Anton de Kom
| Anton de Kom | ||
|---|---|---|
| Cornelis Gerard Anton de Kom | ||
.jpg)
| ||
| Informacion basico | ||
| Nomber nacemento | Cornelis Gerhard Anton Dulder | |
| Alias | Papa De Kom | |
| Pseudonimo | Adekom | |
| Nacemento | 22 di februari 1898 | |
| Fayecimento | 24 di april 1945 | |
| Causa di morto | tuberculosis | |
| Modo di morto | causa natural | |
| Lenga materno | Hulandes | |
| Informacion profesional | ||
| Ofishi | poeta, eskritor, anti-imperialist, luchado di resistencia | |
| Obra | ||
| Obra notabel | Wij slaven van Suriname | |
| Politico | ||
| Partido politico | Partido Comunista di Hulanda | |
| Informacion di resistencia | ||
| Pais |  Sürnam Hulanda
| |
| Grupo | Resistencia comunista | |
| Detencion | 1933 - Fort Zeelandia 1944 - Oranjehotel, Campo di concentracion Vugh, Oranienburg, y Sandbostel | |
| Otro informacion | ||
| Distincion | Cruz di Comemoracion di Resistencia | |
| Funcion | ||
| 1917-1920 | Administrado pa Balata Compagnie | |
| 1921- | Servicio militar | |
| 1921- | Represetante pa Reuser en Smulders | |
Imagennan riba  Wikimedia Commons
| ||
| dbnl-profiel | ||
| [Edita Wikidata] · [Manual] | ||
Cornelis Gerhard Anton de Kom, naci Dulder, (☆Paramaribo, 22 di februari 1898–†Sanbostel, 1945) tabata un escritor, poeta, y activista anticolonial y antiracismo Surnameño, y activo den e resistencia durante di dos guera mundial.
Biografia
[editá | editá fuente]Su tata, Adolf Damon de Kom, a nace ariba 23 di mei 1862 como catibo ariba plantashi Molhoop di provincia Boven Cottica na Surnam, un poco prome cu e abolicion di sclavitud na 1863. Adolf su mama ta Elisabeth Dorothea ('Doortje') de Kom, un veldmeid ('catibo di campo'), miembro di Evangelische Broedergemeente (EBG; 'misa evangelico') y yui muhe di Jacoba Azemia de Kom. Na 1863, nan ta tres di 116 catibo cu tabata propiedad di Hendrik Jan Veldwijk.
Anton ta e di dos yui di Adolf, un agricultor chikito y buscado di oro, y su casa Judith Jacoba Dulder. Adolf y Judith a casa na Paramaribo ariba 29 di januari 1902. Den sentido religioso e famia tabata catolico y De Kom a describi su criansa como caluroso y un ambiente sigur.
Surnam (1898–1920)
[editá | editá fuente]De Kom a nace na Paramaribo, e capital di Surnam, na e momento ey un colonia di Hulanda. E abolicion di sclavitud ya a tuma luga, pero opresion colonial a sigui den un diferente forma. Asina, por ehempel, como un mucha homber di dies aña di edad e tabata siña solamente historia tocante heroenan Hulandes manera Willem van Oranje y Michiel de Ruyter, nada tocante historia di Surnam. Tambe, na scol, ora De Kom y su amigonan ta ser haya ta papia Sranantongo, nan ta wordo bati.
De Kom a mustra for di un edad hoben cu e tabata masha curioso pa siña. E tabata particularmente interesa den e storianan di sclavitud ariba e plantashinan na Surnam, e conocemento tocante e topico aki, e la adkiri di hende mas bieu cu a experencia sclavitud. E perspectiva di sclavitud aki, De Kom no a wak esaki bek den bukinan cu e tabata lesa. Esaki a inspir'e pa investiga historia for di experencia di esnan oprimi.
Despues di a cumpli su educacion basico, De Kom a logra su MULO-diploma di wanta buki. Tambe, e tabatin dominio di multiple idioma, manera Ingles, Aleman, y Frances. E idiomanan crioyo cu tabata wordo papia den y rond Surnam y na Antias, tambe e tabatin dominio di nan, manera Sranantongo y Papiamento.
