Lompat ke isi

Negeri Sembilan

Wikipedia Minangkabau - Lubuak aka tapian ilimu
Nagari Sambilan
Negeri Sembilan
Nogoghi Sombilan, Nogoghi Smilan
Nagara Bagian
Negeri Sembilan Darul Khusus
نڬري سمبيلن دار الخصوص
Bandera Nagari Sambilan
Bendera		Lambang Nagari Sambilan
Lambang
Lagu: Berkatlah Yang DiPertuan Besar Negeri Sembilan
   Nagari Sambilan di    Malaysia
   Nagari Sambilan di    Malaysia
Koordinat: 2°45′N 102°15′E / 2.750°N 102.250°E / 2.750; 102.250
Ibu kotaSeremban
Kota RajoSeri Menanti
Pamarintahan
 • JinihMonarki pamiliahan
 • Yang Dipatuan BasaTuanku Muhriz
 • Mantari Basa (Mentoghi Bosa)Aminuddin Harun (PKR)
Laweh[1]
 • Total6.686 km2 (2,581 sq mi)
Panduduak (2010)[2]
 • Total997.071
 • Kapadatan150/km2 (390/sq mi)
Indeks Pambangunan Manusia
 • HDI (2010)0.739 (high) (5th)
Kode Pos70xxx to 73xxx
Kode telepon06
Plat kandaraanN
Panjajahan Inggirih1824
Pandudukan Japang1942
Malaysia1957
Situs webwww.ns.gov.my

Negeri Sambilan atau Nagari Sambilan (baso Nogoghi: Nogoghi Sombilan, Noghoghi Smilan; baso Malayu: Negeri Sembilan) adolah salah satu dari 13 nagari dalam konstitusi Malaysia, talatak di pantai barat Semenanjung Malaya, di selatan Kuala Lumpur sarato babatehan jo Selangor di utara, Pahang di timur, sarato Malaka jo Johor ka selatan.

Nagari Sambilan daulunyo marupoan federasi atau gabuangan dari babagai nagori nan manjadi luak, nan dibangun dek parantau Minang. Nagari Sambilan dipimpin dek Yang Dipertuan besar nan dipiliah dek Undang Nagari Sambilan nan barisi ampek urang panguaso nan bakadudukan di Sungai Ujong, Jelebu, Johol, jo Rembau.

Sijarah

[suntiang | suntiang sumber]
!Artikel utamo untuak bagian ko adolah: Sijarah Nagari Sambilan

Nagari Sambilan pado mulonyo diuni dek urang-urang asali nan tadiri dari urang Semelai, Semai, jo Jakun. Katigo etnis tu iduik bapindah-pindah, baburu, sarato maambiak hasil utan dan ado juo nan lah mulai baladang.

Pado awa abaik ka-14, urang-urang Sumatera dari Minangkabau mulai marantau ka Nagari Sambilan malalui Malaka inggo sampai ka Rembau sarato manaruko di situ di bawah palinduangan Kasultanan Malaka, kudian dilinduangi Kasultanan Johor.[3] Migrasi mancapai puncak pado abaik ka-15 inggo abaik ka-16.[4] Urang Minangkabau mambaok adat nan matrilineal dan manjadi mayoritas, sarato manjadikan Sungai Linggi sabagai rute dagang utamonyo.[5][6] Urang Minangkabau ko baasimilasi jo urang-urang asali inggo barasil tajadi panikahan di antaro kaduo kalompok panduduak ko. Katurunan dari kadunyo dinamokan jo suku Biduanda (Dondo). Suku Biduanda ko adolah pawarih asa Nagari Sambilan dan apobilo mamiliah pamimpiin mangko anyo dari suku ikolah nan dipiliah. Urang-urang Minangkabau nan tibo kudian basuku manuruik asa kampuangnyo surang di Minangkabau. Pado galombang rantau urang Minang ko barasa dari Limopuluah Koto jo Tanah Data.[7]

Namo Nagari Sambilan mulai digunokan sajak abaik ka-16 untuak marujuak pado pamukiman baru nan ditaruko urang-urang Minang dan babantuak nagari nan mancakuik sambilan nagari. Nagari ko disabuik jo luak nan dipimpin dek Undang (datuak-datuak pangulu nan mamimpin nagari). Nagari-nagari tu di antaronyo Jelebu, Klang, Johol, Rembau, Sungai Ujong, Jelai, Naning, Segamat, jo Pasir Besar. Kasambilan nagari tu mambuek sistem pasakutuan nan disabuik Limbago Nagari Sambilan. Limbago Nagari Sambilan ado dalam naungan Kasultanan Johor.[8]

