Talbot House
- Dit artikel es geschreevn in 't Poperiengs, en da zou best ozô bluuvn.
Talbot House is e vroeger opvangcentrum in Poperienge voe g'allieerde soldoatn bistn 'n Êestn Weireldôorlog. Nu is 't e museum.
"Tubby" Clayton
[bewerkn | brontekst bewerken]
In '14-'18 legt Poperienge te middn in 't froent, moa 't is nôois bezet erocht deur de Duutsche. D'Iengelsche en d'r een oofdkwartier van emakt. Op 't oogtepunt zyn d'r ier 250.000 soldoatn ekazerneerd. Op 11 december 1915 is 't er een Iengelschn aalmoezenier, Philip Clayton, die d'r e soldoatnuus installeert. Omda Clayton nogol wel te passe wos, noemde ze nem Tubby (wuk da tunnetje wilt zeggn in 't Iengels). Tubby Clayton wos oek ni onnôzel: e wos e paster, en e wilde de joege soldoatn die - a ze ni moestn vichtn - vele tyd over addn voe de joenge moksjes van Poperienge, of de mèsjes van plezier, e deugdelikke vorme van ontspannieng geevn. In Talbot House wos 't er gèn verschil tusschen e geweun soldoat en pakweg e generoal. Olleman wos 't er gelik voe de wet.
Achter 'n ôorlog, in 1929, kochte Lord Wakefield van Hythe 't Talbout House. E schoenk et in 1930 an de vzw Talbot House va Poperienge. Dat verkloart oek woarom da Poperienge officieel verbroederd is mè Hythe in Zuud-Iengeland.
Talbot & Toc H
[bewerkn | brontekst bewerken]De noame Talbot House komt van Gilbert Talbot, e joegn soldoat die sneuvelde in 1915. Gilbert Talbot wos de joegern broere van Neville Talbot, die oofdaalmoezenier wos in 't leger. Gilbert Talbot stoeg eigentlik symbool voer ol de joenge gastn die dôod egoan woarn in deezn ôorlog.
Talbot House noemn ze oek wel Toc H (Poperienknoars spreekn dat uut lik tok ietsj). Toc H is de telegrafische code voe de begunletters van Talbot House. Loater van tyd kwaam 't oek de noame van e bewegieng die hêel de moatschappy dichter by makoar wil briengn - wuk da nunder ofkomste, geloof of ras oek is.
|
Ofbeeldiengn die ier by passn ku je vien in de categorie Talbot House van Wikimedia Commons. |