جوزیف ہائیڈن

جوزیف ہائیڈن
(جرمنی میں: Joseph Haydn)
معلومات شخصیت
پیدائش	31 مارچ 1732ء
وفات	31 مئی 1809ء (77 سال)  ویانا
شہریت	آسٹریائی آرچڈچی مقدس رومی سلطنت
فنکارانہ زندگی
نوع	مغربی موسیقی
آلہ موسیقی	ارگن ،  پیانو
نمایاں شاگرد	ماریانا مارٹینیس ،  لڈوگ بیتھوون
پیشہ	نغمہ ساز ،  کنڈکٹر ،  ماہر موسیقیات ،  پیانو نواز
پیشہ ورانہ زبان	المانی جرمن ،  جرمن
شعبۂ عمل	پرفارمنگ آرٹس ،  مغربی موسیقی ،  کلاسیک دور ،  اوپرا ،  ہم نوائی
دستخط
ویب سائٹ
	IMDB پر صفحہ

جوزیف ہائیڈن آسٹریا کے شہرہ آفاق موسیقار تھا۔ اکتیس مارچ سنہ 1732ء کو آئیزن شٹٹ سے کوئی پچاس کلومیٹر دور ایک چھوٹے سے گاؤں روہرآؤ میں ان کی پیدائش ہوئی۔ جوزیف ہائیڈن اپنے بارہ بہن بھائیوں میں سے ایک تھے اور انھوں نے ایک سادہ سے گھرانے میں پرورش پائی۔ اُن کے والد بگھیاں بناتے تھے، پنچایت کے سربراہ بھی تھے اور فوک موسیقی کے دلدادہ تھے۔ اسکول کے ڈائریکٹر نے چھ سالہ ہائیڈن کی گانے کی صلاحیت پہچان لی اور بطور گلوکار تربیت دینے کے لیے انھیں اپنی نگرانی میں لے لیا۔

موسیقی

ہائیڈن آٹھ سال کے ہوئے تو ویانا کے اُس دَور کے دربار سے وابستہ موسیقار ژوہان گیورگ رَوئیٹرز انھیں اپنے ساتھ لے گئے اور اپنے گلوکار لڑکوں کے گروپ میں شامل کر لیا۔ جب ہائیڈن نوعمری سے نکلے اور اُن کی آواز بدلی تو انھیں گروپ سے نکال دیا گیا۔ تب پہلے تو وہ مختلف آرکسٹراز کے ساتھ وابستہ رہے، آرگن پلیئر بن گئے اور موسیقی کے اسباق دینے لگے۔ بالآخر وہ اُس دَور کے مشہور موسیقار نکولا پورپورا کے شاگرد بن گئے۔ ہائیڈن ہمیشہ کہا کرتے تھے کہ موسیقی کے بنیادی اَسرار و رموز انھوں نے اپنے اِسی اُستاد سے سیکھے تھے۔

شہرت

وقت کے ساتھ ساتھ ہائیڈن کے روابط بڑھتے گئے۔ طبقہء امرا سے تعلق رکھنے والے اپنے ایک واقف کار جوزیف فرائی ہَیر فان فیورن بیرگ کی دعوت پر نوجوان ہائیڈن اُن کے محل میں گئے۔ وہاں انھوں نے اپنے اِس واقف کار اور موسیقی میں دلچسپی رکھنے والے اُن کے تین دوستوں کے لیے موسیقی کمپوز کرتے ہوئے اپنا پہلا سٹرنگ کوارٹیٹ لکھا۔ یوں اٹھارویں صدی کی اُس مرکزی اور نئی صنف کی پیدائش ہوئی، جس نے ہائیڈن کو ایک نئی مقبولیت بخشی۔1761ء میں ہائیڈن اُنتیس برس کے تھے، جب گراف پاؤل انٹون ایست رہازی انھیں اپنے ساتھ آئزن شٹٹ لے گئے۔ اگلے تیس برس انھوں نے اِسی گراف کی سرپرستی میں موسیقی تخلیق کرتے گزار دئے۔ کلاسیکی موسیقی کے بڑے بڑے مراکز سے دور رہ کر انھوں نے ہر صنفِ موسیقی میں نت نئے تجربات کیے۔ اگرچہ انھیں بابائے سٹرنگ کوارٹیٹ اور بابائے سمفنی کہا جاتا ہے لیکن اپنے سرپرست گراف ایست رہازی کی پسند کو پیشِ نظر رکھتے ہوئے انھوں نے بہت سے اوپیراز بھی کمپوز کیے۔ ’’اورلاندو پاراڈینو‘‘ اُن آخری اوپیراز میں سے ایک ہے، جو ہائیڈن نے کمپوز کیے۔ یہ اوپیرا اُن کا سب سے کامیاب اوپیرا ہے۔

انگلینڈ آمد

گراف ایست رہازی کے انتقال کے بعد ہائیڈن ویانا چلے آئے اور دسمبر سنہ 1790ء ہی میں انگلینڈ کے پہلے سفر پر روانہ ہو گئے۔ بعد ازاں وہ کئی بار انگلینڈ گئے، وہاں بے انتہا کامیابی حاصل کی، بہت زیادہ پیسہ جمع کیا اور کئی نئے تجربات حاصل کیے۔

شاہکار

1799ء میں آسٹریا کے شہنشاہ کی موجودگی میں اُن کا شاہکار Schöpfung یعنی ’’تخلیق‘‘ پہلی بار باقاعدہ طور پر پیش کیا گیا اور اُسے ناقابل بیان کامیابی ملی۔ اُنیس ویں صدی کے اوائل میں وہ زیادہ تر اپنے گھر تک محدود ہو کر رہ گئے اور بالآخر اکتیس مئی 1809ء کو 77 برس کی عمر میں انتقال کیا۔