Kuaso Johor di Nagari Sambilan malamah pado abaik ka-18 dek Bugih manyarang, sainggo mamaso urang-urang Minang diwakili urang-urang gadang nagari (Pangulu) mancari palinduangan ka tanah asa, Pagaruyuang. Rajo Alam Minangkabau, Sultan Abdul Jalil, mangirim dunsanaknyo, Rajo Malewa. Katiko lah sampai baliak di Nagari Sambilan, alah batagak karajaan dibawah pimpinan Rajo Khatib. Kudian Rajo Melewar maumuman parang malawan Rajo Khatib inggo manjadi pamimpin Nagari Sambilan. Sultan Johor maagiah gala Yamtuan Seri Menanti atau Yang di-Patuan Basa Nagari Sembilan pado 1773. Sasudah kamatian Rajo Malewa, tajadi sarangkaian pasalisiahan takaik suksesi. Untuak maso nan lamo, pangulu acok manjapuik rajo ka Pagaruyuang. Namun, dek pasaiangan di antaro kandidaik nan dicalonan, acok barakhia jo parang sudaro. Samantaro manuruik ''Daghregister'', pado taun 1677 panduduak nan bamukim di Sungai Ujong, Rembau jo Naning, disabuikan alah dipimpin dek ''Rajo Ibrahim'' dari Minangkabau.[9][10]

Antaro bulan Agustus 1831 sampai Juli 1832, tajadi palawanan masyarakaik di Naning, palawanan ateh kolonialisasi Inggris. Parang ko indak lapeh dari pangaruah Pajanjian London taun 1824. Salapeh mandapek Malaka dari Balando, pamarintah kolonial Inggirih mamasuakan Naning sabagai bagian dari Malaka sajak taun 1827. Kudian masyarakaik Naning musti mambayia pajak pado residen Inggirih di Malaka, dan hal iko ditantang dek panduduak Naning, saingga pacah parang nan tanamo jo Parang Naning.

Pado 1873, Inggirih turuik sato dalam parang sudaro di Sungai Ujong dek manjago kapantiangan ekonomi sarato untuak maambiak aliah kandali daerah tu. Jelebu jatuah ka tangan Inggirih pado 1886, jo nagari-nagari lain nan tasiso pado 1895. Pado 1897, katiko Nagari-Nagari Malayu Basakutu (Federated Malay States, FMS) tabantuak, Sungai Ujong jo Jelebu bagabuang baliak jo konfeserasi nagari-nagari ketek lainnyo dibawah namo Nagari Sambilan, ditampekan dalam ciek Residen dan manjadi anggota FMS. Namun Naning tatap manjadi bagian Malaka, baitu pulo jo Klang dek Selangor, sarato Segamat dek Johor.[11] Ukuran Nagari Sambilan kini manjadi labiah ketek pado ukuran Nagari Sambilan saisuak.[12]

Nagari Sambilan maalami panduduakan Japang pado Parang Dunia II antaro 1942 inggo 1945, kudian bagabuang baliak jo Federasi Malaya pado 1948, nan manjadi nagara Malaysia pado 1963.

Pamarintahan

[suntiang | suntiang sumber]
Istano Sari Mananti lamo, pusek pamarintahan Nagari Sambilan saisuak.

Sistem pamarintahan mulo-mulo

[suntiang | suntiang sumber]
!Artikel utamo untuak bagian ko adolah: Yang Dipatuan Basa Nagari Sambilan

Sasudah adonyo limbago di Nagari Sambilan, kudian pangulu manjapuik putra Yang Dipatuan Pagaruyuang nan dianggap sabagai katurunan Iskandar Zulkarnain, tokoh lagenda Alam Minangkabau, untuak mamimpin institusi karajaan di Sri Menanti. Pakambangan barikuiknyo jo dek adonyo katurunan Sang Sapurba di Nagari Sambilan sarato pado wakatu basamoan di darek Minangkabau pacah Parang Pidari, mangko malalui Undang yang Ampat dipiliahlah katurunan diraja nan ado di Nagari Sambilan untuak manjadi Yang Dipatuan Basa Nagari Sambilan.

