Alessandro Mannarino
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Alessandro Mannarino (Roeme, 1979) is 'ne Italiaonse zenger, dee ziech kenmèrk door ziene Europeese folklore. Heer weurt dèks vergeleke mèt Europese zengers Rocco, Serge Gainsbourg en Paolo Conte. Zelf numde heer vaan al zien veurbeilde mer eine Amerikaan op, naomelek: Tom Waits.
Historie
[bewirk | brón bewèrke]Mannarino greujde op in Roeme en begos dao ouch zienen artisieke carrière in 2001, wie heer ziene band Kampina opriechde. In 2009 kraog heer bekèndegheid mèt zien debuutalbum Bar della rabbia. De titel is 'n Italiaonstaolege fóf, umtot 't twie dinger kin meine. Aon de eine kant beteikent 't lètterlek op 't Limbörgs Kaffee vol koleer, maar me spreek 't oet zjus wie Bar del Arabbia en daan beteikent 't Kaffee vaan Arabië. 't Album woort hendeg good oontvaange in Italië. Heer woort twiede bij de groetste Italiaonse meziekawards; de Premio Tenco vaan 2009. Ouch op Europees gebeed kraog Mannarino dat jaor al aondach. Heer woort genomineerd veur de categorie Groetse belofte vaan de Mediterraone bij de European Border Awards 2009.
In 2010 späölde heer 'ne kleine rol in de populaire Italiaonse film Tutto l'amore del mondo. Hei späölde heer de wereldberoemde Italiaonse zenger Rocco op aw leeftied, vlak veurtot 'r nao Amsterdam verhojsde.
In 2011 kaom zien twiede album, Supersantos (Spaons veur Superheilege), oet. Ouch dit woort good oontvaange in thoesbases Roeme, mer kraog 'n besjeije plaots 38 in de Franse Albumtop 50. Mèt de vaan dit album aofkomstege single Mary Lou kraog heer zelfs 'ne nómmer 18 notatie in de Spaonse Top 40. De nómmer geit euver 't Amerikaans meidske Mary Lou, dat ziech neet kin binde aon 'n fijn nuij plaots in Europa. De nómmer weurt gezeen es 't bewijs vaan Mannarino's aofguns tege de VS. In 't refrein zingk heer, vrij vertaold nao 't Limburgs: "Begrieps de 't daan neet? Vrijheid in dien laand is inkel e beeld", riechtend op 't Vrijheidsbeeld vaan New York City.