Gannover

Gannover
Hannover
Lidnanznam;	Flag;
Valdkund	Saksanma
Eläjiden lugu (2023)	545,045 ristitud
Pind	204,01 km²
Pämez'	Belit Onai; (kül'mku 2019—,; Belit Onay)
Telefonkod	+49−511
Aigvö	tal'vel UTC+1,; kezal UTC+2

Gannover (saks.: Hannover [haˈnoːfɐ]) om Saksanman lidn valdkundan pohjoižpalan keskuses. Se om Alasaksonii-federacijanman administrativižeks keskuseks, sur' raudtesol'm Berlin — Amsterdam da Gamburg — Münhen raudteil.

Mail'man tegimišton jogavoččed jarmankad oleldas «Messegelände»-kompleksas: ozutesikš, Hannover Messe da CeBIT.

Istorii

10. voz'sadal saudihe ezmäižid pertid Am-Hoen-Ufer-randirdas (saks. Am Hohen Ufer), sišpäi lidnan nimi sündui. Eländpunkt mainitase ezmäižen kerdan vl 1150. Gannover sai lidnan oiktusid vl 1241.

Vl 1826 kävutaškanzihe pidatuzgazad irdoiden täht, ezmäižeks kontinentaližes Evropas. Vl 1843 raudte tuli lidnha. Vl 1887 Emil' Berlinger sädi ezmäšt grammofonad arni neciš lidnas. Vl 1902 ezmäine mail'mas ičelikui lämoipaloavto zavodi radod Gannoveras. Germanijan ezmäine konvejer oli saudud Bal'zen-kompanijan kontiterižes fabrikas vl 1905. Toižen mail'man sodan aigan lidn eli läbi 88 aviabombardiruindas, läz joga sauvuz oli muretud. Vn 2000 EXPO-ozutelend mäni Gannoveras.

Gannover šingotase Volkswagen-koncernan järedal tegimel i alusenpandud lidnha Continental AG-kompanijal (šinad, avtopalad), kulundladimiden Sennheiser-edheotandal, TUI AG-turoperatoral, Saksanman raudtel i DHL-kompanijan palakundal, medicinižil holitišil, varmitesen kompanijoil.

Geografijan andmused

Lidnan sijaduz federacijanmas i valdkundas vn 2004 kartal

Lidn sijadase Laine-jogen randoil. Gannoveran keskuzpala seižub 55 m ü.m.t. keskmäižel korktusel. Kaikiš korktemb čokkoim om Kronsberg-kukkaz (118 m).

Klimat om Atlantižen valdmeren pil'vekaz, tal'vel eriližešti. Voden keskmäine lämuz om +10,0 C°, kezakun-elokun +16,6..+18,7 C°, tal'vkun-uhokun +2,1..+3,0 C°. Ekstremumad oma −24,8 C° (viluku, uhoku) i +39,2 C° (heinku). Kezaaigan minimum om +0,3 C° (kezaku), tal'vaigan maksimum om +19,1 C° (uhoku). Ei voi panda halad kezakus-elokus. Paneb sadegid 627 mm vodes, läz tazomäras kuidme, enamba heinkus-elokus (65..68 mm kus), vähemba uhokus-sulakus (35..45 mm kus). Tal'vel paneb lunt 17 päiväd keskmäras, pordaigaližen lumikatken süvüz voib sadas vidhe santimetrhasai. Kun keskmäine relätivine nepsuz vajehtase 70..72 % röunoiš sulakus-elokus, 83..86 % redukus-vilukus.

Tobmuz

Gannover jagase koumetoštkümneks nimitadud administrativižeks rajonaks (saks.: Stadtbezirk), ned alajagasoiš 53 nimitadud fartalaks (Stadtteil). Kaik rahvaz valičeb lidnan suiman 64 ühtnijad videks vodeks. Sen ližaks kaikuččes lidnrajonas om ičeze suimid, valičesoiš videks vodeks mugažo.