Kadudukan Undang yang Ampat baitu istimewa dalam Karajaan Nagari Sambilan, dek mamiliah jo malewa gala rajo untuak Nagari Sambilan, saroman jo fungsi Datuk yang empat dalam struktur pamarintahan Kasultanan Siak Sri Indopuro. Kadudukan Undang yang Ampat ko kamungkinan juo dipangaruahi dek adonyo Basa Ampek Balai dalam struktur Karajaan Pagaruyuang.

Bagabuang jo Malaysia

[suntiang | suntiang sumber]

Salapeh kamardekaan Malaysia, kudian pado 16 September 1963 manjadi nagara bagian Federasi Malaysia. Nagari Sambilan nan mulonyo diambiak dari sambilan daerah, kini tingga tujuah.

Peta Nagari Sambilan, barikuik daerah pamiliahan anggota dewannyo.

Negeri Sembilan terdiri daripada 9 luak iaitu :-

Kudian dalam pamarintahan nagara bagian dibantuak 36 Dewan Undangan Negeri (DUN) di Nagari Sambilan nan mawakili kawasan barikuik:

  1. Chennah
  2. Pertang
  3. Sungai Lui
  4. Klawang
  5. Serting
  6. Palong
  7. Jeram Padang
  8. Bahau
  9. Lenggeng
  10. Nilai
  11. Lobak
  12. Temiang
  13. Sikamat
  14. Ampangan
  15. Juasseh
  16. Seri Menanti
  17. Senaling
  18. Pilah
  19. Johol
  20. Labu
  21. Bukit Kepayang
  22. Rahang
  23. Mambau
  24. Senawang
  25. Paroi
  26. Chembong
  27. Rantau
  28. Kota
  29. Chuah
  30. Lukut
  31. Bagan Pinang
  32. Linggi
  33. Port Dickson
  34. Gemas
  35. Gemencheh
  36. Repah

Karajaan

[suntiang | suntiang sumber]

Dalam aspek administari karajaan, nagari ko tabagi dalam 8 wilayah nan tadiri dari 3 Majilih Pabandaran jo 5 Majilih Daerah, di antaronyo Majilih Pabandaran Seremban, Majilih Pabandaran Nilai, Majilih Pabandaran Port Dickson, Majilih Daerah Jelebu, Majilih Daerah Jempol, Majilih Daerah Kuala Pilah, Majilih Daerah Rembau, jo Majilih Daerah Tampin.

Kota-kota utamo di Nagari Sambilan adolah Seremban (ibu kota), Nilai, Senawang, Port Dickson, Tampin, Bahau, Rembau, Kuala Pilah, Kuala Klawang, Gemencheh jo Gemas.

Yang Dipatuan Basa Nagari Sambilan marupokan Ketua Limbago Nagari. Dibawah limbago nagari, kuaso maluluskan undang-undang ado di Dewan Undangan Nagari (DUN). Anggota Dewan Undangan Nagari tadiri dari calon-calon nan mamanangi pilihanraya (pamiliahan umum) di kawasan Dewan Undangan masiang-masiang.

Partai politik nan mamanangi mayoritas kurisi Dewan Undangan Nagari ado hak untuak dicalonkan manjadi Mantari Basa Nagari Sambilan nan dilewa dek Yang Di-Patuan Basa. Mantari Basa kudian ka mamiliah ahli-ahli Majilih Musyawarah Karajaan atau EXCO. Exco ko barasa dari kalangan ahli-ahli Dewan Undangan Nagari.

Wisma Negeri di Seremban, ibu kota Nagari Sembilan, marupokan gaduang setiausaha (sekretariat) Karajaan Nagari Sambilan nan baarsitektur Minangkabau.

Mantari Basa (Menteri Besar) Nagari Sambilan

[suntiang | suntiang sumber]
Namo Mulai batugas Salasai batugas
Tun Abdul Malek bin Yusof 1948 1953
Mohamad Salleh bin Sulaiman 1950 1951
Tun (Dr) Haji Aziz Majid April 1952 1952
Dato' Shamsuddin bin Naim 1953 1959
Mohamad Shariff bin Abdul Samad April 1959 Jun 1959
Dato' Dr. Mohd Said bin Muhammad 1959 1969
Dato' Mansor bin Othman 1969 1978
Tan Sri Dato' Seri Utama Dr. Rais Yatim 1978 1982
Tan Sri Isa Abdul Samad 1982 2004
Dato' Seri Utama Mohamad bin Haji Hassan 2004 2018
Dato' Seri Aminuddin Harun 2018 Kini

