Spekulatschoon (Weertschop)

Spekulatschoon is en Woort ut de Spraak vun de Weertschop. Dor is en Investitschoon mit meent, wo dat vunwegen en högeret Risiko ok de Chance up en högere Rendite bi gifft. Dat Woort kümmt ut de Latiensche Sprake vun dat Woort „speculor“: „ik kiek ut“. Wenn de Spekulatschoon betahlt warrt mit frömdet Geld, denn so heet se „Hevel-Spekulatschoon“. En Minsch, de spekuleern deit, heet „Spekulant“.

Wat de Bedrievsweertschop angeiht

Jede Spekulatschoon in de Weertschop hett dat dor up afsehn, dat en Geldvördeel rutspringen deit. Dor mutt de Markt um taxeert weern, wie de in de Tokumft utsütt. Wat rutspringen deit bi ene Spekulatschoon, is jummers de Unnerscheed twuschen Inkoopspries un Verkoopspries. Dor mütt denn noch de Kosten för den Hannel vun aftagen weern.

Wenn en Spekulatschoon slumpen deit, denn liggt dat in’r Hauptsake doran, dat Lüde bitieds seht un dat utnützen doot, wenn de Markt an de een oder annere Steed de tokümftigen Priesen mööglicherwiese verkehrt intaxeern deit. Dat liggt denn amenne doran, dat de Köpers un Verköpers nich datsülvige weten doot un dat se ok unnerscheedlich plietsch sünd. Wenn de Markt denn mit’e Tied ok sütt, wat de Spekulant al vördem sehn hett un wenn he siene Priesen denn ännert, denn gifft dat för den Spekulanten en Winnst ut de Spekulatschoon. Wenn dat verkehrt löppt mit de Spekulatschoon, denn gifft dat en Verlust ut de Spekulatschoon.

Wat de Volksweertschop angeiht

De Spekulatschoon is för de Volksweertschop u. a. wichtig, wiel dat Risikos för Unnernehmen bi ehre Geschäften, de vunwegen den Kapitalmarkt dor sünd, an en Grupp vun Spekulanten afgeven weern könnt (Hedging). Dor mutt avers en passliche Rendite för to kriegen ween.

De Spekulant will ut den Unnerscheed vun de Priesen, de he vörut sütt, en Winnst rutslahn. Wat he vörutsehn deit, hett siene Grundlaag normolerwiese in Informatschonen. D. h., he weet wat, wat de annern noch nich spitz kregen hefft. Bi Spekulatschoonsgeschäften gaht nu Informatschonen in den Pries mit rin. Nehmt wi as Bispeel, dat warrt dor mit rekent, dat, vunwegen de slechte Laag in de Weertschop, de Geldsoort „A“ in’n Pries afsacken schall. Dat bedutt, de Wesselkurs gegen en annere, stevige, Geldsoort „B“ över warrt sik ännern. De Spekulant köfft nu de Geldsoort „B“, vunwegen dat de up betern Grund steiht. Wenn denn „A“ afsackt is, wo he up spekuleern deit, denn so köfft je mit dat düre „B“ de Geldsoort „A“ veel billiger torüch. Just dör düsse Tuuscheree kümmt dat nu avers to’n Afsacken vun „A“. Dor kann een um seggen, dat de Kapital- oder Devisenmarkt vunwegen sien Weten över de Weertschopslaag de Geldsorten en neen Weert geven hett. Spekulatschoon hölpt hier also, dat nee Informatschonen in dat System vun de Priesen infleten doot.