Gherardo del Colle

ZE	Quésta pàgina a l'é scrîta in zenéize, segóndo a grafîa ofiçiâ

Pàddre Gherardo del Colle

Gherardo del Colle (Çexìn, 26 de frevâ do 1920 - Pontedêximo, 20 de màrso do 1978) o l'é stæto 'n françescàn, scritô e poêta lìgure.

Vìtta

O Gherardo del Colle, a-o sécolo Paolo Repetto, o l'é nasciûo a Çexìn a-i 26 de frevâ do 1920 da-o Giovanni e a Rosa Repetto.

O l'é intròu into Semenâio Seràfico de l'Órdine di fràtti minoî capuçìn de Cànpi, dond'o l'é vestîo l'abitìn a-i 14 d'agósto do 1935. Do 1942 o l'à emìsso a seu profesción religiôza solénne e o l'é stæto ordinòu præve. Pe tòsto trent'ànni o l'à mostròu a letiatûa italiànn-a into Stùdio Filozòfico di Capuçìn de Sànn-a. O seu ministêro o s'é intravegnûo tra vàrri convénti da provìnsa lìgure di capuçìn, cómme Pontedêximo, a Madònna de Gràçie de Vôtri, Vâze, Sànn-a, Votàggio e Sàn Benardìn de Castelétto. Pe de ciù, o l'é stæto o capelàn de l'Uspiâ Sàn Martìn, a Zêna.

Inta seu vìtta o l'é stæto poêta, scritô, profesô de letiatûa, outô de tiâtro, conlaboratô de revìste leterâie e giornalìsta. O l'à comensòu a scrîve de poêxîe da zóveno, pubricæ inte arecugéite Rosso di Sera (1946), Biancospino (1957), Sotto la Gronda (1964), L'Angelo dei Suburbi (1971) e Poesie 1937-1970 (1975). O l'à scrîto di tèsti pò-u tiâtro ascì, ségge in italiàn che in lìgure, e o l'à conlaboròu con bén bén de giornâli. Prezénpio o l'à pubricòu ciù de 120 artìcoli d'ética e de crìtica leterâia in sce L'Osservatore Romano, ciù che in scî cotidién zenéixi Il Cittadino e Corriere Mercantile; pe Lo Scolaro o l'à scrîto i tèsti de strìsce inlustræ pe-i figeu. O l'é stæto amîgo e corispondénte di poêti Giorgio Caproni e Angelo Barile e de bén bén d'inteletoâli cómme o Salvatore Quasimodo, l'Ettore Serra e l'Eugenio Montale.

In sciâ fìn, o Gherardo del Colle o l'é mòrto inte l'Uspiâ Andrea Gallino de Pontedêximo a-i 20 de màrso do 1978. A-a seu memöia l'é stæto dedicòu 'n pontétto in sciô Ponçéivia, da-arénte a-o convénto di capuçìn.

Crìtica

Inta seu poética, o Gherardo del Colle o se fà conósce pi-â seu conplescitæ e profonditæ, sénsa limitâse a-i têmi religiôxi ma tratàndo de costioìn sociâli e contenporànie ascì. Inte çèrti di seu tèsti se trêuva 'n sénso de sdégno e pietæ, méntre di âtri esprìmman ràggia e smariménto pe l'agrûa e a gramìçia da socjêtæ modèrna. L'outô o l'é aprexòu pi-â seu capaçitæ de lödâ a vìtta inte tùtte e seu fórme, da-a contentéssa a-a tristéssa, con sinceritæ e in mòddo sccétto. E seu poêxîe, che vàn da-a löde a-o Segnô a-a riflesción intèrna e a-o dô pe-i fæti do móndo, én tùtte caraterizæ da 'n método stilìstico rigorôzo.