Panduduak

[suntiang | suntiang sumber]

Nagari Sambilan mampunyoi tujuah buah daerah

Urutan Daerah Panduduak 2010
1 Seremban 555,935
2 Jempol 116,576
3 Port Dickson 115,361
4 Tampin 84,889
5 Kuala Pilah 66,092
6 Rembau 43,011
7 Jelebu 39,200

Nagari Sambilan mampunyoi jumlah populasi di Malaysia sabanyak 1.021.064 urang pado taun 2010.[13] Nagari ko mampunyoi kalompok etnik nan tadiri dari kaum Malayu 57.8%, Cino 21.9%, India 14.3%, dan lain-lain 0.35%.

Agamo

[suntiang | suntiang sumber]
Agamo di Nagari Sambilan - 2010 Census[14]
religion percent
Islam
  
 60.3%
Buddha
  
 18.1%
Hindu
  
 16.5%
Kristen
  
 2.4%
Agamo Tradisional Cino
  
 0.5%
Juo
  
 1.4%
Indak ado agamo
  
 0.8%

Pado taun 2010 populasi Nagari Sembilan adolah 60,3% Islam, 21,2% Buddha, 13.4% Hindu, 2,4% Kristen, 0,5% Taoist atau agamo Cino, diikuti 1,4% agamo lain, sarato 0,8% indak baragamo.

Budayo

[suntiang | suntiang sumber]

Urang Malayu di Nagari Sambilan biaso disabuik oghang Nogoghi (urang Nagari). Urang Nagari marupokan katurunan dari urang-urang Minangkabau nan alah lamo marantau ka Nagari Sambilan nan kudian manikah jo urang-urang asali. Di antaro kasenian tradisionalnyo nan tanamo yaitu Randai.

Urang Nagari mampunyoi adat, budayo, sijarah, tradisi, jo sistem politik nan babeda jo nagari-nagari lainnyo di Malaysia. Papatah "biar mati anak, jangan mati adat" alah manjadi padoman iduik urang Nogoghi. Adat Minangkabau, nan kudian disabuik Adat Perpatih, alah ado di Nagari Sambilan sajak abaik ka-14 Masalah adat nan manjadi ciri khas Nagari Sambilan di antaronyo soal pambagian harato pusako atau sistem warih, gala adat, sarato suku nan diturunkan manuruik garih katurunan mandeh.[15]

Suku

[suntiang | suntiang sumber]

Urang Nagari tabagi ka dalam 12 suku, manuruik asa niniak muyangnyo. Suku tabantuak manuruik katurunan mandehnyo, di antaronyo:

  1. Biduanda
  2. Batu Hampa
  3. Mungkal
  4. Sarilomak (Solomak)
  5. Payakumboh
  6. Tigo Nenek
  7. Sri Melenggang (Somolenggang)
  8. Batu Bolang
  9. Tanah Data
  10. Anak Acheh
  11. Anak Melaka
  12. Tigo Batu

Pandidikan

[suntiang | suntiang sumber]

Nagari Sambilan mampunyoi babarapo buah institusi paguruan tinggi nagari jo swasta. Pusat institusi paguruan tinggi labiah rami ado di kota-kota utamo di Nagari Sambilan. Barikuik institusi paguruan tinggi nan ado:

Institusi paguruan tinggi nagari

[suntiang | suntiang sumber]
Namo institusi Singkatan Didirikan Lokasi
Politeknik Port Dickson PPD 1990 Port Dickson
Universitas Sains Islam Malaysia USIM 1998 Nilai
Universitas Teknologi MARA UiTM 1999 Kuala Pilah,Seremban,Rembau& Nilai
Politeknik Nilai PNS 2007 Bandar Enstek, Nilai
Institut Pandidikan Guru Kampus Pandidikan Teknik IPG KPT 2013 Bandar Enstek, Nilai

Institusi paguruan tinggi swasta jo kampus universitas

[suntiang | suntiang sumber]
Namo institut Singkatan Didirikan Lokasi
Kampus Universitas Internasional INTI INTI-IU 1998 Nilai
Manipal International University MIU 2011 Nilai
Kampus Internasional Nilai NU 1997 Nilai
Universitas Mayfield MFU 2005 Bahau
Kampus Universitas Linton UCL 1995 Mantin
Malaysia Theological Seminary STM 1979 Seremban
UCSI International School UCSI 1986 Bandar Springhill
Kampus Universitas Teknologi Islam UNITI 1997 Pasir Panjang, Port Dickson

