Frank Martinus Arion

E artíkulo aki ta skirbí na papiamentu. Lo ta apresiá si por mantené e artíkulo aki na estilo di papiamentu.

Frank Martinus Arion
Informashon básiko
Nòmber kompleto	Frank Efraim Martinus
Nasementu	17 desèmber 1936
Fayesimentu	28 sèptèmber 2015 Kòrsou
Edukashon
Alma mater	Universidat di Leiden
Informashon profeshonal
Ofishi	eskritor, poeta, Suriname studies researcher, prose writer, linguist
Disiplina	prose, poesia, Papiamentu, lingwístika
Lugá di ofishi	Kòrsou
Obra
Lenga literario	Papiamentu
Obra notabel	Dubbelspel
Famia
Kasá	Trudi Guda
Otro informashon
Distinshon	Kabayero den Orden di Oranje-Nassau (1992), Premio Cola Debrot (2001)
Imágennan riba Wikimedia Commons
dbnl-profil
[Editá Wikidata] · [Manual]

Frank Martinus Arion, tambe konosí komo Frank Efraim Martinus, (☆ 17 di desèmber 1936 na Kòrsou - † 28 di sèptèmber 2015 na Otrobanda) tabata un eskritor, poeta i lingwista antiano. E tabata skirbi obranan tantu na idioma hulandes komo na idioma Papiamentu. Su obra mas famoso ta e novela Dubbelspel (Changá). E ta konosí tambe pa su investigashon di e orígen di Papiamentu i pa su empeño pa uso di Papiamentu komo idioma di instrukshon.

Biografia

Frank Martinus Arion a nase na 1936 i tabata un di tres yu di Minuel Martinus Arion i Marina Jansen di bario di Buena Vista, Willemstad. Poko despues di su nasementu e famia ta muda pa Aruba, unda su tata a wòrdu empleá pa e refineria Lago. Ku kuater aña su mama i un ruman ta fayesé den un aksidente di tráfiko, despues di kual e ku su otro ruman a wòrdu mandá bek Kòrsou i alohá serka varios miembro di famia. Frank Martinus Arion a lanta den bario di Otrobanda. Su talento pa skirbimentu a manifesta fo'i skol basiko; den su último aña di skol básiko e ta gana e Premio Neerlandia pa e mihor ensayo na hulandes. Durante su tempu na skol e ta kuminsa usa e nòmber Frank Efraim Martinus pa motibu di e laso ku su tata tabatin ku e partido polítiko PNP. E no tabata deseá di wòrdu asosiá ku e aktivismo polítiko di su tata; te añanan 50 e ta usa su fam original pa publikashon di su promé obranan.

Na kabamentu di skol sekundario na 1955, Arion ta muda pa Hulanda unda e ta studia idioma i literatura hulandes na Universidat di Leiden. Durante su temporada na universidat ela lanta e komunidat studiantil "Baranka Antilliana", kual tabata fungi komo refugio pa studiante prosedente di Antias Hulandes, manera e mes. Tambe den e époka aki e tabata skirbi un seri di poema, kualnan a sali publiká na 1957 pa promé bes den e revista "Antilliaanse Cahiers" komo kolekshon titulá Stemmen uit Afrika.

Den añanan 1960 el a regresá su isla kaminda e tabata duna charlanan na Radio Nederland Wereldomroep (RNW) tokante Antia. Dies aña despues, Arion ta dicidi di kompletá su estudio i ta regresa Hulanda. Durante e periodo aki, dosentenan hulandes di Leiden a balor'e komo un bon studiante i kolega, i sigur e no tabata isolá. Despues di su estudio el a disidí di komprometé su mes na trese antiano na Hulanda huntu. El a funda vários klup i asosiashon pa antiano. Tambe el a kuminsá traha riba Dubbelspel, su promé novela real. E buki tabata un éksito inmediato despues di su publikashon na 1973. El a hasta gana e Premio Van der Hoogt p’e. El a duna e placa cu el a gana na un organisashcon kontra apartheid na Sur Afrika. Apartheid tabata algu ku Arion por a preokupá kuné enormemente.

Na 1975 el a duna les na Instituto pa Formacion di Maestro na Paramaribo, unda tambe el a konosé su kasa, e antropologo i poeta kultural sürnameño Trudi Guda. Nan tabatin un yu muhé. Despues di e golpi militar, e famia a regresa Kòrsou, unda Arion por a enfoká finalmente riba e trabou ku tabata fasiné: e standardisashon di e idioma papiamentu. Ademas, el a hasi investigashon riba Gueni, un idioma di katibu papiá na Kòrsou ku por a sirbi komo un lingua franca pa desaroyo di papiamentu. Finalmente el a lanta su propio partido polítiko Kambio Rapido pa protehá e idioma aki pa futuro. Na aña 1996 el a ricibi su PhD na Universidat di Amsterdam ku su tesis tokante e origen di papiamentu, titulá The Kiss of a Slave. Papiamentu's West-African Connections (E sunchi di un esklabo. Lasonan di West Afrika ku papiamentu).

