Club arpin italian

ZE	Sta pagina a l'é scrita in zeneise, segondo a grafia unitäia

O Club Arpin Italian (CAI; in italian Club Alpino Italiano) a l'é a ciù vegia e ciù grande assoçiaçion de arpinisti e appascionæ de montagna in Italia, supervixonâ da-o Ministëio do Turiximo.

Stöia

Quintino Sella

L'idea d'inandiâ un club ch'o l'avieiva misso insemme di arpinisti italien a l'é nasciua inta mente do Quintino Sella à Casa Voli (Verzuolo), a-i 12 d'agosto do 1863, in occaxon de l'asceisa do Monviso da-a parte de lê mæximo e di atri arpinisti italien, tra i quæ s'arregòrda o Giovanni Barracco, e o Paolo e o Giacinto de San Robert; con tiâ l'inspiraçion da de assoçiaçioin pæge ch'existeivan inte di atri paixi europëi comme l'Austria, a Svissera e l'Inghiltæra co-o Alpine Club de Londra.

L'indandio offiçiâ do club o l'é avvegnuo à unn'oa do poidisnâ di 23 d'ottobre do 1863, into Castello do Valentin à Turin. Tra i fondatoî ch'appartegnivan a-a primma lista d'adexon, in azzonta a-o Sella, gh'ea pöcassæ duxento atri appascionæ de montagna, compreiso o Giovanni Piacentini, o Giorgio Tommaso Cimino, o Luigi Vaccarone, o Bettino Ricasoli e o Giovanni Battista Schiapparelli.

O baron Ferdinando Perrone di San Martino o l'é stæto elezzuo primmo prescidente do CAI e o Bartolomeo Gastaldi o l'é stæto viçeprescidente (che dapeu o l'é vegnuo o seu segondo prescidente da-o 1864 a-o 1872). O CAI o l'à avuo a seu sede primma à Turin e dapeu, dòppo a Segonda Guæra Mondiale, a sede legale a l'à fæto stramuo à Milan in stradda Errico Petrella 19 donde a l'é ancon a-a giornâ d'ancheu.

Ciù tardi l'é stæto averto de atre sede inte tante çittæ italiañe, comme à Domodossola do 1869. Do 1873, con l'annescion do Laçio a-o Regno d'Italia, o Quintino Sella, comme ministro de finanse do regno, o l'é anæto à stâ inta neuva capitale, e dapeu o l'à inandiou a seçion de Romma. Stæto terminou a Primma Guæra Mondiale, o CAI o l'à sciorbio a Soçietæ di arpinisti tridentin (do 1920) e a Soçietæ Arpiña de Arpe Giuliañe. Do 1931 a Soçietæ di escurscionisti milaneixi a l'é stæta reconosciua ascì comme unna seçion do CAI.

Do 1938, o fasciximo o l'à impòsto un cangio de nomme temporaneo a-o CAI, da Club Alpino Italiano à Çentro Arpin Italian, inte unna tentativa de avvardâ a "puritæ" da lengua italiaña da-o mescciâse co-i termini ingleixi. Da quello anno in avanti, o CAI o l'à scorrio i seu membri ebrëi, con adottâ e lezze razziale fasciste; sti membri e i seu descendenti en stæti dapeu repiggiæ do zenâ do 2023.

A-a giornâ d'ancheu, a sede soçiale a l'é delongo à Turin, in sciô Monte di Cappussin, inta Montâ a-o Club arpin italian seç. Turin 39, donde s'attreuva ascì a Biblioteca Naçionale do CAI e o Museo Naçionale da Montagna. A-a giornâ d'ancheu, l'assoçiaçion a l'à ciù che 320.000 membri scriti inte tutto o territöio naçionale, à peto de solo che 3.500 (pe-o ciù ricchi piemonteixi) do 1877.

Organizzaçion

Òrgani çentrali

O CAI (pe quello ch'o l'à da fâ co-e struttue çentrale) o l'à unna personalitæ giuridica de drito pubrico (òrgano pubrico no econòmico). L'òrgano sovran do CAI o l'é l'assemblea di delegæ, fæta da-i delegæ de tutte e seçioin (o prescidente da seçion e un delegou elezzuo pe tutti i 500 membri da mæxima seçion). L'assemblea di delegæ, tra e seu atre competense, a l'adotta i programmi d'orientamento do club, a l'eleze o prescidente generale, i trei viçeprescidenti generali, i membri do conseggio naçionale di revisoî di conti e o conseggio naçionale di probviri.

