Harmônia
Ny harmônia dia zavamaneno tsofina, izany hoe mandeha amin' ny rivotra, misy lela metaly manify maro mipararetra anaty fefimerana mamoaka feo, misy andalan-kitendry sy tafoforana voizin-tongotra (amin' ny ankapobeny) izay miantoka ny rivotra hampanenoana azy.
Mora kokoa noho ny ôrga ny harmônia izay nampiasaina betsaka any amin' ny trano fiangonana kely sy any an-tranon' olon-tsotra tamin' ny taonjato faha-19, saingy voafetra kokoa ny hamafin' ny feony sy ny karazam-peo ao aminy. Matetika ny harmônia no manana andalan-kitendrin-tanana iray na indraindray roa, fa ny kitendrin-tongotra kosa dia tsy fahita firy. Manana karazam-peo maro kokoa ny harmônia tsara, ary matetika koa no fanaka tena tsara voatra ny vatan' ny harmônia natokana ho an' ny fiangonana sy ny tranon' ny mpanankarena.
.jpg)
Ankoatry ny harmônia mahazatra dia misy ny manana endrika kely kokoa. Lasa fitaovana ampiasaina indrindra ao amin' ny Zana-kôntinenta Indiana ny harmônia indiana izay azo entina mandehandeha sady misy tafoforana voizina amin' ny tanana - nalaina tahaka amin' ny harmônia kely mpiasain' ny Tandrefana amin' ny hampianarana hira na mozika tamin' ny taonjato faha-19, atao amin' ny teny frantsay hoe "guide-chant". Ampiasain' ny Siky sy ny Hindo ary ny Mozilmana, amin' ny karazan-kira fampaherezam-panahy, toa ny qawwali, ny ghazal, ny kirtan ary ny bhajan, ny harmônia indiana.