Al'bukerke

Al'bukerke
Albuquerque
	Flag;
Valdkund	Amerikan Ühtenzoittud Valdkundad
Eläjiden lugu (2020)	564,559 ristitud
Pind	489,39 km²
Pämez'	Tim Keller; (tal'vku 2017—)
Telefonkod	+1−505, 575
Aigvö	tal'vel UTC−7,; kezal UTC−6

Al'bukerke (angl.: Albuquerque [ˈælbəkɜːrki], lühenduz: ABQ, ispanine virkand: [alβu'kerke]; navah.: Beeʼeldííl Dahsinil [pèːʔèltíːl tɑ̀xsɪ̀nɪ̀l]) om AÜV:oiden lidn Nju Meksiko-štatan keskuzpalan lodehes. Se om štatan kaikiš enamba elänzoittud lidn, AÜV:oiden 32-nz' lidn eläjiden lugun mödhe. Bernalijo-ümbrikon (Bernalillo, 3020 km²) administrativine keskuz.

Istorii

Eländpunktan aluz om pandud ispanijalaižil vl 1706 kuti sodapost da maižandusen keskuz, isp. Villa de Alburquerque. Nimituz om sidodud ispanižhe Al'burkerke-lidnha röunanno Portugalijanke, se libub latinan kelen albus- i quercus-sanoišpäi «vauged tamm».

Al'bukerke šingotase AÜV:oiden armijan Körtlend-il'mbazal (südäitukuižen azegišton toižiden paloiden kodvind) «Sandia»-tedoiduzlaboratorijoiden palanke. Lidn om štatan opendusen i tervhudenkaičendan aluzkundoiden keskuz, «Netflix»-kompanijan fil'mdamižen sija. «Facebook»-verkon datakeskuz i Intel-kompanijan tegimed ratas lähižiš ezilidnoiš.

Geografijan andmused

Lidn sijadase Rio Grande-jogen randoil, 1490..1950 m korktusil, 1619 m ü.m.t. keskmäižel korktusel. Ühthine pind om 489,39 km², sidä kesken kuivma 486,03 km², vezi 4,35 km². Matkad štatan administrativižhe Santa Fe-keskushesai om 93 km pohjoižhe orhal vai 102 km avtotedme.

Klimat om letetazangišton kuiv nell'sezonine, päivoikaz, kezal eriližešti. Voden keskmäine lämuz om +14,4 C°, kezakun-elokun +24,5..+26,1 C°, tal'vkun-uhokun +2,7..+5,5 C°. Absolütine minimum om −27 C° (tal'vku, viluku), maksimum +42 C° (kezaku). Kezaaigan minimum om +2 C° (kezaku), tal'vaigan maksimum om +26 C° (uhoku). Ei voi panda halad kezakus-elokus vaiše. Il'man lämuz voib ületada +31 C° sulakus-redukus. Paneb sadegid 225 mm vodes, enamba heinkus-sügüz'kus (29..42 mm kus), 22 mm redukus, vähemba kül'mkus-kezakus (9..14 mm kus). Paneb 20 sm lunt tal'ven kahesas päiväs. Kun keskmäine relätivine nepsuz vajehtase 30..32 % röunoiš sulakus-kezakus, 50..57 % kül'mkus-uhokus, 40..47 % toižiš kuiš.

Tobmuz

Al'bukerke jagase ühesaks valičemižümbrikoks (angl.: City council districts).

Lidnan radonoigendajan tobmuden pämez' om mer (angl.: Mayor of Albuquerque). Kaik eläjad valitas merad nelläks vodeks, strokuiden lugu ei ole röunatud. Edeline mer om Ričard Džeims Berri (Richard James Berry, tal'vku 2009 — tal'vku 2017).

Eläjad

Vn 2010 AÜV:oiden rahvahanlugemižen mödhe lidnan eläjiden lugu oli 545 852 ristitud, vn 2020 — 564 559 ristitud. Kaikiš suremb lidnan ristitišt om nügüd'. Kaik 915 927 eläjad om ezilidnoidenke 24 080 km² pindal (2018, štatan ühtenz' i 60. sija valdkundas).

