Christian Schwarz-Schilling
Christian Schwarz-Schilling (* 19. November 1930 in Innsbruck) is en düütsch Politiker (CDU) un Ünnernehmer. He weer van 1982 bit 1992 Bundsminister för dat Post- un Feernmeldewesen / Bundsminister för Post un Telekommunikatschoon. Tüschen 2006 un 2007 weer he 17 Maand lang de Hooch Repräsentant för Bosnien un Herzegowina un dormit verantwortlich för dat Överwaaken vun dat Freedensafkommen vun Dayton.
Utbillen un Berop
[ännern | Bornkood ännern]Nah dat Abitur 1950 an dat Arndt-Gymnasium Dahlem in Berlin hett Schwarz-Schilling an de Universität München Ostasiatische Kultur- un Spraakwetenschapen un Geschichte studeert. 1956 hett he sien Doktertitel (Dr. phil.) mit de Arbeit Der Friede von Shan-Yüan 1005 n. Chr. und seine Auswirkungen auf die Beziehungen zwischen dem Chinesischen Reich und dem Liao-Reich der Kitan maakt. Ansluutend fung he en Banklehre in Hamborg an. Van 1957 bit 1982 weer he Geschäftsführer vun de Accumulatorenfabrik Sonnenschein GmbH in Büdingen.
Van 1993 bit 2002 weer he Geschäftsführer vun de Dr. Schwarz-Schilling & Partner GmbH, en Telekommunikatschons-Beraderünnernehmen ut Büdingen. Nah sien Utscheeden ut de Politik hett Schwarz-Schilling immer mal weer Upgaven in Ünnernehmen övernommen, de sück in reguleerte Märkten vörwagen deen, to’n Bispeel as Mitgrünner vun de Telegate AG[1] un siet 2014 as Vösitter vun den Ünnernehmensbiraad vun de UPLINK Network GmbH[2].
Familie
[ännern | Bornkood ännern]Christian Schwarz-Schilling is de Söhn vun den Komponisten Reinhard Schwarz-Schilling. He is verheiraadt, kathoolsch un hett twee Döchter (Cara un Alexandra) un veer Enkelkinner. Sien Fru Marie-Luise Schwarz-Schilling wurr 2004 dör hör Book Die Ehe. Seitensprung der Geschichte bekannt.
Wiels en Reis dör Polen hett Christian Schwarz-Schilling erfohren, dat sien Moder, de poolsch Pianistin Dusza von Hakrid, jöödsch weer. 1938 veränner en düütsch Beamter den jöödschen Gebortsnaam vun sien Moder un hett so hör wohr Identität verschleiert.[3]
Partei
[ännern | Bornkood ännern]
He is siet 1960 Liddmaat vun de CDU. Hier hörr he af 1964 den Landsvörstand Hessen an, un weer van 1967 bit 1980 deren Generalsekretär un van 1967 bit 1996 Eerst stellvertreeden Landsvörsitter.
Van 1975 bit 1983 weer he Vörsitter vun den Koordinierungsutschuss för Medienpolitik vun de CDU/CSU un van 1977 bit 1997 stellvertreeden Bundsvörsitter vun de Mittelstandsvereenigung vun de CDU/CSU. Van 1979 bit 1982 weer he buterdem Präsident vun dat Exekutivbüros vun de Europääsch Mittelstands-Union.
Afordneter
[ännern | Bornkood ännern]Van 1966 bit 1976 weer he Liddmaat vun den Hessisch Landdag un van 1970 bit 1976 Stellvertreeden Fraktschonsvörsitter un kulturpolitisch Spreeker.
