Bus Ka Safar, Urdu Nazam By Syed Mohammad Jafri

ان ہی سے پوچھتا ہوں میں سفر کرتے ہیں جو بس میں

کہ دے دیتے ہو اپنی زندگی کیوں غیر کے بس میں

یہ بس وہ ہے کہ بس ہو جائے جب موٹر تو بنتی ہے

سڑک پر روٹھ جائے تو بڑی مشکل سے منتی ہے

یہ اکثر بیٹھنے والوں کے دھکوں سے کھسکتی ہے

کبھی کشتی میں دریا ہے کبھی دریا میں کشتی ہے

سفر کرتے ہیں اس میں جب براتی اور دلہن دولہا

تو بن جاتی ہے موٹر جائداد غیر منقولا

اور اس کے بعد اگر تاریک ہے شب دور منزل ہے

تو کرتے ہیں طواف اس کا وہ مجنوں جن کی محمل ہے

کلینر سے یہی کہتا ہے شوفر ہو کے بچارا

''کہ کس نکشود و نکشاید بحکمت ایں معمہ را''

اگر اس وقت میں سردی بھی لگ جائے تو کیا غم ہے

''یہ فتنہ آدمی کی خانہ ویرانی کو کیا کم ہے''

جو رک جائے رواں کیوں ہو جو بڑھیا ہے جواں کیوں ہو

''ہوئی یہ دوست جن کی دشمن ان کا آسماں کیوں ہو''

براتی کھینچتے یہ جائداد آتے ہیں شہروں میں

جو رستہ چند گھڑیوں کا ہے وہ کٹتا ہے پہروں میں

ذرا سے ایک پنکچر سے بگڑتا ہے سنگھار اس کا

ہوا پر جس کی ہستی ہو بھلا کیا اعتبار اس کا

غبار اور گرد کا اور تیل کی بو کا خزینہ ہے

یہ موٹر کار اور ''گڈے'' کی اولاد نرینہ ہے

ملی گڈے سے رعنائی و زیبائی وراثت میں

خر دجال سے ملتی ہے صورت میں ملاحت میں

سماتے ہیں پھر اس میں ٹھس کے یوں بے لطف و آسائش

نہیں رہتی ہے نالوں کے نکلنے کی بھی گنجائش

بسوں کی چھت پہ لد کر دودھ کے برتن جو آتے ہیں

سروں پر شیر کا باران رحمت وہ گراتے ہیں

وہ ناداں ہیں جو اس بارش پہ ناک اور بھوں چڑھاتے ہیں

صلے میں سخت جانی کے یہ جوئے شیر پاتے ہیں

پڑا ہوگا بسوں میں آپ کو ایسوں سے بھی پالا

اٹھی کھجلی تو اپنے ساتھ ساتھی کو کھجا ڈالا