Arion a kampaña pa un monumento di sklabitut wòrdu lanta na Amsterdam. El a kontribuí na e buki Het verleden onder ogen. Herdenking van de slavernij, bou redakshon di Gert Oostindie, ku a wòrdu publiká na 1999, i e mesun aña a ofresé e buki, akompañá pa un karta habri, na Roger van Boxtel, presidente di e komision di Tweede Kamer ku “a skucha e argumentonan di e delegadonan for di e 6 isla i Sürnam durante un diskusion di mesa rondo ku e komision aki”. E Monumento Nashonal di Pasado di Sklabitut a wòrdu desvelá den Oosterpark (Amsterdam) dia 1 di yüli 2002, na Ketikoti.

Frank Martinus Arion a fayesé na 2015 na e edat di 78 aña den Sint-Elisabeth Hospital na Otrobanda.

Honor

Na 1992, Frank Martinus a wòrdu kondekora komo Kabayero (ridder) den Orden di Oranje-Nassau. Na desèmber 2008, el a anunsiá ku e ke debolbé su medaya na estado di Hulanda, pasobra e ta kere ku Hulanda ta rekolonisá Antia dor di akoplá e restrukturashon di debenan antiano na mas kòntròl hudisial.

Na 2001 el a risibi e Premio Cola Debrot., Na 2003 el a risibí e Tapushi di oro.

Durante Curaçao International Film Festival Rotterdam na 2014 a estrená e dokumentario di Cindy Kerseborn, titulá "Yu di Korsou", tokante e bida di Martinus Arion.

Obra

• 1957 - Stemmen uit Afrika (poesia)
• 1972 - Bibliografie van het Papiamentu
• 1973 - Dubbelspel
• 1974 - Sisyphiliaans alpinisme tegen miten
• 1975 - Afscheid van de koningin
• 1977 - Albert Helman, de eenzame jager
• 1979 - Nobele wilden
• 1993 - De ibismensmuis
• 1995 - De laatste vrijheid
• 1996 - The Kiss of a Slave. Papiamentu's West-African Connections (tesis doktoral)
• 2001 - De eeuwige hond
• 2005 - Eén ding is droevig
• 2006 - De deserteurs
• 2006 - Drie romans (kontiniendo: Afscheid van de koningin; Nobele wilden; De laatste vrijheid)
• 2009 - Intimiteiten van het schrijven (ensayo)
• 2013 - Heimwee en de ruïne

Mira tambe

• Gueni
• Lista di papiamentista
• Literatura hubenil di Karibe Hulandes
• Double Play

Referensia

• E artíkulo aki òf un vershon anterior di dje ta un tradukshon di e artíkulo Frank Martinus Arion riba e Wikipedia aleman, ku ta kai bao di e lisensia Creative Commons Attribution/Share Alike. Mira e historia di edishon einan.

Lista di fuente

• Maritza Coomans-Eustatia, Henny Coomans, Wim Rutgers: Drie Curaçaose schrijvers in veelvoud – Boeli van Leeuwen, Tip Marugg, Frank Martinus Arion, Walburg Pers, Zutphen (1991), ISBN 978-90-6011-758-3, pág. 405–410.
• Wim Rutgers: Schrijven is zilver, spreken is goud: Oratuur, auratuur en literatuur van de Nederlandse Antillen en Aruba, Universitätsverlag Utrecht, Utrecht 1994, ISBN 99904-921-0-7, pág. 272.
• B. Jos de Roo: Praatjes voor de West: de Wereldomroep en de Antilliaanse en Surinaamse literatuur 1947–1958, Uitgeverij In de Knipscheer, Amsterdam (2014), ISBN 978-90-6265-892-3, S. 235.
• A. James Arnold: English- and Dutch-speaking regions. Den: A History of Literature in the Caribbean. Tomo 2. John Benjamins Publishing, Amsterdam/Philadelphia (2001), ISBN 90-272-3448-5, pág. 362.
• Schrijver Frank Martinus Arion overleden, nos.nl (28 di sèptèmber 2015)
• Writer Frank Martinus Arion Passed Away, Curacaochronicle.com (28 di sèptèmber 2015)
• Frank Martinus Arion geeft lintje terug, Trouw.nl (16 di desèmber 2008)