Van 1976 bit 2002 weer he Liddmaat vun den Düütschen Bundsdag. In de 8. Wahlperiood weer he Obmann in‘ wertschapspolitischen Utschuss un weer in de 9. Wahlperiood van 1981 bit 1982 Vörsitter vun de Enquête-Kommission „Neue Informations- und Kommunikationstechniken“. In de 13. Wahlperiood (1994–1998) wurr he Vörsitter vun den Ünnerutschuss för Minschenrechte un Humanitäre Hülp un in de 14. Wahlperiood weer he van 1998 bit 2002 Stellvertreeden Vörsitter vun den Utschuss för Minschenrechte un humanitäre Hülp. Schwarz-Schilling weer toletzt (14. Wahlperiood 1998) över de Landslist Hessen in den Düütschen Bundsdag intrucken.
Apenlich Ämter
[ännern | Bornkood ännern]
An‘ 4. Oktober 1982 wurr he as Bundsminister för dat Post- un Feernmeldewesen in de vun Bundskanzler Helmut Kohl führt Bundsregeeren beropen. Af den 1. Juli 1989 wurr dat vun hüm leit Bundsministerium Bundesministerium für Post und Telekommunikation nömmt. Ünner sien Leitung wurr in Düütschland dat Kabelfeernsehn inführt, dat Privatfeernsehn tolaaten un de Mobilfunk nah den Standard GSM inführt.
An 14. Dezember 1992 is he vun sien Amt ut Protest gegen de Hollen vun de Bundsregeeren in‘ Bosnien-Krieg torüchtreeden.[4] Dat „Desinteresse seiner Generation“ weer en vun de „bedrückendsten Erfahrungen überhaupt“, un eegentlich weer dat dat, wat he bit hüüd nich begriepen kunn.[5]
Sien vörherigen Ambitschonen in dat ehmalge Jugoslawien weer sien Ernennung to’n Hooch Repräsentanten för Bosnien un Herzegowina to verdanken. Dit Amt hett he an‘ 31. Januar 2006 antreeden. Noch nich mal een Johr later hett he sien Rückträe an 24. Januar 2007 to’n 30. Juni 2007 ankünnigt. De verscheeden Gruppen in Bosnien un Herzegowina hemm hüm vörsmeeten, falsch Entscheedungen draapen to hemm un en falsch Strategie to verfolgen.[6][7] Den politischen Druck hett de 76-Johrige sluutend nahgeven. In sien weekentlich Kolumne schreev Schwarz-Schilling denn aber, dat he blots sien oorsprünglich Mandat nich verlängern würr, dat Enn‘ Juni 2007 utleep. Sien Nahfolger wurr denn Miroslav Lajčák.
Kritik
[ännern | Bornkood ännern]Um dat Kabelprojekt vörantobringen, hett Schwarz-Schilling dorup sett, Privatfirmen an de Kabelverleggen to bedeeligen. An de Projektgesellschaft für Kabel-Kommunikation mbH weer mit de Sonnenschein KG ok de Firma vun sien Fru bedeeligt, in de he de Johren tovör as Geschäftsführer tätig weer. Sien Andeelen an de Sonnenschein KG hett he eerst wenig Stünnen vör de Ernennung to‘ Postminister afgeven. Köper vun disse Andeelen weer Nixdorf-Konzern.[8] Ok sien Entscheeden, Kopper to bruuken, is in dat In-as ok in dat Utland up Verwunnern stött: Es war bereits Anfang der 80er Jahre abzusehen, dass Glasfaserkabel die „Technologie der Zukunft“ sind.[9]
Wiels sien Amtstiet weer Schwarz-Schilling as „Kohls affärenreichster Minister“ bekannt. Utlöser vun disse Affären weern meest de Verwicklungen vun dat Familienünnernehmen vun sien Fru in Schwarz-Schilling sien politisch Entscheedungen.[10][11]
Engagement
[ännern | Bornkood ännern]Schwarz-Schilling hett sück alltiet un bit hüüd för Börgerkriegsflüchtlinge ut de Jugoslawien-Nahfolgestaaten insett. Schwarz-Schilling tell to de Mitbegrünner vun de Aktschoon „Hessen hilft“ un fördert in völ Fällen de Anliegen vun „Pro Asyl“ un de „Gesellschaft für bedrohte Völker“ (Chöttingen, GfbV).
