Armeensche Tallen

De armeenschen Tallen sünd en Tallsystem, dat för Spraken mit armeensche Schrift bruukt worrn is. Nu bruukt de Armeenschen vör allen de araabschen Tallen, de armeenschen Tallen warrt blot noch för en poor besünner Saken bruukt, to’n Bispeel för dat Tellen bi Överschriften un Listen oder för de Nummern bi Herrschers un Anföhrers.

Dat armeensche Tallsystem hett 36 Teken för de Tallen vun een bet negen, för de Teihners vun teihn bet negentig, för de Hunnerters vun hunnert bet negenhunnert un för de Dusenders vun eendusend bet negendusend. Disse Tekens warrt vun links na rechts schreven. För Tallen grötter as 9999 gifft dat noch wedder densülven Satz vun Tekens, aver mit’n Streek dor över, wat bedüden deit, dat de Tall mal 10.000 nahmen warrt. Tosätzlich gifft dat ok noch de Teken Օ för 10.000 un Ֆ för 20.000. Disse beiden Bookstaven sünd eerst temlich laat in de armeensche Schrift opnahmen worrn un hebbt denn dissen Weert kregen. Faken warrt dat Tallsystem aver ok ahn disse beiden Bookstaven bruukt. En Null hett dat armeensche System nich kennt.

Symbol	Ա	Բ	Գ	Դ	Ե	Զ	Է	Ը	Թ
Tall	1	2	3	4	5	6	7	8	9
Symbol	Ժ	Ի	Լ	Խ	Ծ	Կ	Հ	Ձ	Ղ
Tall	10	20	30	40	50	60	70	80	90
Symbol	Ճ	Մ	Յ	Ն	Շ	Ո	Չ	Պ	Ջ
Tall	100	200	300	400	500	600	700	800	900
Symbol	Ռ	Ս	Վ	Տ	Ր	Ց	Ւ	Փ	Ք
Tall	1000	2000	3000	4000	5000	6000	7000	8000	9000

Bispeel: 1982 = ՌՋՁԲ