Synonym (Taxonomie)

In de Biologie ehre Nomenklatur warrt de Begreep Synonym bruukt, wenn unnerscheedliche wetenschoppliche Naams for datsülvige Taxon bruukt weert. In de Wetenschoppen vun de Zoologie un de Botanik verscheelt sik de Bruuk un de akraate Terminologie vun den Begreep.

In de Nomenklatur gellt de Regel vun de Priorität: Wenn verscheden Naams for datsülvige Taxon bruukt weert, schall normolerwiese de ollste Naam gellen. Dat is de Naam, de toeerst schriftlich bekannt maakt wurrn weer. En sunnerlichen Born for Synonyme is dat, wenn latere Taxonomen desülvige Grupp, unner en ne’en Naam, nochmol beschrieven doot. Dat kann allerhand Grünn hebben: Unner Umstänn weer de eerste Beschrieven nich akraat noog, oder de nee Taxonom hett ehr nich kennt (wenn se rutkamen weer in en ole oder roore Tiedschrift oder in en annere Spraken oder wenn over de Gruppen, wo dat over geiht, al lang nix mehr rutkamen is). En wichtigen Grund is ok, datt de globale Oversicht faken fehlt, so datt Aarden de wiethen over de Eer vorkamen doot, in verscheden Länner en poor Mol beschreven weert. Man ok unnerscheedliche taxonoomsche Ansichten speelt en Rull. Wenn upfallen deit, datt in de taxonoomsche Arbeit en Synonym bruukt warrt, warrt de jungere Naam mit den olleren synonymiseert. In Listen vun de Aarden un in Revischonen steiht achter jedeen Naam vun en Aart normolerwiese en List mit al Synonyme, de dor al bekannt vun sünd. Düsse Naams schöllt nich mehr bruukt weern. Hen un wenn kummt dat vor, datt en olen Naam, de as en Synonym ankeken wurrn weer, later doch wedder gellen deit. Dat passert faken, wenn bi en Revischoon en Aart, de bitherto as man een Aart ankeken wurrn is, nu in en Reeg vun Aarden upspleten warrt. Unner Umstänn hett een vun de Aarden, de nu nee utfunnen wurrn sünd, al fröher en Naam kregen. Dat is denn nu de Naam, de foor dat nee Taxon gellen deit.

In dat Johr 2013 is taxeert wurrn, datt sik dat bi 20 Perzent vun de Aartnaams um Synonyme hanneln deit, de bitherto noch nich updeckt wurrn sünd..

Literatur

• R. A. Blackwelder: Taxonomy: A text and reference book. Wiley, New York 1966.

Weblenken

• International Code of Botanical Nomenclature (ICBN)
• Internatschonale Regeln for de Zooloogsche Nomenklatur (IRZN oder ICZN): engelschen Text