Liev Tolstói

Leo Tolstói Лев Никола́евич Толсто́й
Única foto quelorida de Tolstoi, an Yasnaya Ployana (1908)
Nome cumpleto	Lev Nikoláievich Tolstói
Nacimiento	9 de setembre de 1828 Yasnaya Polyana Ampério Russo
Muorte	20 de nobembre de 1910 (82 anhos) Astapobo Ampério Russo
Acupaçon	scritor, remansista
Mobimiento lhiterairo	Rialismo
Assinatura

Liev Tolstói, tamien coincido cumo Léon Tolstói ó Lion Tolstoi ó Leo Tolstoy, Lev Nikoláievich Tolstói (Yasnaya Polyana, 9 de setembre de 1828 — Astapobo, 20 de nobembre de 1910) ye cunsidrado un de ls maiores scritores de todos ls tiempos.

Para alhá de sue fama cumo scritor, Tolstoi quedou famoso por tornar-se, na belheç, un pacifista, an que ls testos i eideias batian culas de las eigreijas i gobiernos, pregando ua bida simples i an prossimidade a la natureza.

Junto a Fiódor Dostoiévski, Gorki i Tchecov, Tolstói fui un de ls grandes de la lhiteratura russa de l seclo XIX. Sues obras mais famosas son Guerra i Paç, subre las campanhas de Napoleon na Rússia, i Anna Karenina, adonde denuncia l'ambiente heipócrita de la época i rializa un de ls retratos femeninos mais perfundos i sugestibos de la Lhiteratura.

Morriu als 82 anhos, de purmonie, apuis de scapar casa, percurando bibir ua bida simples.

Biografie

Anfáncia i mocidade

Cula muorte prematura de ls pais, fui eiducado por precetores. An 1851, na mocidade, l sentimiento de bazio eisistencial lhebou-lo a alistar-se ne l'eisército de la Rússia. Tal spriéncia colaborarie para que, mais tarde, se tornasse pacifista.

Durante esta época de sue mocidade, Tolstoi bubie muito, perdie mui denheiro ne l jogo i dedicaba muitas nuites para tener ancuontros cun prostitutas. Apuis, l bielho scritor repudiarie esta fase de sue bida.

Bida adulta

Ne l final de la década de 1850, preacupado cula precariadade de l'eiducaçon ne l meio rural, Tolstoi criou an Iasnaia Poliana ua scuola, para filhos de camponeses. L scritor mesmo screbiu grande parte de l material didático i, al cuntrairo de la pedagogie de la época, deixaba ls alunos lhibres, sin eicessibas regras i sin puniçones.

An 1862, casou-se cun Sónia Andreievna Bers, cun quien tubo 13 filhos. Durante 15 anhos, dedicou-se antensamente a la bida fameliar. Mas, l casamiento cun Sónia serie repleto de çtúrbios i lhuitas. Fui nessa época que Tolstoi porduziu ls remanses que l celebrizórun - "Voina i mir" (Guerra i Paç - 1865/1869) i Anna Karenina. L purmeiro, que cunsumiu siete anhos de trabalho, ye cunsidrado ua de las maiores obras de la lhiteratura mundial.

Anque mui bien-sucedido cumo scritor i famoso mundialmente, Tolstoi atormentaba-se cun questones subre l sentido de la bida i, passado zeistir d'ancontrar repuostas na filosofie, na teologie i na ciéncia, deixou-se guiar pul eisemplo de la bida simples de ls camponeses, que el cunsidrou eideal. A partir dende, tubo ampeço l período qu'el chamou de sue "cumberson".

Cumberson

Seguindo al pie de la lhetra la sue anterpretaçon de ls ansinamientos crestianos, Tolstói ancuontrou l que percuraba, crestalizando-se anton ls percípios que nortearian sue bida a partir daquel sfergante.

L cristandade de l scritor recusou l'outoridade de qualquiera gobierno ourganizado i de qualquiera eigreija. Craticou tamien l dreito a la propiadade pribada i ls tribunales i pregou l cunceito de nó-bioléncia. Para difundir sues eideias Tolstoi dedicou-se, an panfletos, ansaios i pieças teatrales, a craticar la sociadade i l'anteletualismo stéril. Tales eideias puostas tan splicitamente causórun cunfuson ne ls fans de l famoso scritor i anfluenciarian un amportante fan: Gandhi, nesta época inda na África de l Sul.

Passado sue "cumberson", Tolstói deixou de buber i fumar, tornou-se begetariano i passou a bestir-se cumo camponés. Jaime de Magalhães Lima que bejitou i correspondiu-se cun Tolstoi screbiu: “Lion Tolstoi fui un adeto i un apóstolo de l begetarismo. I nun ye pouco nin anseneficante que un tal sprito i tan sublimado coraçon aporfilhasse i praticasse essa doutrina, que l'einércia moral i l poder de l bício çprézan ó scarnécen na cegueira própia de la sue particular streiteza.” Cumbencido de que naide debe depender de l trabalho alheno passou a lhimpar sous aposentos, arar l campo i porduzir las própias roupas i botas. Sues eideias atraíran seguidores, que se chamában "tolstoianos". Decediu abrir mano de recebir ls dreitos outorales de ls lhibros que benerie a screbir, solo boltou a querer outelizar este denheiro quando percisou angariar fondos para trasportar pa l Canadá ua quemunidade de camponeses preseguidos pul gobierno.

