Burocracia
La burocracia es una forma d'organizacion dau trabalh que son accion es definida per de proceduras reglementàrias, es a dire per la lèi. Es sovent una administracion publica que seis agents son recrutats per examen ò concors, complisson una carriera, dèvon obeïr ais òrdres donats per lor superior ierarquic e trabalhar dins un sector especializat. L'interès dau sistèma es de sortir lo sector considerat deis imperatius de foncionament dau mercat. Pasmens, aquò demenís sovent la capacitat d'innovacion e lei còsts de foncionament d'una burocracia pòdon èsser importants.
Per extension, aqueu tèrme a aquistat un caractèr pejoratiu liat ai pesantors e a la rigiditat dau formalisme e de l'accion administrativa. Dins certanei cas, pòu tanben s'observar una monopolizacion dau poder au profiech deis interès dei burocratas, situacion grèva car favoriza fòrça lo desvolopament de la corrupcion.