Willem van Saeftinghe

Guldnspoornslag deur Nicaise de Keyser: Willem van Saeftinghe sleurt Robert van Artois van zyn peird

Willem van Saeftinghe was een leeknbroeder van de Cisterciënzerabdy van Ter Doest.

Je wierd ie beroemd binst de Guldnspoornslag omdat ie den deen was die Robert II van Artois, den anvoerder van de Fransche, van ze pêêrd sleurdige, zodanig dan d'andre em kostn dôod sloan. Je zoud ie ook vele Fransche ridders een koptje klinder gemakt ên binst die slag.

Nen braven ist ie noois nie gewist, wan in 1308 vermôorddet ie de keldrmèèster en kwetste t'y den abt van z'n abdy, in een deur em geleidn ipstand van de leeknbroeders, omda den abt beslootn aad vo de boerderyen van d'abdy te verpachtn, woadeure dan de leeknbroeders under werk zoun verliezn. Achter de môord moest Willem em verschansn in de kerketorre van Lissewege vo de volgeliengn van den abt. Moa van de moment da da nieuws in Brugge bekend wierd, trokkn een zeune van Pieter de Coninck en Jan Breydel t'ope me 80 andre Bruggeliengn ip vor em t'oentzettn. Je wierd deur den Paus Clemang V in de ban van de kerke gesleegn. In 1309 wierdn zyn misdoadn vergeevn, moa wierd y verplicht in te treên by d'ospitolridders en dermee op kruustocht te goan. Je zoud ie gesneuveld zyn by't beleg van Rhodos.

Z'n bronzn standbild, gemakt deur Jef Claerhout, stot sins 1988 in Lissewege ip de markt. Der wierd deur Frédéric Devreese een opera geschreevn over Willem van Saeftinghe womee dat ie den Italia-prys gewounn eet.