Tolstoi chegou a ser begiado pula polícia de l czar. Debido a sues eideias i testos, fui squemungado pula Eigreija Ourtodoxa russa, an 1901. Alguns de sous amigos i seguidores fúrun tamien eisilados. Tolstoi solamente nun fui preso porque era adorado an todo l mundo cumo un de ls maiores nomes de l'arte de sou tiempo.

Mas Tolstoi nun cunseguie alcançar la simplecidade an qu'acraditaba. Sue família, specialmente la mulhier Sónia, cobraba-le ls lhuxos i riquezas que stában aquestumados. Ls filhos dában rezon a la mai, a quien Tolstói amaba i qu'amanaçaba matar-se quando l scritor fazie mençon d'abandonar la casa.

Sónia, qu'habie-le dedicado la bida, cobraba que l scritor deixasse para eilha, an testamiento, ls dreitos outorales de las obras que fizo na fase final de sue bida. Tolstoi, por sue beç, eilaborou un testamiento secreto, ne l qual passarie todos ls dreitos outorales a un tolstoiano de nome Chertkov, que tornarie sue obra pública.

Als 82 anhos d'eidade, Tolstoi decide, anfin, scapar de casa i abandonar la família para lhargar aqueilha bida na qual el nun mais acraditaba.

Muorte

Durante alguns dies scapou cun éisito. Ne ls camboios i nas staçones por que passaba, Tolstoi era recoincido por todos, yá qu'era l'home mais famoso de la Rússia. Mas, debido la sue perferéncia an biajar an bagones de terceira classe, adonde habie friu i fumaça, l yá debelitado scritor cuntraiu ua purmonie, que fui agrabando debrebe. Ne l die 20 de nobembre de 1910, l bielho scritor morriu durante la fuga, de purmonie, na staçon ferrobiária de Astapobo, porbíncia de Riazan.

L camboio funerairo que trazie sou cuorpo fui recebido por camponeses i ouparairos que bebian cerca de la propiadade de ls Tolstoi. Sou caixon fui carregado seguido por ua multidon de 3 a 4 mil pessonas. L númaro tenerie sido inda maior se l gobierno de San Petesburgo nun tubisse proibido la benida de camboios speciales de Moscobo pa l'antierro de l scritor. Sue muorte fui noticiada ne ls percipales jornales de l mundo.

Eideales

Prossimidade cul anarquismo

Modelo:Portal-anarquiePara Tolstoi, ls Stados, las eigreijas, ls tribunales i ls dogmas éran solo ferramientas de dominaçon duns poucos homes subre outros, mas repudiaba la classeficaçon de sous eideales cumo sendo anarquistas. Fui citado pul scritor anarquista russo Piotr Kropotkin ne l'artigo Anarquismo de la Anciclopédia Británica de 1911 i alguns pensadores l cunsídran cumo un de ls nomes de l Anarquismo crestiano. Outra aprossimaçon cul anarquismo se dou an 1862, quando Tolstói, an biaige pula Ouropa, bejitou l'outor anarquista Proudhon. Este staba a screbir un testo chamado "La guerre eit la paix", cujo títalo Tolstói perpositalmente outelizou an sou maior remanse.

L scritor nun se outo-ancaixaba ne l anarquismo i nun acraditaba an guerras i reboluçones biolentas cumo seluçon para qualesquiera porblemas, mas si an reboluçones morales andebiduales que lhebarian a las berdadeiras mudanças. Afirmaba que sues teses se baseában na bida simples i próssima a la natureza de ls camponeses i ne l eibangelho i nó nas teories sociales de sou tiempo.

La busca pul natural

Modelo:Portal-AmbienteAnque afirmar tener-se cumbertido ne l derradeiro período de sue bida i de renegar sous trabalhos mais famosos, ancóntran-se nestes mesmos testos dibersas refréncias subre la busca de l'outor por ua bida simples i próssima a la natureza. Segundo l scritor George Woodcock an "La Stória de las eideias i mobimientos anarquistas", an todos ls remanses que Tolstoi screbiu quando mais nuobo, el "cunsidra la bida tanto mais berdadeira quanto mais próssima de la natureza".

Bários fúrun ls personaiges criados nesta época que repersentában l'eideal de bida simples i natural. An "Ls Cossacos" son ls camponeses meio salbaiges dua ária remota de l Cáucaso; An Guerra i Paç ye l personaige Platon que ye çcrito ne l lhibro cumo la personificaçon de la berdade i de la semplicidade: "Sues palabras i açones brótan del cula mesma spontaneidade que l aroma brota de la flor". An Anna Karenina outro camponés, tamien chamado Platon, ye l simblo desta aspiraçon de Tolstói.

