Hinrich II. (HRR)

Hinrich II. warrt kröönt– Lütt Bild ut den Kaiser sien Sakramentar

Hinrich II., mit Binaam „de Hillige“ (* 6. Mai 973 oder 978 in Bad Abbach oder Hilmessen; † 13. Juli 1024 in Grone), weer vun 1002 af an Röömsch-düütschen König un bavenhen vun 1014 bit 1024 Kaiser vun dat Hillge Röömsche Riek. Sien Nafolger is Konrad II. ut dat Huus vun de Saliers wurrn.

Familie

Hinrich weer de Söhn vun den Hartog Hinrich II. vun Bayern. De dreeg den Ökelnaam „de Strietbüdel“. Düsse Bayernhartog weer verheiraat mit Gisela vun Burgund. Somit weer de latere Kaiser de Uurenkel vun König Hinrich I. un stamm af ut en Nevenlien vun dat Huus vun de Ottonen.

Kroon un Throon

An'n 9. Juli 1002 is Hinrich II. to'n König vun de Oostfranken kröönt wurrn. Paapst Benedikt VIII. hett em denn an'n 14. Februar 1014 to'n Kaiser vun dat Hillge Röömsche Riek maakt. Verheiraat weer he mit Kunigunde vun Luxemborg. Kinner hefft de beiden nich harrt. Dor weer Hinrich II. de leste Kaiser ut dat Huus vun de Ottonen mit. Paapst Eugen III. hett em 1146 hillig spraken.

Politik

Anners as sien Vörloper Otto III. hett Hinrich II. sik tomeist mit de Kuntreien vun dat Riek befaat, de nöördlich vun de Alpen liggen döen. Verscheden Malen hett he Krieg föhrt mit Polen. Gegen dat Daltrecken na Italien dorgegen keek he gegenan. Anners as Otto III. heel he dor nix vun, en Imperium up to boon. He harr sik vörnahmen, he woll dat Riek vun de Franken wedder herstellen (Renovatio regni Francorum). Na de Binnenkant hen hett he dat Riek stärker maakt, vunwegen dat he noch mehr mit de Kark tohopengahn is. He hett nee Bisdömer grünnt un de olen hett he allerhand Riekdömer un Vermögen schunken. He seeg dat so: De Bischöpp unnerstütten de Macht vun den König un sprüngen em to Siet, wenn dat nödig weer. Bavenhen unnernehm he dat, de Riekskloosters to reformeern. Ok so scholl de königliche Macht grötter weern, vunwegen dat de Riekskloosters en Deel vun dat Rieksheer upstellen mössen.

In de Stadt, de ehr Naam besunners mit sien egen Naam verbunnen is, in Bamberg, hett he 1007 en Bisdom grünnt.

As wichtigsten Born över de Tiet vun Hinrich II. warrt Thietmar vun Merseburg siene Krönk ankeken. Tietmar weer 1009 Bischop vun Merseburg wurrn.

Vörgänger	Amt	Nafolger
Otto III.	Röömsch-düütschen Kaiser 1014-1024	Konrad II.

Weblenken

Hinrich II.. Mehr Biller, Videos oder Audiodateien to’t Thema gifft dat bi Wikimedia Commons.