La Louvière

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

La Louvière ies 'n sjtad en gemeinte in de Belzje provincie Henegouwe in 't arrondissement La Louvière. De gemeinte haet 'n oppervlakte van 64,16 km² en 77.013 inweunersj (1 juli 2005). Nao aantal inweunersj ies 't de twiède sjtad van Henegouwe (nao Charleroi) en de èlfde gemeinte van Belsj. De deilgemeintes van La Louvière zint behalve de sjtad zelf Haine-Saint-Paul, Haine-Saint-Pierre, Saint-Vaast, Trivières, Boussoit, Houdeng-Aimeries, Houdeng-Goegnies, Maurage, Strépy-Bracquegnies en Besonrieux. De gemeinte liek aan de Hene en aan 't Centrumkanaal, tösje Berge en Charleroi, óngevaer 50 km ten zuje van Brössel.

Sjtadsfuncties

La Louvière ies veural 'n industriegemeinte. De belangriekste industrietakke zint de sjtaol- en metaalindustrie, de chemische industrie en de glaasindustrie. Wiejer haet de sjtad 'n regionaal verzörgende functie. D'r liegke twiè hospitale. Ouch ies d'r 'n hoagesjoal gevestig. De vootbalcluub RAA Louviéroise sjpeelt in de Ièrsjte Klasse. Mèt haufvaste weurt 'n groat carnavalsfiès gevierd.

Sjtadsbeeld en bezeenswaerdighede

Es industriesjtad die pas gegreujd ies vanaaf de twiède hèlf van de 19e ièw kènt La Louvière wiènig ouw geboewe. In 't veurmalig justitiepaleis ies 'n museum veur beeldende kuns gevestig. Bie La Louvière liegke veer sjeepslifte in 't Centrumkanaal, die geboewd zint tösje 1888 en 1917 en die saer 1998 op de Waerelderfgoodlies van UNESCO sjtoont. De lifte were allewiel allein nog mer veur de plezeervaart gebruuk. In de deilgemeinte Houdeng-Goegnies liek 't mienwèrkersjdörp Bois-du-Luc oet de 19e ièw mèt 'n biebehuèrend mienmuseum.

Historie

Bies in de 19e ièw waor La Louvière 'n gehuch dat bie Saint-Vaast huèrde. De plaats kaom tot bleuj en greujde tot 'n sjtad door de kolemiene. In 1869 woort La Louvière 'n eige gemeinte. De tegewoordige gemeinte ies in 1977 bie 'n fusie óntsjtange.