Augotižlibundan mödhe (2010): evropalaižed — 69,7 % (ispanijalaižita 42,1 %), ispanijalaižed i latinamerikalaižed — 46,7 %, indejalaižed — 4,6 %, afroamerikalaižed — 3,3 %, azijalaižed — 2,6 %, valdmerimalaižed — 0,1 %, segoitadud augotižlibundanke — vastusiden 4,6 %^[1].

Lidn om štatan üläopendusen keskuz. Severz'-se universitetoid baziruišoiš siš, om toižiden lidnoiden üläopendusen aluzkundoiden filialoid (Finiks). Znamasine om štatan kaikiš suremb valdkudaline Nju Meksikon universitet^[2] (angl.: University of New Mexico, isp.: Universidad de Nuevo México), sen aluz om pandud vl 1889, 22,6 tuh. üläopenikoid (2023).

Transport

Avtobusad, kiruhavtobusad i ezilidnjonused oma kundaližeks transportaks lidnas da sen ümbrištos. Massižen tranzitan municipaline ABQ RIDE-kompanii nimitihe SunTran:aks edel 2004. vot. Kaik kuz' avtotesildad om saudud lidnas Rio Grandes päliči, sen ližaks kaks' oma lähižes suvižes ezilidnas. Enamba mi 600 km veloteid, velotehuzid i velomaršrutoid (2019).

Al'bukerken rahvahidenkeskeine soda- da civiline Sanport-lendimport^[3] (angl.: Albuquerque International Sunport, ABQ / KABQ, 5,5 mln passažiroid vl 2024) sijadase vides kilometras suvipäivnouzmha lidnan azjaližes keskusespäi, Körtlend-il'mbaz om ani päivnouzmha sišpäi. Tehtas reisid AÜV:oiden järedoihe lidnoihe i lähižiden štatoiden lidnoihe. Kahtenz' Dabl Igl II-lendimport (angl. Double Eagle II Airport) om saudud üks'toštkümnes kilometras lodeheze lidnan keskuzpalaspäi, se kävutase specialižen aviacijan i čarterreisiden täht.

Galerei

Lidnan tobmuden sauvuz (2009, Albuquerque City Hall)
Nju Meksikon universitetan läzundkodi (2010)
Rahvahidenkeskeižen Sanport-lendimportan terminal vl 2017

Homaičendad

Irdkosketused

Lidnan oficialine sait (cabq.gov). (angl.) (+ äikel'ne avtomatine känduz)

Al'bukerke Vikiaitas

	AÜV:oiden järedad lidnad
	Enamba 3 mln. eläjid	Los Andželes \| Nju Jork
	1—3 mln. eläjid	Čikago \| Dallas \| Filadel'fii \| Finiks \| Hjuston \| San Antonio \| San Diego \| San Hose
	750 tuh. eläjid — 1 mln.	Džeksonvill \| Fort Uert \| Indianapolis \| Kolumbus \| Ostin \| San Francisko \| Šarlott
	Enamba 500 tuh. eläjid	Al'bukerke \| Baltimor \| Boston \| Denver \| Detroit \| El' Paso \| Fresno \| Las Vegas \| Luisvill \| Memfis \| Miluoki \| Našvill \| Oklahoma Siti \| Portlend \| Sakramento \| Sietl \| Tuson \| Vašington

[1] State & County QuickFacts: Albuquerque (city), New Mexico (Heredad faktad štatas da ümbrikos). // U.S. Census Bureau (quickfacts.census.gov), vn 2010 AÜV:oiden rahvahanlugemižen büron andmused web.archive.org-arhivas. (angl.)

[2] Nju Meksikon universitetan sait (unm.edu). (angl.)

[3] Al'bukerken rahvahidenkeskeižen Sanport-lendimportan sait (abqsunport.com). (angl.)

[1]

[2]

[3]