۔میک اپ کرتے وقت دھیان رکھیں کہ آپ کا فاوٴنڈیشن اور آئی شیڈز اچھے معیار کے ہوں۔ان پراڈکٹس کا آئل فری ہونا ضروری ہے تاکہ تادیر سٹے کر سکیں۔
خواتین کو ایک بات ہمیشہ یاد رکھنی چاہئے کہ جب بھی فاوٴنڈیشن یا دیگر میک اپ خریدیں تو اچھی کوالٹی کا اور اوریجنل خریدیں۔کیونکہ کاپیز کی مارکیٹ میں بھرمار ہے اور یہ مضرِ جلد کیمیکلز سے بھرے ہوتے ہیں۔
سوا مہنگا روئے ایک بار سستا روئے بار بار۔اپنی جلد کو دو نمبر کاسمیٹکس کے لئے مشق ستم بنانے کے بجائے کم پروڈکٹس خرید لیں لیکن اچھے اور معیاری ہوں۔اگر سکن پر کسی بھی قسم کی ڈسکلریشن ہو تو کنسیلر کا استعمال لازمی کریں یہ میک اپ کو گرے ہونے سے بچاتا ہے۔فاوٴنڈیشن ہمیشہ اپنی سکن کے شیڈ سے ایک شیڈ کم لیں تاکہ نیچرل اور برائٹ لک آئے۔سیم شیڈ میں میک اپ کچھ دیر بعد ڈل لک دینے لگتا ہے۔فیس پاوٴڈر یا لوز پاؤڈر کو سپنچ پر ڈسٹ کر کے لگائیں اور بہت کم مقدار میں لگائیں تاکہ میک اپ کا کیکی لک نہ لگے۔