Inda antes, na anfáncia, Tolstói alimentaba, junto als armanos, un suonho de fraternidade total. Eilhes acraditában que l circlo fraterno que formában poderie ser spandido i anglobar l'houmanidade anteira, eileminando todos ls porblemas. L lhocal adonde esta outopie fui eidealizada, sob la selombra dua arble nun bosque de la Rússia, ye l lhocal adonde fui anterrado Tolstói, cunforme el pedira, i tamien mais un sou armano.

Pacifismo

Tolstoi quedou famoso por ser un pacifista. Nas palabras de Mahatma Gandhi, cun quien Tolstói trocou correspondéncia, l scritor fui l maior "apóstolo de la nó-bioléncia". Ne l lhibro "L Reino de Dius stá an bós", Tolstoi baseia-se ne l Sermon de la Muntanha para afirmar que nun se debe rejistir al mal outelizando-se de l própio mal.

Ne l mesmo lhibro, cuntinando sou pensar pacifista, l scritor dezie ser cuntrairo al serbício melitar oubrigatório (i al melitarismo cumo un todo). El tamien defende i salta pobos cumo ls Quakers, que percúran la semplicidade, l'outonomie i nun outelízan de bioléncia.

Religiosidade sin dogmas

Fui squemungado pula Eigreija Ourtodoxa Russa, religion dominante ne l sou paíç, depuis de tanto critica-la. L scritor antendia cumo dogmas eirracionales, que serbian para dominar l pobo, alguns de ls cunceitos mais caros a la Eigreija. Cunsidraba i seguie la doutrina de Jasus, mas achaba ampossible, por eisemplo, que Jasus podisse ser un home i Dius, al mesmo tiempo. Para Tolstoi, Dius staba nas própias pessonas i an sues açones i Jasus tenerie sido, para el, l'home que melhor soubo sprimir ua cunduta moral que gerasse justícia, felcidade i eilebasse spritualmente a todos ls homes.

Sou cristandade eisacerbada, na fin de sue bida, assemelhaba-se al cristandade primetibo. An alguns trabalhos publicados, sous testos fúrun muito mais lhoinge que sues atitudes pessonales, cumo an "Sonata a Kreutzer", que mostra ua tendéncia a saltar l celibato, mas l scritor inda tubo filhos depuis desta obra. Pouco antes de sue muorte, ls sous amigos acunselhórun-lo a retratar-se cula Eigreija, mas este recusou.

Citaçones

Se quieres ser ounibersal, ampeça por pintar la tua aldé. —Liev Tolstói

Ls ricos fázen todo puls pobres, menos decer de las cuostas deilhes. —Liev Tolstói

Anquanto houbir matadouros, haberá campos de guerra. —Liev Tolstói

Todos pénsan an mudar l mundo, mas naide pensa an demudar-se a el própio. —Liev Tolstói

An ban, cientos de miles d'homes, amontonados nun pequeinho spácio, sforçában-se por çfigurar la tierra an que bebian. An bano, la cobrian de piedras para que nada podisse germinar; an bano arrincában las yerbas tenras que pugnában por eirromper; an bano ampregnában l'aire de fumaça; an bano scorraçában ls animales i ls páixaros - An bano… Porque até na cidade, la Primabera ye Primabera. —Tolstói, an "Ressurreiçon"

L'home puode bibir 100 anhos na cidade sin antender que yá stá muorto hai mui tiempo — Tolstói, an "Sonata a Kreutzer

La felcidade ye star cula Natureza, ber la Natureza i cumbersar culha. — Tolstói, an "Ls Cossacos"

Alguas obras

• Anfáncia (1852)
• Adolecéncia (1854)
• Mocidade (1856)
• Crónicas de Sebastopol (1855-1856)
• La felcidade cunjugal (1858)
• Cossacos (1863) - çcribe la bida deste pobo.
• Guerra i Paç (1865-1869) - ye ua menumental obra, na qual Tolstói çcribe dezenas de defrentes personaiges durante l'ambason napoleónica de 1812, na qual ls russos ancendiórun Moscobo.
• Anna Karenina (1875-1877) - cuonta las stórias paralelas dua mulhier presa nas cumbençones sociales i un propiatairo de tierras filósofo (reflexo de l própio Tolstói), que tenta melhorar la bida de ls sous serbos.
• Cunfisson (1882)
• L reino de Dius stá an bós (1894)
• La muorte de Ivan Ilitch (1886)
• La sonata a Kreutzer (1889)
• L que ye arte? (1898)
• Ressurreiçon (1899)
• Babine - l parbo - pieça de triato anfantil
• Obras Pedagógicas
• Nun me puodo calhar
• Cuontas populares
• L Diabro i Outras Stórias - belume de cuntos
• Cuontas de la Nuoba Cartilha - 2005
• Kholstomér, la Stória dun Cabalho[1]

Lhigaçones sternas

• La bida de Tolstói Arquibado an 2009-08-26 ne l Wayback Machine.
• Romain Rolland, The Lhife of Tolstoy (1911) Arquibado an 2010-06-13 ne l Wayback Machine. (la Bida de Tolstoi, por Romain Rolland, an anglés).