Makanan

[suntiang | suntiang sumber]

Makanan tradisional Nagari Sambilan biasonyo disajikan angek jo rasonyo nan padeh dek salah satu bahan masak nan biaso digunokan yaitu lado kutu (dalam bahaso Nogoghi disabuik cili padi). Masakan nan tanamo salah satunyo Randang dagiang (dalam baso Nogoghi disabuik ghondang). Gaya masakan Minangkabau cukuik mampangaruahi masakan Nagari Sambilan, utamonyo dalam hal pamakaian lado inggo tacipta raso padeh dalam masakannyo. Masakan lainnyo nan khas Nagari Sambilan yaitu Masak Lomak Cili Padi, sarupo gulai nan barisi ikan, dagiang, atau sayua, bamasak dalam santan nan bacampua kunyik jo lado kutu.

Makanan lain nan khas Nagari Sambilan adolah Lomang, puluik dimasak jo santan dalam batang buluah dibaka ateh baro api. Biasonyo urang Nogoghi maidangkan basamo jo Randang.[16]

Rujuakan

[suntiang | suntiang sumber]
  1. ↑ "Laporan Kiraan Permulaan 2010". Jabatan Perangkaan Malaysia. hlm. 27. Diarsipkan dari versi asli tanggal 2010-12-27. Diakses tanggal 2011-01-24. 
  2. ↑ "Laporan Kiraan Permulaan 2010". Jabatan Perangkaan Malaysia. hlm. iv. Diarsipkan dari versi asli tanggal 2010-12-27. Diakses tanggal 2011-01-24. 
  3. ↑ Reniwati, R. (2012). Bahasa Minangkabau dan Dialek Negeri Sembilan: Satu Tinjauan Perbandingan Linguistik Historis Komparatif Archived 2020-01-12 di Wayback Machine.. Wacana Etnik, 3(1), 71-86.
  4. ↑ Situs Resmi Kerajaan Negeri Sembilan, Sejarah Berdiri http://www.ns.gov.my/my/kerajaan/info-negeri/sejarah-penubuhan Archived 2019-10-08 di Wayback Machine.
  5. ↑ "archive copy". Diarsipkan dari versi asli tanggal 2018-07-28. Diakses tanggal 2019-09-14. 
  6. ↑ https://museumvolunteersjmm.com/2016/04/04/the-minangkabau-of-negeri-sembilan/
  7. ↑ Zed, Mestika Hubungan Minangkabau Dengan Negeri Sembilan. Working Paper. FIS UNP, Padang.
  8. ↑ Zed, Mestika Hubungan Minangkabau Dengan Negeri Sembilan. Working Paper. FIS UNP, Padang.
  9. ↑ "Kesinambungan Raja-raja Melayu". Utusan Online. Diarsipkan dari versi asli tanggal 2018-10-07. Diakses tanggal 2018-10-07. 
  10. ↑ Situs Resmi Kerajaan Negeri Sembilan, Sejarah Berdiri http://www.ns.gov.my/my/kerajaan/info-negeri/sejarah-penubuhan Archived 2019-10-08 di Wayback Machine.
  11. ↑ Mohd Shah bin Mohd Said al-Haj, Tambo Alam Naning, DBP, 2000, ms 164
  12. ↑ Zed, Mestika Hubungan Minangkabau Dengan Negeri Sembilan. Working Paper. FIS UNP, Padang.
  13. ↑ "Laporan Kiraan Permulaan 2010". Jabatan Perangkaan Malaysia. hlm. iv. Diarsipkan dari versi asli tanggal 2010-12-27. Diakses tanggal 24 Januari 2011. 
  14. ↑ "2010 Population and Housing Census of Malaysia" (PDF). Department of Statistics, Malaysia. Diarsipkan dari versi asli (PDF) tanggal 2019-01-06. Diakses tanggal 2012-06-17.  p. 13
  15. ↑ "archive copy". Diarsipkan dari versi asli tanggal 2014-10-27. Diakses tanggal 2019-09-15. 
  16. ↑ "archive copy". Diarsipkan dari versi asli tanggal 2018-07-28. Diakses tanggal 2019-09-14. 
Diambiak dari "https://min.wikipedia.org/w/index.php?title=Negeri_Sembilan&oldid=2615043"