Arri Aper
L'Arri Aper (Arrius Aper in Latin; ...-284) l'è staa on general roman.
Sòcer de l'imperador Numerian, l'Aper l'era prefett del pretòri de l'imperador March Aureli Car, pader del Numerian. El Car, el Numerian e l'Aper hinn partii per ona campagna in Mesopotamia contra i Sassanid; dòpo ona quaj vittòria, el Car l'è mòrt e 'l Numerian, divegnuu imperador, l'ha deciduu de portà l'esercit drent aj confin de l'Imperi, ma l'è staa colpii de ona maladia aj oeugg, e 'l Car el ghe ha daa el consili de stà in d'ona lettiga serrada duranta tutt el viagg. Chì el Numerian l'era separaa de tucc, e domà l'Aper el podeva intràgh, sentìll e poeu dì aj soldaa i ordin imperiaj.
Quand l'esercit l'è rivaa a Calcedònia, la spuzza che la vegniva de la lettiga l'ha convinciuu i soldà a avrìla: drent hann trovaa el cadaver del Numerian, in avanzaa statt de decomposizion. L'Aper l'è staa accusaa de avè coppaa l'imperador per podèn ciappà el pòst grazie a di fint ordin imperiaj. A presedè el process l'è staa ciamaa el comes domesticorum Diòcle, che l'ha reconossuu l'Aper colpevol e, senza spettà la difesa de l'imputaa, l'ha coppaa deperlù. El Diòcle l'è staa proclamaa imperador cont el nòmm de Dioclezian, e l'è andaa a combatt l'imperador legittim, el Carin, fioeu del Car, che in quell moment el se trovava in Britannia.