دنیا میں کونسا ایسا کھیل ہے جہاں صرف 3 ممالک کھیلیں گریم اسمتھ

کیپ ٹائون(اُردو پوائنٹ اخبارتازہ ترین - آن لائن۔ 08 جنوری2025ء)جنوبی افریقا کے سابق کپتان گریم اسمتھ نے ٹو ڈویژن ٹیسٹ کرکٹ کی مخالفت کر دی۔اس حوالے سے گریم اسمتھ نے کہا ہے کہ کیا آپ ایسی دنیا دیکھ سکتے ہیں جہاں صرف 3 ممالک ٹیسٹ کرکٹ کھیلیں۔انہوں نے کہا کہ میں نے نوٹ کیا ہے کہ انگلینڈ، بھارت اور آسٹریلیا ایک دوسرے سے اگلے سرکل میں کتنا کھیل رہے ہیں، یہ دوسرے ممالک کے لیے بہت مشکل ہے۔

یہ شاید بھارت کے لیے تو بہترین ہے کیونکہ دوسرے ممالک اس کو مالی طور پر اچھا سمجھتے ہیں، دنیا میں کونسا ایسا کھیل ہے جہاں صرف 3 ممالک آپس میں کھیلتے ہیں آئی سی سی کیسے ایسا اسٹرکچر بنا سکتی ہے جو صرف ٹاپ تھری کے لیے اچھا ہو، ورلڈ کرکٹ کو ضرورت ہے کہ جنوبی افریقا، ویسٹ انڈیز مضبوط ہوں اور سری لنکا بہتر ہو، جنوبی افریقا کی ٹیم ورلڈ ٹیسٹ چیمپئن شپ کے فائنل میں ہے، یہی چیز ہمارے لیے اہم ہے۔

(جاری ہے)

دوسری جانب ویسٹ انڈیز کے سابق کپتان کلائیو لائیڈ نے بھی دو رویہ ٹیسٹ کرکٹ کو غیر متاثر کن قرار دے دیا۔انہوں نے کہا کہ دو رویہ ٹیسٹ کرکٹ غیر متاثر کن آئیڈیا ہے، جن ممالک نے ٹیسٹ اسٹیٹس کے لیے سخت محنت کی ان کے لیے یہ خوفناک بات ہے۔واضح رہے کہ دو رویہ ٹیسٹ کرکٹ کو متعارف کرانے کے حوالے سے چند روز قبل تجاویز کو رپورٹ کیا گیا تھا۔