I atri còrpi çentrali en:

• o comitato çentrale d'orientamento e contròllo, ch'o l'exerçita e fonçioin de direçion politico-instituçionale;
• o collegio naçionale di probviri, ch'o manezza o segondo graddo de giustiçia interna do CAI (o primmo graddo o l'é manezzou à livello regionale);
• o conseggio naçionale di revisoî di conti, ch'o l'exerçita o contròllo contabile e amministrativo da gestion finançiäia, econòmica e de patrimònio do CAI;
• o comitato direttivo çentrale, ch'o l'à a fonçion d'appricâ i programmi adottæ da l'assemblea di delegæ e e linie guidda stabilie da-o comitato çentrale d'orientamento e contròllo.

Òrgani tecnichi

I òrgani tecnichi do CAI fonçioñan co-o propòxito de promeuve ò portâ avanti de finalitæ instituçionale particolæ; o comitato çentrale d'orientamento e contròllo o çerne i membri e o prescidente, e o deçidde ascì in scê seu fonçioin e competense particolæ. I òrgani tecnichi çentrali son :

Scimbolo de l'escurscioniximo do CAI

• comitato scientifico çentrale
• commiscion çentrale pe l'escurscioniximo e o çicliximo
• commiscion çentrale d'arpiniximo pe zoveni
• commiscion çentrale de mëxiña
• commiscion çentrale pe-i materiali e e tecniche
• commiscion çentrale pe-a speleologia e o torrentiximo
• commiscion çentrale pe-a proteçion de l'ambiente de montagna
• commiscion çentrale pe-e pubricaçioin
• commiscion çentrale pe-i assosti e e euvie arpiñe
• commiscion çentrale do cine
• commiscion legale çentrale
• commiscion naçionale de scheue d'arpiniximo, de sciarpiniximo e d'arrampinâ libera
• commiscion da biblioteca naçionale
• servixo slaviñe italian

Scheue çentrale e naçionale

E scheue çentrale coordinan o travaggio che e scheue do CAI pòrtan avanti in sciô territöio. En:

• scheua çentrale d'arpiniximo pe zoveni
• scheua çentrale d'arpiniximo e d'arrampinâ libera
• scheua çentrale pe l'escurscioniximo e o çicliximo
• scheua çentrale de sciarpiniximo
• scheua naçionale do servixo slaviñe italian
• scheua naçionale de speleologia
• scheua çentrale sci de fondo escurscionistico

Struttue territoriale e periferiche

À livello periferico, o CAI o l'é spartio inte di gruppi regionali, un pe tutte e regioin italiañe, con l'ecceçion de provinse autònome do Trentin e do Basso Tiròllo, che an ciascheduña o seu gruppo regionale.

O veuo cheu do CAI en però e seçioin. Ste chì en di gruppi de sòçie che promeuvan e finalitæ instituçionale inte unna zöna geografica speçifica. Di urtimi tempi a proibiçion d'avei ciù de unna seçion inta mæxima çittæ a l'é stæta levâ, e sta realtæ a s'attreuva a-a giornâ d'ancheu à Milan, Turin e Zena. Tutte e seçioin, ch'en de assoçiaçioin de drito privou, an un seu statuto e i seu regolamenti e coordinan e promeuvan e attivitæ in sciô territöio e manezzan e scheue (se ghe n'an). Un atro dovei de seçioin o l'é de dâ a mente a-i assosti arpin (pe commun quelli into seu territöio de competensa) manezzæ da-o CAI. E seçioin peuan ëse spartie ancon de ciù inte de sottoseçioin. Gh'é 498 seçioin attive in sciô territöio, a-e quæ gh'é da azzonze 310 sottoseçioin.

Tutte e seçioin do CAI peuan ospitâ di gruppide seçion (pe exempio d'escurscioniximo) e de scheue de seçion (pe exempio d'arpiniximo). I gruppi de seçion e e scheue fonçioñan de mainea autònoma co-i seu regolamenti (in conformitæ co-i regolamenti de seçion e approvæ da-o conseggio direttivo da seçion da fan parte), con organizzâ e seu attivitæ sotta a supervixon de commiscioin regionale e çentrale e de scheue regionale e çentrale.

Seçioin naçionale

E træ seçioin naçionale do CAI son de seçioin no ligæ à unna particolâ zöna geografica e no fan parte de nisciun gruppo regionale

Scimbolo do CAAI

Club arpin academico italian

O Club Arpin Academico Italian (CAAI) o l'é unna seçion à livello naçionale do CAI inandiâ do 1904 co-o propòxito de mette insemme i membri do CAI ch'aivan ottegnuo di meriti particolæ inte l'arpiniximo sensa guidde. A-a giornâ d'ancheu o mette insemme di arpinisti ch'an pratticou l'arpiniximo de erto livello e o promeuve st'attivitæ chì.

