Fòrça electromotritz
La fòrça electromotritz, sovent dicha fem, es un dei paramètres caracteristics d'un generator electric. Es omogenèa a una tension e s'exprimís en volts. Dins un circuit electric, correspònd au trabalh necessari per metre en movement de cargas electricas. Es generalament provesida per un generator electric qu'impausa una tension a sei bòlas. Dins aqueu cas, la fòrça electromotritz es associada a un compausant pontuau. Pasmens, dins lo cas de l'induccion electromagnetica, pren normalament la forma d'una fòrça còntraelectromotritz, es a dire que s'opausa a la mesa en plaça d'un camp magnetic. Es alora despartida sus l'ensemble dau circuit e es associada a una malha.
Introduch per Alessandro Volta (1745-1827), es un concèpte relativament ancian de l'estudi dei circuits electrics. A ansin desenant d'aplicacions dins de domenis variats de la fisica e de la quimia. Uei, es mai que mai descrich per leis eqüacions de Maxwell ò, segon lei besonhs, per de relacions entre lei foncions d'estat de la termodinamica.