Durante prome guera mundial, su ofishi tabata como un administrado pa Balata Compagnie (industria di rubber). Ariba 29 di juli 1920, De Kom a tuma retiro y poco despues a sali pa Hulanda. De Kom a skirbi un poeta yama De Balatableeder unda e la describi con e compania tabata trata su trahadonan contrata:
Neem je hongerloon, houd je muil
Spreek niet over de kwantiteit
Slechts de onderneming krijgt gelijk.Tuma bo salario miserabel, wanta bo boca
No papia di e cantidad
Solamente e empresa tin rason.
- — Strijden ga ik, p. 11 (1969)
Hulanda (1920–1932)
[editá | editá fuente]
De Kom a biaha como un pasahero trahado. Ariba 21 di oktober 1920, el a yega Amsterdam, y un luna despues pa Den Haag, unda desde januari 1921 el a tuma parti den servicio militar, specificamente cerca e 2e Regiment Huzaren ('2° Unidad Huzaren'). Poco despues el cuminsa tambe como representante di totado di koffie y comerciante di te na Reuser en Smulders. Aki ta unda el a cera conoci cu Petronella Borsboom y na 1926 nan a casa. E tempo ey, na Hulanda, unda mayoria di Hulanda ta di e comunidad blanco, un matrimonio mescla no tabata considera como algo comun. E pareha a haya hunto cuater yui, esta Ad (1926), Cees (1928), Ton (1929), y Judith (1931).
Banda di su trabou, el a desaroya su mes como escritor y poeta. Esaki ta pa e motibo di su disgusto cu na Hulanda tabatin asina tiki conocemento tocante e historia di Surnam y di sclavitud, asina e tabata duna charla tocante e topico. Inspira pa e lucha contra racismo na Merca y e ideanan di igualidad di organisacionnan comunista na Hulanda, e ta publica articulonan politico critico.
Na 1927, De Kom tabata presente na e congreso inaugural di Liga contra Imperialismo y Opresion Colonial na Brusela, caminda el a yama lidernan Indones manera Mohammed Hatta y otronan pa bringa hunto cu Surnam contra colonialismo. Durante e añanan 1920 y e crisis di 1930 (Gran Depresion), De Kom tabata involvi den diferente oraganisacion socialista, entre otro den clubnan di studiante Indones cu tabata opene colonialismo, y organisacion Links Richten funda na 1930. Links Richten tabata un colectivo di trahado y escritornan cu tabata simpatisa cu comunismo, desde e introduccion di e Revolucion di Rusia na 1917.
Surnam (1932—1933)
[editá | editá fuente]
Na fin di 1932, De Kom a bai Surnam pa bishita su mama cu tabata malo. Na su yegada, ariba 4 di januari 1933, e tabata bon bini pa e comunidad Surnameño, pero e autoridadnan tabata alarma cu De Kom tabata un revolucionario comunista peligroso y anticolonialista. Na su yegada tabatin tres recherche den e publico ta vigil'e. E unico cos cu tabata falta, ta pa a haya un motibo pa aresta De Kom.
Asombra cu e pobresa den e pais, a dicidi di habri un bureau di conseho na su cas na Paramaribo pa conseha trahado di Surnam riba nan derecho basico. Na e inauguracion ariba 31 di januari 1933, miles di Surnameño di menos recurso a bin bishit'e. Di nan el a haya e nomber di kariño 'papa De Kom'.
Diaranson scur
[editá | editá fuente]
Ora De Kom a indica cu e ta desea di papia cu e gobernador, autoridadnan a detene De Kom. Ariba e acusacion di instiga un revolucion ariba 1 di februari 1933, el a keda deteni na Fort Zeelandia pa tres luna. Ariba 7 di februari 1933, un tao di hende a reuni dilanti e edificio di corte pa protesta contra e sentencia di De Kom. Sinembargo, e protesta a keda termina na e momento cu soldaatnan a habri tiro, cu a laga dos morto y 22 herida. Inhustifica, e gobierno colonial Hulandes, a pone De Kom ariba un barco, SS Renselae, pa Hulanda ariba 10 di mei 1933. Esaki ta nifica un exilio; nunca mas e lo mira su pais natal.
Sranang mijn vaderland.
Eenmaal hoop ik u weer te zien.
Op den dag waarop alle ellende uit u weggewischt zal zijn.Sranang mi patria.
Un dia mi ta spera di mira bo atrobe.
Ariba e dia ey tur miseria lo wordo elimina for di bo.