Assoçiaçion italiaña de guidde arpiñe

L'Assoçiaçion Guidde Arpiñe Italiañe (AGAI) a l'é unna seçion naçionale do CAI inandiâ do 1931 co-o nomme de Consorzio nazionale guide e portatori. A l'à ottegnuo o seu nomme d'ancheu do 1978. L'AGAI a mette insemme de guidde de montagna italiañe e a l'à unna completa autonomia da-o CAI. I membri de l'AGAI en i soli che peuan pratticâ l'arpiniximo da profescionisti.

Còrpo naçionale de soccorso arpin e speleològico

Lögo do Soccorso Arpin

O Còrpo naçionale de soccorso arpin e speleològico (CNSAS) o l'é unna struttua operativa do CAI, con ampia autonomia, ch'a s'òccupa da prevençion di açidenti inte l'ambiente de montagna e ipogeo, do soccorso inte st'ambito di ferii, di despersci e de quelli che s'attreuvan à reisego, do repiggio di cheiti e do soccorso in caxo de calamitæ.

O CNSAS o l'é un servixo d'utilitæ pubrica e unna struttua operativa naçionale do servixo naçionale de Proteçion Çivile.

O travaggio do CNSAS o l'é portou avanti da di tecnichi ben ben formæ organizzæ in sce unna base regionale. Pe mezo de di exammi streiti e unna formaçion continua se peu ottegnî a poxiçion de:

• tecnico de soccorso arpin
• tecnico de soccorso speleològico
• mego speçializzou inte emergense à erto reisego inte l'ambiente arpin
• mego speçializzou inte emergense à erto reisego inte di ambienti ipogëi
• tecnico de soccorso inte goe

O CNSAS o l'à ascì de unitæ de chen de reçerca in slaviña e de unitæ de chen de reçerca in superfiçie.

Cöi CAI

Inte tante seçioin do CAI gh'é un cöo amatoriale con un repertöio pe commun compòsto da-e cansoin de montagna, e cansoin popolare tradiçionale e e cansoin arpiñe.

Inte l'occaxon do 150° anniversäio do CAI, i cöi piemonteixi do CAI, Edelweiss e Uget an fæto un çenscimento de tutti i cöi italien do CAI.

Conlaboraçioin

O CAI o l'ea un membro fondatô de l'Union internaçionale de assoçiaçioin de arpiniximo (UIAA), ch'a mette insemme a ciù parte de federaçioin naçionale de spòrt de montagna. A-o 1° de zenâ do 2019, o CAI o l'à lasciou l'UIAA, dòppo avei denonçiou inte l'agosto do 2018 unna farta de transparensa e de prioritæ no coerente co-a miscion da Federaçion mæxima . À partî da-o 1° de zenâ do 2023, o CAI o l'intra torna inte l'UIAA pe voentæ do neuvo Prescidente Generale Antonio Montani.

O CAI o l'é parte do Club Arc Alpin (CAA), ch'o mette insemme i primmi club arpin di paixi de l'erco alpin. Un "trattamento de reçiproçitæ" o l'é stabilio ascì tra-o CAI e tanti atri club arpin. Un membro de un club arpin con un trattamento de reçiproçitæ o l'à o drito de reçeive o mæximo trattamento da-o CAI che questo o reserva a-i seu membri (pe exempio pe quello ch'o l'à da fâ co-e tasce di assosti ò i prexi de pubricaçioin), coscì comme i membri do CAI an sto mæximo drito inti atri club arpin.

O CAI o conlabora, mascimo à livello locale, con l'ANA (Assoçiaçion Naçionale Arpin), ch'a mette insemme i sordatti, in arme e in congedo, de truppe arpiñe italiañe.

O CAI o conlabora con l'Armâ italiaña pe l'educaçion de truppe arpiñe.

A seçion siçiliaña do Club Arpin Italian a conlabora comme un ente instituçionale co-o primmo parco mondiale do stile de vitta mediterraneo.

Attivitæ

«Il Club alpino italiano (C.A.I.), fondato in Torino nell'anno 1863 per iniziativa di Quintino Sella, libera associazione nazionale, ha per iscopo l'alpinismo in ogni sua manifestazione, la conoscenza e lo studio delle montagne, specialmente di quelle italiane, e la difesa del loro ambiente naturale.»