Inta seu ativitæ de dramatùrgo, ségge in italiàn che in lìgure, o s'é inspiròu in mòddo originâle a l'Achille Campanile e a-o zóveno Eugène Ionesco, pe pigiâ da liâtri di træti cómme l'umorìsmo verbâle ùnico, e tràmme paradosâli, e açioìn condensæ, e sitoaçioìn no lògiche e i personàggi còmichi. I riferiménti a-o Campanile se véddan inte l'ironîa futurìsta, inte cùrte gag e inta parodîa do parlâ de tùtti i giórni; co-e sciortîe do Campanile e do Ionesco che se seméggian a quélle do Gherardo del Colle. I tèsti de tiâtro són caraterizæ da nonsense, zêughi de pòule, paradòsci, umorìsmo fìn e sciortîe elegànti.

Êuvie

• (IT) Gherardo del Colle, Letteratura italiana, Zêna, s.e., 19??.
• (IT) Gherardo del Colle, Nelle strade dei bimbi: (1938-1941), Zêna, s.e., 1942.
• (IT) Gherardo del Colle, Rosso di sera, Zêna, Del Gallo, 1946.
• (IT) Carlesi Dino e Gherardo del Colle (confidençiâle de), All'affanno del tempo: liriche, Bèrgamo, Baldamenti, 1952.
• (IT) Gherardo del Colle, L'anello di santa Caterina: azione sacra in tre parti, Vâze, s.e., 1957.
• (IT) Gherardo del Colle e Angelo Barile (introduçión de), Biancospino, Viçénsa, La Locusta, 1957.
• (IT) Gherardo del Colle (a cûa de) e Gisberto Ceracchini (inlustraçión de), Lauda natalizia del 1600, Zêna, s.e., 196?.
• Gherardo del Colle, Peccóu veniale: (lamenti, pentimenti e patimenti, cômme commenti e cômme avvertimenti ä vitta spirituale di Conventi), Vôtri, s.n., 1962.
• (IT) Gherardo del Colle, Critica, Ligùria, s.e., 1964.
• (IT) Gherardo del Colle, Sotto la gronda, Viçénsa, La Locusta, 1965.
• (IT) Gherardo del Colle, Corso speciale, Ligùria, s.e., 1966.
• (IT) Gherardo del Colle e Angelo Maria Ripellino (traduçioìn de), La poesia russa del Novecento, Sànn-a, s.e., 1966-1967.
• (IT) Gherardo del Colle, Schediario (serie 1-5), Sànn-a, s.e., 1967.
• Gherardo del Colle e Luigi Caldanzano (inlustraçioìn de), Peccóu veniale, oscïa Lamenti, pentimenti e patimenti comme commenti e comme avvertimenti ä vitta spirituale di conventi; tersa ristampa (e sempre fâeta a man]) però co-e novitâe di disegni de Luiggi Caldanzan e d'ûn Dixzionäietto ch'o fa capî con ciû facilitâe e parolle de questo pöemetto, Sànn-a, s.e., 1967.
• (IT) Gherardo del Colle, Guanciali e testoline (noterelle di un cappellano d'ospedale), Zêna - Sàn Pê d'Ænn-a, Scuola Grafica Don Bosco, 1968.
• Gherardo del Colle e Beppe Dellepiane (inlustraçioìn de), Peccóu veniale: (lamenti, pentimenti e patimenti, cômme commenti e cômme avvertimenti ä vitta spirituale di Conventi), Zêna, 1968.
• (IT) Gherardo del Colle, Il problema del rapporto fra l'Uomo e Dio in Jean-Paul Sartre e Gabriel Marcel, Séstri-Sànn-a, s.e., 1968-1969.
• Vito Elio Petrucci e Gherardo del Colle (a cûa de), Bansighae da l'aexïa, Rómma, Dell'Arco, 1970.
• (IT) Gherardo del Colle, L'angelo dei suburbi, Vico Equense, Isola d'oro, 1971.
• Gherardo del Colle, A foa do bestento..., Pîza, C. Cursi, 1971.
• (IT) Gherardo del Colle, Il rapporto fra l'Uomo e Dio in Jean-Paul Sartre, in Commentario Laurentianum, n. 12, Rómma, s.e., 1971.
• (IT) Gherardo del Colle, Il rapporto fra Uomo e Dio in Gabriel Marcel, in Commentario Laurentianum, n. 4, Rómma, s.e., 1973.
• (IT) Gherardo del Colle, Diario di Lourdes, in Mazzolari Primo, Viaggio a Lourdes, Viçénsa, La Locusta, 1973.
• (IT) Gherardo del Colle, I crucci del critico, Zêna, s.e., 1975.
• (IT) Gherardo del Colle, La Liguria cappuccina, Sànn-a, s.e., 1975.
• (IT) Gherardo del Colle, Poesie: 1937-1970, Zêna, s.e., 1975.
• (IT) Gherardo del Colle e Giacomo Linari (inlustraçioìn de), Diario di un fraticello sacrestano: (agosto 1954-settembre 1955), Sarzànn-a, Carpena, 1976. 
• (IT) Gherardo del Colle, Frate Jacopa in un epicedio serafico di Bruno Bruni, in L'Italia Francescana, vol. 52, Rómma, s.e., 1977.
• (IT) Gherardo del Colle, Costituzioni d'Albacina e rilievi linguistico-stilistici, in L'Italia Francescana, vol. 53, Rómma, s.e., 1978.
• (IT) Gherardo del Colle, Liguria cappuccina: poesie giocose, Zêna, s.e., 1978.
• (IT) Gherardo del Colle, Vespertina oratio, Zêna, s.e., 1979.