Lidnan tobmuden pämez' i sen Administracijan pämez' om oberburgomistr (saks.: Oberbürgermeister der Hannover), valičese kaikel rahvahal kahesaks vodeks. Edeline lidnan pämez' om Štefan Šostok (Stefan Schostok, reduku 2013 — semendku 2019).

Eläjad

Vl 2013 kaik 518 098 ristitud elihe lidnas, vn 2019 lopus — 536 925 ristitud. Kaikiš suremb lidnan ristitišt oli 574 481 eläjad vl 1961. Läz 1,16 mln ristituid elädas lidnaglomeracijas (2019).

Religijan mödhe (2015): protestantad — 31,1 %, katolikad — 13,4 %, religijatomad i toižed uskojad — 55,5 %. Vl 2011 islamanuskojiden lugu oli 8,8 %.

Kaik seičeme professionaližen opendusen aluzkundad oma lidnas. Znamasine om Gannoveran universitet Leibnican nimed^[1] (alusenpanend 1831 kut politehnine škol, nügüdläine nimituz vspäi 1978, 27 tuh. üläopenikoid vl 2023), siš om ühesa fakul'tetad, 160 tedokeskust kahtenke tuhad tedomehid.

Transport

Kiruhtramvai (167 km ted, sidä kesken 20 km manalašt), avtobusad da raudte (saks. S-Bahn) oma kundaližeks transportaks lidnas.

Keskmäižgermanine kanal ühtenzoitab Laine- da Rein-jogid. Se om jügulaivoiden täht.

Rahahidenkeskeine civiline Gannover-lendimport^[2] (HAJ / EDDV, 4,6 mln passažiroid vl 2023) sijadase üks'toštkümnes kilometras pohjoižhe lidnan keskuzpalaspäi Langenhagen-ezilidnas. Sišpäi tehtas reisid Evropan, Azijan maihe da Saksanman südäimes, mugažo čarterreisid lebutahoiže.

Galerei

Lidnan tobmuden sauvuz (Uz' ratuš, 2013)
Uden lidnan Ph. Joannan jumalanpert', vn 2009 nägu (lüteranižuz, letihe vll 1666−1670)
Pühän Klementan bazilikjumalanpert', vn 2014 nägu (riman katoline, om saudud vll 1712−1718)
Hannover-mediakoncernan sauvuz (2014), ende Hannoverscher Anzeiger-pästandkodi. Saksanman Der Spiegel- (1947) i Stern- (1948) aiglehtesed oliba zavottüd siš
Saksanman tedon da tehnologijan nacionaline kirjišt (Gannoveran universitet, 2015)
Gannoveran operteatr (2012)
Rahvahidenkeskeine Gannover-lendimport vl 2017
Gannoveran päraudtestancii vl 2004

Homaičendad

↑ Gannoveran universitetan sait (uni-hannover.de). (saks.) (angl.)
↑ Rahvahidenkeskeižen Gannover-lendimportan sait (hannover-airport.de). (angl.) (saks.)

Irdkosketused

Lidnan ohjastusen oficialine portal (hannover.de). (saks.) (angl.) (fr.) (ven.) (est.) da tž.

Gannover Vikiaitas

	Saksanman federacijanmad da niiden administrativižed keskused
	Alasaksonii (Gannover) \| Baden-Vürtemberg (Štuttgart) \| Bavarii (Münhen) \| Berlin \| Brandenburg (Potsdam) \| Joudjaline Ganzejan Bremen-lidn (Bremen) \| Joudjaline da Ganzejan Gamburg-lidn \| Gessen (Visbaden) \| Meklenburg da Ezine Pomeranii (Šverin) \| Pohjoine Rein da Vestfalii (Düssel'dorf) \| Reinland-Pfal'c (Mainc) \| Saar (Saarbrükken) \| Saksonii (Drezden) \| Saksonii-Anhal't (Magdeburg) \| Šlezvig-Gol'štein (Kil') \| Türingii (Erfurt)

[1] Gannoveran universitetan sait (uni-hannover.de). (saks.) (angl.)

[2] Rahvahidenkeskeižen Gannover-lendimportan sait (hannover-airport.de). (angl.) (saks.)

[1]

[2]