(Statuto do Club arpin italian. Titolo I – Articolo 1)

Assosti e bivacchi

O rifugio Torino in sciô massiscio do Monte Gianco.

Gh'é ciù che 700 struttue arpiñe manezzæ da-o CAI. L'assoçiaçion a manezza 433 assosti arpin, 224 bivacchi, 65 cabanne soçiale, 26 ponti de sostëgno e 15 allögi pe un totale de ciù che 23.500 letti. L'intençion de ste struttue chì a l'é de fonçionâ da ponto de partensa pe-e montagne da zöna (mascine inte quelli caxi donde o saieiva diffiçile ò imposcibile portâ avanti l'asceisa inte un solo giorno), comme ponto d'arrivo finale ò de mezo pe-e traversæ ò comme assosto d'emergensa in caxo de tempo grammo. Ste struttue son addeuviæ ascì comme ponto de sostëgno pe portâ avanti de attivitæ soçiale (corsci, convëgni, etc.) e pe de iniçiative colturale.

Didattica

Da-o ponto de vista da didattica e da diffuxon de unna "coltua da seguessa" pe l'attivitæ in scê montagne, gh'é ben ben de seçioin che an inandiou de scheue de arpiniximo, sciarpiniximo e arrampinâ, reconosciue ascì da-a legislaçion italiaña d'ancheu in azzonta a-e scheue inandiæ che no l'é guæi comme quelle d'escurscioniximo. Ste scheue chì oua organizzan di corsci, di corsci d'aggiornamento e di stage de formaçion de varri livelli che tendan à promeuve a conoscensa da montagna e de tecniche pe frequentâla con ciù seguessa. Pe sta finalitæ, o CAI o forma di instruttoî, di accompagnatoî e di atri operatoî, che pòrtan avanti e seu attivitæ de badda. Pe vegnî un instruttô ò accompagnatô do CAI inte unna discipriña speçifica l'é neçessäio anâ apreuvo à di corsci de formaçion particolæ, passâ un examme teòrico e prattico, portâ avanti l'attivitæ drento à unna seçion ò scheua do CAI e anâ apreuvo à di corsci d'aggiornamento periòdichi (sotta pena de perde o titolo).

E qualificaçioin reconosciue da-o CAI son:

• instruttô naçionale d'arpiniximo
• instruttô d'arpiniximo
• instruttô naçionale de sciarpiniximo
• instruttô de sciarpiniximo
• instruttô naçionale d'arrampinâ libera
• instruttô d'arrampinâ libera
• instruttô naçionale de speleologia
• instruttô de speleologia
• instruttô naçionale de torrentiximo
• instruttô de torrentiximo
• instruttô naçionale de sci de fondo
• instruttô de sci de fondo
• accompagnatô naçionale d'arpiniximo pe-i zoveni
• accompagnatô d'arpiniximo pe-i zoveni
• accompagnatô naçionale d'escurscioniximo
• accompagnatô d'escurscioniximo
  • speçializzaçion accompagnatô EEA (vie ferræ)
  • speçializzaçion accompagnatô EAI (zöne con neive)
• accompagnatô naçionale de çicloescurscioniximo
• accompagnatô de çicloescurscioniximo
• esperto naçionale naturalistico do comitato scientifico çentrale
• operatô naturalistico do comitato scientifico çentrale
• osservatô glaçiològico do comitato scientifico çentrale
• esperto naçionale pe l'avvardo de l'ambiente de montagna
• operatô pe l'avvardo de l'ambiente de montagna
• esperto naçionale slaviñe
• tecnico do destacco artifiçiale
• tecnico da neive
• osservatô neive e slaviñe

Tra e ciù antighe e ciù conosciue scheue do CAI (compreiso quarcheduña nasciua pöco dòppo l'inandio do Club Arpin Italian), gh'é a Gian Piero Motti e a Giusto Gervasutti do CAI de Turin (st'urtima a-o prinçipio a l'aveiva o nomme de Gabriele Boccalatte), a Silvio Saglio da SEM de Milan, a Paolo Consiglio de Romma e a Giorgio Graffer de Trento.

