Agiudu:Ditzionàrios de sa limba sarda

In ìnternet si podent agatare medas ditzionàrios de sa limba sarda, siat interativos chi in PDF, chi podent èssere unu discansu mannu pro chie cheret iscrìere in sardu, in Wikipedia e foras de inoghe. Custa pàgina at a èssere un'elencu de totu sos chi sunt disponìbiles como. Chie s'abbìgiat chi nde mancat calicunu lu podet annànghere a sa categoria sua.

Ditzionàrios consultàbiles

Antoninu Rubattu - "Dizionario Universale della Lingua di Sardegna": unu de sos ditzionàrios prus mannos disponìbiles finas a custu momentu. Tenet sa tradutzione de sas paràulas in chimbe limbas (italianu, inglesu, frantzesu, ispagnolu e tedescu). Lu podes iscarrigare, in duos documentos PDF consultàbiles, dae sa Sardegna Digital Library (Vol. 1 e Vol. 2).
Antoninu Rubattu - "Il dizionario degli esseri viventi": ditzionàriu setoriale de sos èsseres viventes de su mundu, cun tradutziones in chimbe limbas (italianu, inglesu, frantzesu, ispagnolu e tedescu). Lu podes iscarrigare a cantzos in documentos PDF consultàbiles (Botànica a-p, Botànica p-z, Itiologia, Ornitologia, Zoologia).
Mario Puddu - "Ditzionàriu de sa limba e de sa cultura sarda": unu ditzionàriu de 22.100 paràulas cun fràsias, ditzos e tradutzione in chimbe limbas. Si podet pompiare in ìnternet de badas o comporare in paperi.
Diegu Corràine - "Ditzionàriu in lìnea de su Tempus Nostru": unu ditzionàriu genèricu e setoriale in ue chircare e agatare paràulas in LSC, italianu e variantes locales.
Pedru Casu - "Vocabolario Sardo Logudorese - Italiano": ditzionàriu de su 1947, cun bortaduras in italianu ebbia.

Luigi Farina - "Bocabolariu sardu nugoresu - italianu": ditzionàriu cun bortaduras in italianu ebbia.
Vincenzo Raimondo Porru - "Nou dizionariu universali Sardu - Italianu" (Vol. 1, Vol. 2 e Vol. 3): ditzionàriu cun paràulas in grafia campidanesa e bortaduras in italianu ebbia.

Regione Autònoma de sa Sardigna - "Glossàriu Isperimentale": unu glossàriu isperimentale in PDF cunforma a sas normas de referèntzia de sa LSC a caràtere isperimentale pro sa limba sarda iscrita, in essida, de s’Amministratzione regionale.
Steinhäuser Verlag - GigaSardinian Words: unu vocabulàriu cun paràulas in grafia campidanesa e bortaduras in inglesu, tedescu, frantzesu e ispagnolu.
Gonario Carta Brocca - "Vocabolariu durgalesu-italianu": vocabulàriu cun tradutziones in italianu ebbia.
vdru - "English Sardinian Dictionary": un'aplicatzione pro Android cun unu ditzionàriu sardu-inglesu/inglesu-sardu chi podet èssere iscarrigada de badas dae APKPure (còpia inoghe)
Ditzionàriu Visualė Sardu - Progetu chi impreat is immàgines pro frunire unu ditzionàriu sardu modernu, universale e lestru de consultare.
Antonio Fanari (a incuru de) - Asuni: il dizionario Italiano - Sardo asunese - Ditzionàriu italianu-sardu basadu a pitzus de sa faeddada de Asuni.
Raffaele Ballore (a incuru de) - Sa limba mamujadina: grammàtica e paràgulas - Ditzionàriu sardu-italianu de sa faeddada de Mamujada cun unos cantos liniamentos de grammàtica.
Gianfranco Pintore - Glossàriu sardu - italianu - Atentu: si podet navigare in su glossàriu mudende sa lìtera chi ses castiende dae s'URL. Pone in logu de sa lìtera chi ses boghende un'àtera lìtera minoredda (non manna!), comente a, f, z o su tz (casu ùnicu de duas lìteras). S'acàpiu cumintzat cun sa lìtera a ("...20zogu/a").

Ditzionàrios in PDF non consultàbiles (chene OCR)

Giovanni Spano - "Vocabolario sardo geografico patronimico ed etimologico": vocabulàriu istòricu de Spano de su 1872, pigadu dae sa Sardegna Digital Library (ischeda de s'òpera).
Valentino Martelli - "Vocabolario logudorese-campidanese - italiano": ditzionàriu istòricu pigadu dae sa Sardegna Digital Library (ischeda de s'òpera).
Vissentu Porru - "Dizionariu sardu-italianu": ditzionàriu istòricu de su 1866 pigadu dae sa Sardegna Digital Library (ischeda de s'òpera).
Emilio Atzeni - "Vocabolario domestico sardo-italiano e prontuario italiano-sardo : la casa, le masserizie, ecc.": ditzionàriu setoriale istòricu de su 1912 pigadu dae sa Sardegna Digital Library (ischeda de s'òpera).
Vincenzo Raimondo Porru - "Nou dizionariu universali sardu-italianu": ditzionàriu istòricu de su 1832 pigadu dae sa Sardegna Digital Library (ischeda de s'òpera).
Giovanni Mura - "Fueddus e chistionis in sardu e italianu : dizionario fraseologico di sardo campidanese-italiano": ditzionàriu de su 1999 pigadu dae sa Sardegna Digital Library (ischeda de s'òpera).

Artìculos ligados