Asten

Asten (op zien Broabaants: Ááste) is ne gemeente in de Nederlaandse proveensie Noord-Broabaant. Op den eersten april van 2016 wonnen der 16.667 leu op ne vlakte van 70,4 km². De gemeente is deel van de plusregio Eandhowen. De heuwdkern van de gemeente is et doarp Asten, woer as 13.069 leu wont. Aandere döarpe in de gemeente zeent Heusden en Ommel.

Umskriewing

Een groot deel van de gemeente lig in et hoogvenne van Nasjonaalpark De Groote Peel. Zeenswearde zaken zeent de niejgotiese koarke van Oonze Lewe Vrouwe Presentatie, bouwd tusken 1896 en 1898. In Ommel goat völle Rooms-Katholieken op bedevoart noar de koarke dee as doar noa den Tweeden Wearldoorlog bouwd is. Et gemeentehoes is in 1940 ebouwd. Et wör tekend duur Alexander Kropholler.

In Asten zitt verhooldingswies völle weenkels, woer as de leste joaren et woonweenkelplan 'Het Kompas' bie köm.

Et doarp Asten is redelik bekeand as klokkendoarp, um de Keuninklike klokkengeterieje, dee as in 1993 de doomoalig grötste klokke van de wearld maken. Disse klokke was een geskeank van Keuniginne Elizabeth van Groot-Brittanje an Niej-Zeelaand. In 2006 maken de klokkengeterieje ne nog gröttere kokke, van 36.000 kilo en nen klepel van 1500 kilo. Disse klokke was vuur nen Japansen oondernemmer den as doar ene van zinne vakaansieparken met sieren wol.

Doarnöast hef et doarp et Nasjonale Beiaardmuseum. Öare oetstroaling as klokkendoarp hooldt ze gearne hoge. In et doarp steet een leawensgroot broonzen beeld van klokkengeter Jan de Smet van Asten, oet et 16de joarhoonderd. Doarnöast heuld et doarp alle joaren feest oonder de titel Asten Klinkt Als Een Klok.