Flor Aarts
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Flor Aarts (Mestreech, 17 november 1934 - Mestreech, 29 juni 2021[1]) waor 'ne Nederlands-Limbörgsen taolkundege. Heer waor in zie wèrkzaam leve professor Ingels in Nimwege, meh woort nog bekinder door zien versjèllende beuk en artikele euver 't Mestreechs.
Aarts deeg in Mestreech 't gymnasium en góng in 1957 aon de Kathelieke Universiteit vaan Nimwege Ingels studere. Heer promoveerde in 1967 op 'ne Middelingelse bewèrking vaan 't Onzevader. 't Jaor dao-op woort heet tot lector beneump. Zien intrèsse had ziech intösse verplaots nao taolkunde. Zoe heel 'r ziech bezeg mèt de grammaticaol versjèlle tösse 't Ingels en 't Nederlands, daobij geholpe door de oetgebreide grammaire die vaan allebei bestoonte. Sinds 1 jannewarie 1979 waor heer professor Ingels, es opvolger vaan G. Storms. Dee lierstool bekleide heer tot 1994, wie heer mèt emeritaot góng.
Nao zien emeritaot gaof heer nog korten tied cursus aon de Volksuniversiteit, meh al gaw verhuisde heer trök nao Mestreech. Dao begós heer aon 'n ganse serie populair-wetensjappeleke beuk euver zien moojertaol, boe-oonder 'ne grammair (2001), twie algemein introducties (2002, 2009), e cursusbook (2019) en 'nen etymologischen dictionair (2020).
Aarts storf op 86-jaorege leeftied. Heer waor al e tiedsje oongeneselek kraank; boevaan is neet bekind gemaak.[2]