Sgrif

Quest articol chì l'è scrivud in lombard, con la Noeuva Ortografia Lombarda

I sgrif a inn di lavorà che a se troeuven a l'estremità di sciampe de la pupart di mamifer, usei e un quai retil.

Inn di fanere a forma de rampinera. La parolla sgrif la poeul anca vesser doperada per i invertebrad, un quajcoss de compagn el poeul vesser de fad trovad in di artropod coma i bordoch o i ragn, che a gh'hann una strutura rampinada conligada in manera direta a la sciampa o al tars in manera de podé ciapà mej i robe o per podé andà in su una qualsessia superfis. I sgrif a poeuden vesser doperad per ciapà e tegnì franca una ciapada, sgarlà o rampegàss in su i piante. I sgrif a inn componid de una proteina resistenta ciamada cheratina. Esisten apendis compagn che però a inn minga rampinade e guzz e donca ciapen el nom de onge. In passad, i sgrif de leon, tigher e ors vegniven doperad in de la costruzzion de ornament, collane e fermaj. Incoeu la produzzion a l'è vegnuda illegala perchè part de animai protesgiud.

In di tetrapod

In di tetrapod, i sgrif a inn de cheratina spartid in du strad. L'ongia (unguis) a l'è la part de foeura e pussee dura, formada de fiber de cheratina metude in perpendicolar a la direzzion de cressida e stratifegade in obliquo.

In di mamifer

Inn element a la fin di did di sciampe che serven per sgarlà, ciapà su e a defendess. Inn de longhezza variabila a segonda di speci e inn formade de alfa cheratina. In de l'om l'equivalent inn i ongie. Un'ongia assee granda de podé tegnì un bell pes a l'è ciamada zocor. I sgrif a poeuden vesser protratel (scondud e tirad foeura de l'animal), semi-protratel, minga protratel né retratel, semi-retratel o retratel (tirad foeura normalment e scondud de l'animal). Di voeulte la cressida di sgrif la se ferma e la repart, coma el vegn in di pel. L'unega diferenza a l'è che i pel borlen sgiò per poeu vesser sostituid an'mò, in di sgrif, inscambi, el vegg segment el vegn perdud. El process de sostituzzion de l'ongia del mazza-pioeugg de l'om el ciama devers mes. Tant animai vegnen despess vedud in de l'at de "molàss i ongie" sora un toch de legn o olter material, quei selvategh ghe n'hann minga besogn desgià che i so a se consumen indeperlor al contat cont el terren. I animai domestegh coma (cavai, asen e mul) despess a gh'hann besogn de una spuntada ai zocoi cont un maniscalch, a causa del so poch moviment in su terren dur.

In di artropod

I sgrif a inn di espansion de chitina in su i segment terminai di (tars) di art. A inn minga equivalent de un pont de vista filogenegh ai sgrif di tetrapod.

Ligam de foeura

(EN) Sgrif, in su Enciclopedia Britanega, Encyclopædia Britannica, Inc.

Alter proget

Wikiquote el gh'ha dent citazzion de o su Sgrif
Wikimedia Commons el gh'ha dent imagin o alter archivi su Sgrif