Am 30. Juli 2007 nehm he sien Strietschlichtertätigkeit in‘ Rahmen vun den vun hüm grünnten CSSP – Verein für Integrative Mediation e.V. in‘ Kosovo, in Mazedonien un Südserbien weer up. 2005 wurr dat CSSProjekt för Integrative Mediation (CSSP) up Anfraag vun den Düütschen Bundsdag as "Lessons learned"-Projekt mit Konzentratschoon up Südosteuropa in‘t Leven ropen, wobi CSS för sien Initialen steiht. Siet 2006 is CSSP as indraagen Vereen mit Sitt Berlin registreert. Af dat Wintersemester 2007/2008 hett he en Professur för Politische Wetenschapen an de „Sarajevo School of Science and Technology“ in Sarajewo övernommen. Siet Harvst 2011 is Schwarz-Schilling Liddmat in dat Kuratorium vun de Stiftung Schüler Helfen Leben.
Ehrungen
[ännern | Bornkood ännern]- 1986: Groot Verdeenstkrüüz
- 1987: Orden vun den Hilligen Schatz mit Schullerband
- 1989: Grootkrüüz vun den Verdeenstorden vun dat Groothartogdom Luxemborg
- 1990: Hessischer Verdienstorden
- 1992: Groot Verdeenstkrüüz mit Steern[12]
- 1995: Heinrich-von-Stephan-Plakette
- 1997: Ehrendokterwürde vun de Bryant University in Smithfield (Rhode Island), USA
- 2002: Wilhelm-Leuschner-Medaille, de hööchste Utteknung vun dat Land Hessen.
- 2004: Ehrenbörger vun de Stadt Büdingen.
- 2005: Verleehn vun de Manfred-Wörner-Medaille[13]
- 2007: Hessisch Freedenspries[14]
- 2013: Light of Truth Award vun de International Campaign for Tibet (ICT) verleeht vun den 14. Dalai Lama[15]
- 2014: Alfred-Dregger-Medaille in Gold
Weblenken
[ännern | Bornkood ännern]
Christian Schwarz-Schilling. Mehr Biller, Videos oder Audiodateien to’t Thema gifft dat bi Wikimedia Commons.
Enkeld Nahwiesen
[ännern | Bornkood ännern]- ↑ Ehemaliger Postminister Mitgründer der Telegate AG | [1]
- ↑ Prof. Dr. Schwarz-Schilling ist Vorsitzender des Unternehmensbeirates der UPLINK Network GmbH | uplink.de [2]
- ↑ Interview mit Schwarz-Schilling
- ↑ Feernsehmitsnitt mit Reaktschonen vun Peter Kloeppel, Günther Jauch un Angela Merkel up den Rückträe
- ↑ Sabine Bode: Die deutsche Krankheit - German Angst, Stuttgart 2007, S. 97.
- ↑ Michael Martens: Schwarz-Schillings nicht ganz freiwilliger Abschied, FAZ, 25. Januar 2007
- ↑ Erich Rathfelder: Über den Rückzug von Schwarz-Schilling, taz, 25. Januar 2007
- ↑ [3]
- ↑ [4], Der Spiegel, VERKABELUNG: Langfristig falsch, 31.01.1982
- ↑ [5], Der Spiegel, Der Bundesbleiminister, 24. Juni 1985
- ↑ [6], Computerwoche, Post-Etat 83: Kein Hinweis mehr auf Btx-Start, 10. Dezember 1982
- ↑ http://conference2000.de/Conference/Referenten/referenten.html
- ↑ Schwarz-Schilling dankt für den Einsatz der Bundeswehr in Bosnien und Herzegowina, Pressemeldung van‘ 12. Juni 2006 [7]
- ↑ Empathie und Politik, Dokumentation der Verleihung des Hessischen Friedenspreises 2007 an Christian Schwarz-Schilling, in: HSFK Standpunkte Nr. 6/2007
- ↑ Lamp for the Path Teachings in Fribourg, Websteed vun den Dalai Lama, 14. April 2013