Seguessa

Marche do CAI in sce un sentê

O CAI o s'impegna à promeuve e à permette unna frequentaçion segua da montagna e unna prattica segua di spòrt de montagna e pægi. L'attivitæ diretta a-a seguessa a comprende a formaçion e a didattica, co-e scheue, i accompagnatoî e i instruttoî; a pubricaçion de manuali in scî varri aspeti de l'anâ in scê montagne (comme "Arpiniximo in scê pria" ò "Mëxiña e montagna"); a campagna permanente pe-a prevençion di açidenti in montagna “segui in montagna”, manezzâ pe-a ciù parte da-o CNSAS e da-o scito web Montagna Amica e Sicura. O CAI o s'òccupa ascì da manutençion e da segnaletica di sentê e de vie ferræ e o mantëgne e o mette à giorno o catasto di sentê.

Avvardo de l'ambiente de montagna

O CAI, pe mezo da Commiscion çentrale pe l'avvardo de l'ambiente de montagna (TAM), o spantega a conoscensa di problemi da conservaçion de l'ambiente e o promeuve de iniçiative pe avvardâ l'ambiente naturale e colturale de montagne, in particolâ de iniçiative preventive. A TAM a promeuve a conoscensa naturalistica, tanto tra i membri do CAI comme tra i no membri, perché a â tëgne pe un strumento de proteçion utile. L'avvardo de l'ambiente de montagna a l'é uña de primme finalitæ de l'assoçiaçion.

L'é di anni che o Club Arpin Italian o s'impegna inte l'avvardo Arpe Apuañe da-e cave de marmao.

Arpiniximo pe-i zoveni

O CAI o l'indica inti seu propòxiti unn'attençion particolâ verso i zoveni, donca o l'à dedicou unn'attivitæ speçifica pròpio a-i zoveni: l'arpiniximo pe-i zoveni. St'attivitæ chì a se basa in sciâ convinçion che a montagna a pòsse ëse un ambiente de crescio pe-o zoveno, che donca o vëgne o protagonista do "progetto educativo" do CAI. E persoñe ch'en responsabile de portâ avanti st'attivitæ (cappi d'arpiniximo pe-i zoveni) an da avei, in azzonta à unn'eccellente formaçion tecnica (ch'a caratterizza tutti i operatoî do CAI) ascì unna sòlida preparaçion into campo psicopedagògico.

Informaçion e coltua

O Club Alpino Italian o pubrica doe seu reviste: Lo Scarpone, unna revista ch'a sciòrte tutte e settemañe in linia, ch'a l'à l'intençion de informâ i membri in scî eventi ch'an da fâ co-a montagna (fin a-o 2012 a l'ea unna revista in scê papê ch'a sciortiva tutti i meixi); Montagne 360°, ch'a sciòrte tutti i meixi (in passou doe vòtte a-o meise e ciammâ solo che "A revista"), ch'a creuve unna gamma ciù grande de costioin ligæ a-e montagne, in Italia e in gio pe-o mondo. Distribuio pe abbonamento a-i membri do CAI da-o 1885, da l'ottobre do 2021 a l'é disponibile ascì inti casòtti da giornali. In azzonta a-i periòdichi, o CAI o pubrica di atri produti editoriali, compreiso di manuali e di annali, ma ascì di libbri dedicæ a-a coltua e a-a stöia da montagna e de l'arpiniximo.

L'assoçiaçion a pubrica, in collaboraçion co-o Touring Club Italian, a serie Guida dei Monti d'Italia. A serie a comprende tanti volummi, ciaschedun dedicou à unna speçifica zöna geografica (pe exempio "Sardegna") ò à un massiscio de montagne (pe exempio "Monte Reusa"). Tutti i volummi conscistan inte unna guidda pe escurscioin, d'arpiniximo e, de spesso, de sciarpiniximo pe-a zöna ò o gruppo de montagne in costion. A serie a l'é stæta completâ do 2013, ciù che çento anni dòppo a primma sciortia, co-a pubricaçion do volumme Alpi biellesi e valsesiane. Çerti di vegi volummi oua son squæxi imposcibili da attrovâ ò son in parte scompassæ e no gh'é di aggiornamenti.

O CAI o l'à inandiou do 1874 o Museo naçionale da montagna, che a-a giornâ d'ancheu o l'à l'obiettivo d'ëse un çentro colturale ch'o l'arrecheugge idealmente tutte e montagne do mondo. O museo o l'é à Turin, in sciô monte di Cappussin, e o l'òspita o çentro de documentaçion do CAI, ch'o l'é responsabile d'attrovâ e conservâ di documenti stòrichi in sce l'arpiniximo e a montagna. O l'é compòsto da-a fototeca, a cineteca e o Çentro italian pe-o studdio e a documentaçion de l'arpiniximo extraeuropeo (CISDAE). Inta mæxima sede gh'é a Biblioteca naçionale do CAI. A l'é unna biblioteca speçializzâ d'importansa internaçionale apreuvo a-a quantitæ e a-o valô de euvie e di documenti ch'a conserva. In azzonta à tutte e ciù neuve pubricaçioin in sciâ montagna e l'arpiniximo, da-i periòdichi a-e guidde, a biblioteca a conserva de euvie antighe e rare, comme de descriçioin de itineräi in scê Arpe che remontan a-o prinçipio do Setteçento ò de reviste d'arpiniximo da meitæ de l'Euttoçento.

