В року 1142 на том мѣстѣ быв основаный цистерцианскый монастырь Седлец. В XII. ст. монахы объявили в его околици найдища стрѣбра, а около року1260 територию зачали заселяти нѣмецкы колонисты. Под нѣмецков назвов Куттенберг, нѣм.Kuttenberg первый раз ся город споминать в року 1289.
Около року 1300 краль Вацлав II. дав городу право бити грошѣ. Кутна Гора стала ся другым найвызнамнѣйшым городом Чехии по Празѣ. Стрѣберный пражскый грош ту били до року 1547. Кральовска ковалня пѣнязи была частьов тутешной кральовской резиденции, што ся звала Влашскый двор (Талианскый двор). В року 1471 ту быв корунованый чешскый краль Владислав II. В городѣ ся сформовала версть нѣмецкого патрициата и наростали звады меджи нев и околичным чешскым обывательством, пак гуситскы войны и Тридцятьрочна война поклали конець просперитѣ Кутной Горы. Право бити грошѣ было одняте в року 1727, а в конци XVIII. ст. стрѣберны копалнѣ пришли в запущ и были зохаблены.[2][3] В року 1874 долованя стрѣбра было обновлене на векшых глубинах, перед тым недоступных. В року 1900 Кутна Гора зоставала великым промысловым центром: двѣ цукроварнѣ, пивоварня, три парны млины, 13 водны млины, одливарня, выроба оцту, ликерох, содовой воды, текстилох, скор, машин, бицикльох, двѣ печатнѣ, литография, великый круговый пец на циглы, понад 250 розличных ремеселных и торговых промыслох; вывинуте зеленинарство и загородництво, ориентоване на вывоз.[1]
В сучасности Кутна Гора — великый туристичный центер з препышнов катедралов Св. Барборы, Влашскым двором, де теперь музей монет, катедралов Успѣня Пр. Богородицѣ в Седлецѣ и костелом Св. Якуба. Тота колекция памятникох XIII.–XIV. ст. в центрѣ города была занесена в число объектох Свѣтовой дѣдовизны UNESCO в року 1995.[2][3]
Катедрала Св. Барборы
Влашскый двор
Костел Св. Якуба