Archìvio

L'archìvio do Gherardo del Colle o l'é formòu de 65 unitæ archivìstiche conservæ inte l'Archìvio stòrico di Capuçìn de Zêna. O fóndo o se conpónn-e de poêxîe, sàzzi crìtichi de letiatûa, manoscrîti e bòsse de artìcoli destinæ a-a pubricaçión, despénse de letiatûa pò-u Stùdio de filozofîa, copioìn d'êuvie de tiâtro, tèsti de conferénse, artìcoli pubricæ in sce cotidién e revìste, artìcoli de argoménto leterâio de vàrri outoî pigiæ da cotidién, corispondénsa in arîvo e in parténsa con poêti (Barile, Caproni, Quasimodo e di âtri), editoî, crìtichi leterâi, fræ e amîxi e 'n'arecugéita de prédiche e discórsci pe-i ezercìççi spiritoâli. Gh'é pöi di artìcoli a-a seu memöia pubricæ dòppo a mòrte, fotografîe, 'n'oudiocascétta co-a registraçión de 'na méssa e 'n CD co-a trascriçión de çèrti seu scrîti e de artìcoli a lê dedicæ. Sto fóndo chi o l'è inandiòu in scê træ série "Stùddi, poêxîe, artìcoli, êuvie de tiâtro", "Corispondénsa" e "Prédiche e ezercìççi spiritoâli".

Nòtte

Nòtte a-o tèsto

Nòtte bibliogràfiche

Bibliografîa

• (IT) Mario Bertagna, Gherardo Del Colle: una tempesta di sereno, Sant'Orçéize, Dimes Genovese, 1981.
• (IT) Gherardo del Colle e Nicola De Francesco (a cûa de), Il fresco presagio: poesie 1937-77, Zêna, De Ferrari, 2008, ISBN 88-7172-967-6.
• (IT) Roberto Trovato, Gherardo del Colle. Scritti teatrali, Zêna, Genova University Press, Agósto 2013, ISBN 978-88-97752-23-3.

Âtri progètti

Altri progetti

• Wikimedia Commons

• Wikimedia Commons a contêgne di files in sce Gherardo del Colle

Ligàmmi de fêua

• (IT) Fra Gherardo (Repetto da Cesino) del Colle, in sce cappucciniliguri.it. URL consultòu o 19 seténbre 2024.
• (IT) Incontro dedicato a padre Gherardo del colle, in sce youtube.com, 13 zùgno 2024. URL consultòu o 19 seténbre 2024.