In azzonta o CAI o cua da-o 1952 o Trento Film Festival, a ciù antiga e acclamâ rassegna internaçionale de cini dedicæ a-a montagna, l'arpiniximo, l'esploraçion, l'ambiente e l'avventura. Da 2004 à 2011 a direçion artistica do Festival a l'é stæta affidâ a Maurizio Nichetti. O Trento Film Festival o l'incluià, oltre a-a revisione cinematografica, unna serie de incontri e mostre, e, da-o 1987, o l'à ospitou Montagna libri, revixone internaçionale de l'editoria de montagna. Drento da rassegna Montagna libri gh'é ascì mòstra-mercou de libbraie antichäie da montagna, antighi libbri de montagna, cartoliñe, stampe, inçixoin, manifesti e raritæ che trattan do mondo de l'arpiniximo.

Do 2019 o l'à patrocinou a sciortia inti cini italien do documentäio Nomad – In cammin co-o Bruce Chatwin (Nomad: In the Footsteps of Bruce Chatwin), do Werner Herzog.

Bibliografia

• (IT) Club Arpin Italian. Commiscion pe-o çentenäio, 1863-1963. I cento anni del Club alpino italiano, Milan, Tamari Editore, 1964.
• (IT) Quintino Sella e Pietro Crivellaro (a cua de), Una salita al Monviso. Lettera a Bartolomeo Gastaldi, Verbania, Tararà edizioni, 1998, ISBN 88-86593-14-7.

Lezze

• (IT) Lezze 26 zenâ 1963, n. 91, in mateia de "Riordinamento del Club alpino italiano". URL consultòu o 17 òtôbre 2024.
• (IT) Lezze 2 zenâ 1989, n. 6, in mateia de "Ordinamento della professione di Guida alpina". URL consultòu o 17 òtôbre 2024.
• (IT) Lezze 24 frevâ 1992, n. 255, in mateia de "Istituzione del Servizio nazionale della protezione civile". URL consultòu o 17 òtôbre 2024.
• (IT) Lezze 21 marso 2001, n. 74, in mateia de "Riordinamento del Club alpino italiano". URL consultòu o 17 òtôbre 2024.

Statuti e regolamenti

• (IT) Club alpino italiano, Statuto, Testo adottou da l'assemblea di delegæ de Veroña (14 de dexembre do 2001 e 30 de novembre do 2003) - Revixonou da-o comitato çentrale de indirisso e de contròllo à Milan (17 de zenâ do 2004).
• (IT) Club alpino italiano, Statuto - Regolamento generale, Testo adottou da-o comitato çentrale de indirisso e de contròllo a-i 12 de fevrâ do 2005 - Modificou a-i 23 de luggio do 2005, 19 de novembre do 2005 e 29 de marso do 2008.
• (IT) Club alpino italiano, Statuto - Regolamento disciplinare, Approvou da-o comitato çentrale de indirisso e de contròllo con Atto n. 31 a-i 16 de zugno do 2007.
• (IT) Club alpino italiano, Regolamento per gli organi tecnici operativi centrali e periferici, Approvou da-o CC inta seu seduta a-i 29 de settembre do 2007 e modificou da-o CC inta seu seduta a-i 10 de novembre do 2007.
• (IT) Club alpino italiano, Statuto - Statuto Sezionale Tipo, Approvou da-o comitato çentrale de indirisso e de contròllo inta seu riunion a-i 3 de frevâ do 2007.
• (IT) Club alpino italiano, Elenco degli statuti sezionali approvati.
• (IT) Club alpino accademico italiano, Regolamento del Club alpino accademico italiano - Approvato dal consiglio centrale del Club alpino italiano.

Atri progetti

Altri progetti

• Wikimedia Commons

• Wikimedia Commons a contêgne di files in sce Club arpin italian

Ligammi de feua

• (IT) Scito offiçiâ, in sce cai.it. URL consultòu o 17 òtôbre 2024.