- — Anton de Kom, ‘’Wij slaven van Suriname’’, p.222 (1934)
Hulanda (1933—1940)
[editá | editá fuente]Ariba 27 di mei 1933, De Kom a yega Hulanda, den e haf di IJmuiden, caminda comunistanan a ricibi'e como un heroe. Na 1934, el a publica su buki Wij slaven van Suriname ('Nos catibo di Surnam'), un denuncia contra racismo, explotacion y dominacion colonial. De Kom su buki Wij Slaven van Suriname ta e prome buki di historia tocante Surnam skirbi door di un Surnameño. E buki aki a wordo publica durante e temporada cu otro obranan anticolonial y antiracista tambe a surgi, manera The Black Jacobins di CLR James.
Di dos Guera Mundial (1940–1945)
[editá | editá fuente].jpg)
Na mei di 1940, Alemania nazi a trece Hulanda den di dos guera munidial door di un atake ariba west Europa conoci como Fall Gelb. Durante di ocupacion Aleman di Hulanda, De Kom a uni cu e resistencia comunista. E tabata regularmente skirbi textonan pa prensa ilegal (p.e., pa e periodico De Vonk y e revista Revolutionair Socialistische blad).
Ariba 7 di augustus 1944, De Kom a wordo traiciona y aresta dilanti di su cas na Johannes Camphuysstraat 296 den bario di Bezuidenhout na Den Haag. Despues di ta deteni den prizon na Scheveningen (Oranjehotel) y campo di concentracion Vught, el a wordo transporta pa campo di concentracion Oranienburg, y finalmente pa campo di concentracion Sandbostel (Neuengamme, Alemania) ariba 6 di september 1944. Aki el a ehecuta trabou obligatorio na fabrica di avion Heinkel.
Ariba 24 di april 1945, solamente dos siman prome cu e capitulacion di Alemania y cinco dia prome cu e campo ta libera pa e trupa Britanico, Anton de Kom a fayece di tuberculosis na campamento Sandbostel. El a muri den e campamento di refugio Stalag X-B. Su restonan a wordo identifica, na aña 1960, den un graf di masa. E mesun aña, ariba 18 di augustus, De Kom a wordo dera na Nationaal Ereveld Loenen ('Santana Nacional di Honor di Loenen') na Veluwe den presencia di su viuda y cuater yuinan.
Reconocemeto
[editá | editá fuente]
_birthplace_of_Anton_de_Kom_and_monument_(1985).jpg)
_Amsterdam_Zuidoost7a.jpg)
_03.jpg)
E unico publicacion di De Kom, Wij slaven van Suriname, a keda recupera na 1964 den Biblioteca Universitario di Leiden pa e studiante Surnameño Rubia Zschüschen (1944–2002).
Ariba februari 1973 na Hulanda, pa motibo di e independencia di Surnam, cu tabata acercando dos aña despues, a organisa un luna di Anton de Kom, den cual a duna atencion na su idealogia y obranan. Despues a proclama 1988 como aña di Anton de Kom.
Ariba 2 di mei 1981 Pontewerfstraat na Paramaribo a wordo nombra pa Anton de Komstraat. Ademas, a nombra e Universidad di Surnam na su nomber ariba 17 di oktober 1983 y ariba 22 di februari 1985 a inaugura un monumento na su cas di infancia na Paramaribo.
E artista Jikke van Loon a crea un estatua di brons di Anton de Kom, encarga pa e municipio di Amsterdam, cu a wordo revela ariba 4 di april 2006 na Amsterdam-Zuidoost. Ariba 24 di februari 2009, dos yui di De Kom a entrega e archivo literario na profesor Michiel van Kempen di Universidad di Amsterdam. Ariba 22 di juni 2020, De Kom a haya un luga den e Canonisacion di historia Hulandes, cu ta wordo uza como guia den enseñansa di historia na scolnan basico Hulandes.
Distincion
[editá | editá fuente]Ariba 26 di maart 1982, De Kom a ricibi posthumo e Verzetsherdenkingskruis ('Cruz di Comemoracion di Resistencia') pa su lucha contra e ocupadonan Aleman durante di dos Guera Mundial.
Obra literario
[editá | editá fuente]- Wij slaven van Suriname (1934)
- Strijden ga ik (1969)
- Vandaag vrij, altijd vrij (2023)
Fuente, nota i/òf referensia
|