Imatr

Imatr
Imatra
	Lidnanznam;
Valdkund	Suomenma
Eläjiden lugu (2024)	24,810 ristitud
Pind	191,28 km²
Pämez'	Matias Hil'den; (sulaku 2022—,; Matias Hilden)
Telefonkod	+358-
Aigvö	tal'vel UTC+2,; kezal UTC+3

Imatr (suom.: Imatra, mugažo ročin kelel) om lidn da lidnankund Suomenman suvipäivnouzmas, Suvikarjal-agjas. Se om valdkundan 40nz' lidn eläjiden lugun mödhe.

Istorii

Eländpunktan aluz om pandud vl 1948. Anttihe kundale lidnan statusad vl 1971.

Imatr šingotase cellülozbumagaižel tegimištol («Stora Enso»), metallurgijan tegimel («Ovako Bar Oy»-kompanii), kahtel GES:al, lebuturizmal i torguindal röunpäličmänendtahonno. Jogapäiväline avtobusühtenzoituz om olmas Piterinke vspäi 2012.

Geografijan andmused

Lidn sijadase agjan keskuzpalan suves, Karjalan kaglhan pohjoižes, Vuoks-jogen randoil (suom.: Vuoksi, roč.: Vuoksen 143 km pitte, Ladogan järven ližajogi) i Saima-järven (suom.: Saimaa, roč.: Saimen 4400 km², 76 m ü.m.t.) päivnouzmaižen randan čogas.

Matkad Venäman röunhasai om kuz' kilometrad suvipäivnouzmha, agjan Lapenrand-keskushesai om 33 km päivlaskmha-suvipäivlaskmha orhal vai 35 km teidme, Hel'sinkihesai om 236 km päivlaskmha-suvipäivlaskmha orhal, 256 km avtotedme vai raudtedme. Lähembaine lidn om Svetogorsk (Venäman Leningradan agj) seičemes kilometras suvipäivnouzmha Imatran keskusespäi. «Lapenrand — Jogensu»-raudtekeskust i «Lapenrand — Jogensu»-avtote läbitadas lidnad.

Lidnankundan ühthine pind om 191,28 km², sidä kesken ma — 154,99 km², sokaz tahond — 36,29 km² (vn 2022 andmused).

Tobmuz

Imatran municipaline suim kogoneb 43 ezitajaspäi.

Edeližed lidnan pämehed oma Ari Lindemann (tal'vku 2021 — sulaku 2022), Kai Roslakka (kezaku 2018 — tal'vku 2021), Pertti Lintunen (heinku 2006 — 2017).

Eläjad

Vspäi 1980 kaikiš suremb kundan ristitišt oli 36 378 eläjad vl 1980. Vl 2000 lidnankundan eläjiden lugu oli 30 663 ristitud, vl 2010 — 28 540 ristitud, vl 2015 — 27 835 ristitud, vl 2020 — 26 509 ristitud.

Eläjad mamankelen mödhe (2016): suomen kel' — 94,1 %, ročin kel' — 0,2 %, toižed keled — 5,7 %.