Ferrovia Milan-Zena

ZE	Sta pagina a l'é scrita in zeneise, segondo a grafia unitäia

A staçion de Milan Çentrale

A ferrovia Milan-Zena a l'é unna linia de ferrovia italiaña de propietæ do stato ch'a conliga Milan e Zena, respettivamente e capitale regionale da Lombardia e da Liguria.

A l'é manezzâ da-a Rete Ferroviaria Italiana ch'a â clascifica comme unna linia fondamentale.

A linia a l'é scompartia inte træ seçioin: Milan-Voghera, Voghera-Tortoña (seçion scompartia co-a ferrovia Lusciandria-Piaxensa) e Tortoña-Zena, st'urtima chì offiçialmente dita ferrovia succursale di Zovi.

Stöia

Træta	Attivaçion
Arquâ-Busalla	10 de frevâ do 1853
Busalla-Zena	18 de dexembre do 1853
Voghera-Tortoña	25 de zenâ do 1858
Milan-Pavia	10 de mazzo do 1862
Pavia-Voghera	15 de novembre do 1867
Tortoña-Arquâ	1 d'ottobre do 1916

A linia a comensa à Milan e a razzonze Voghera pe mezo de unna seçion dedicâ, ch'a passa pe Pavia; in prinçipio i treni dapeu viægiavan longo a ferrovia Lusciandria-Piaxensa pe Tortoña, de donde piggiavan a linia pe Neuve, localitæ da-a quæ in sciâ fin razzonzevan Zena pe mezo da ferrovia Turin-Zena. A-o prinçipio do Neuveçento l'é stæto tiou sciù unna neuva linia, a ferrovia succursale di Zovi, ch'a conliga Tortoña direttamente à Zena, sensa passâ pe Neuve, delongo pe-o Passo di Zovi. Unna neuva linia con de caratteristiche tecniche de erta lestixe-erta capaçitæ a l'é in construçion, pe accelerâ st'urtimo træto de l'Appennin, dito terso valico (da-o momento che o primmo o l'ea quello ch'o passava pe Neuve e o segondo o l'é quello diretto d'ancheu).

Potençiamenti

A linia a l'é stæta pe tanto tempo a-o çentro de debâ e ipòtexi d'espanscion pe aumentâne a capaçitæ – dæto ch'a l'à un gran trafego de mercançie e passaggê, tanto pendolari comme turisti, mascime inta seu parte settentrionale – e a lestixe, pe redue i tempi de viægio tra Milan e Zena. Da-o prinçipio do secolo passou, s'é çercou d'aumentâ a lestixe do træto in scî Appennin co-a construçion da ferrovia succursale di Zovi, e a-o prinçipio di anni doamia s'é construto o by-pass de Chiaravalle, pe schivâ o passaggio drento l'omònima localitæ milaneise, donde gh'ea unna staçion, abbandonâ da-i anni çinquanta; into mæximo tempo l'é stæto eliminou tutti passaggi à livello. L'é ascì previsto di atri interventi in sciâ linia:

• Quadruplicaçion da træta de Milan Rogoredo-Pavia, co-a separaçion do trafego locale da-o trafego à longa distansa e l'aumento da lestixe commerçiale, e trasformaçion da fermâ de Pieve Emanuele in staçion pe l'attestamento da linia suburbaña S2 (pe-o momento limitâ à Milan Rogoredo), i quæ treni avieivan donca unna træta in commun con quelli za existenti in sciâ linia suburbaña S13, con avei coscì unna connescion suburbaña tutti i 15 menuti in sce sto percorso, interessou da un intenso trafego de pendolari. I travaggi en previsti inte doe fase: inta primma l'é previsto a quadruplicaçion scin à Pieve Emanuele, a declassaçion de staçioin de Locate e Certosa à fermæ, con quest'urtima ch'a saià mescia un pittin ciù à sud pe fâ spaçio a-o neuvo sottopasso, e a construçion de un Pòsto de Movimento tra Villamaggiore e Certosa inta localitæ Turago Bordone (in fase de construçion); inta segonda fase se completià a quadruplicaçion fin à Pavia. O travaggio in sciâ primma fase o l'é comensou a-o prinçipio do 2024.
• Amegioamento de l'infrastruttua da seçion Pavia-Voghera, terminou do 2022 con l'attivaçion de l'Equipaggiamento Centrale Computerizzato Multistazione e a requalificaçion de colisse prioritäie de staçioin intermedie.
• Quadruplicaçion da seçion Voghera-Tortoña, de mainea da spartî o trafego da quello da ferrovia Lusciandria-Piaxensa. A-o momento sto progetto o l'é inta fase d'approvaçion.
• Construçion de un terso valico di Zovi pe conligâ Tortoña à Zena con unna stradda diretta, pe-a ciù parte in galleria e co-e caratteristiche da ferrovia à erta lestixe, pe-a quæ o travaggio o l'é in corso.

Caratteristiche

E træ træte de ferrovia che compoñan a linia son tutte à colissa doggia, con un scartamento ordinäio de 1.435 mm e elettrificæ à unna tenscion de 3.000 V in corrente diretta pe mezo de unna linia aeria de contatto.

Percorso

• Milan Çentrale
• Milan Lambrate
• Milan Forlanini
• Milan Rogoredo
• Locate Triulzi
• Pieve Emanuele
• Villamaggiore
• Certosa di Pavia
• Pavia
• San Martino Siccomario-Cava Manara
• Bressana Bottarone
• Pizzale-Lungavilla
• Voghera
• Pontecurone
• Tortoña

A ferrovia dapeu a va avanti fin à Zena pe mezo da ferrovia succursale di Zovi.

Trafego

O trafego à longa percorrensa o l'é manezzou pe-a ciù parte da Trenitalia, sorvetutto pe mezo de corse de categoria InterCity in scê connescioin Milan-Ventemiggia e Milan-Livorno; Trenitalia a l'à ascì quarche connescion de categoria Frecce da e pe Milan, Zena, Veneçia e Romma e de connescioin internaçionale co-a Svissera, l'Austria e a Germania con materiale da-e Ferrovie Federale Svissere e da-e Ferrovie Austriache. Da-o 2023 gh'é stæto ascì unna cobbia de treni da compagnia Italo - Nuovo Trasporto Viaggiatori in sciâ rotta Zena-Milan-Romma-Napoli. E connescioin regionale tra a Lombardia e a Liguria son fæte ascì da Trenitalia, pe mezo de treni regionali lesti in sciâ connescion Milan-Zena (con quarche estenscion verso a Rivea de Levante e de Ponente), comme parte do contræto de servixo co-a region Liguria. Gh'é ascì di servixi regionali manezzæ da Trenord, con di viægi che coran longo a linia tra Milan e Tortoña e an capolinia à Arquâ ò Lusciandria; tra Milan e Pavia a linia a l'é ascì addeuviâ da-a linia S13 do servixo de ferrovia suburbaña de Milan, sempre de Trenord. A linia a l'é ascì addeuviâ da un importante flusso de mercançie, mascime da e verso o pòrto de Zena.

Bibliografia

• (IT) Rete Ferroviaria Italiana, Fascicolo Linea 32 (Milano-Tortona).
• (IT) Rete Ferroviaria Italiana, Fascicolo Linea 72 (Arquata Scrivia-Genova).
• (IT) Rete Ferroviaria Italiana, Fascicolo Linea 73 (Tortona-Arquata Scrivia).

Atri progetti

Altri progetti

• Wikimedia Commons

• Wikimedia Commons a contêgne di files in sce ferrovia Milan-Zena