Kon-Tiki
.jpg)
La mision de la Kon-Tiki ia es un viaja en 1947 par balsa tra la Mar Pasifica de America Sude a la isolas polinesia, gidada par la esploror e scrivor Thor Heyerdahl. La balsa ia es nomida Kon-Tiki per la dio inca Viracocha, per ci "Kon-Tiki" ia es un nom vea. Kon-Tiki es ance la nom de un libro par Heyerdahl, un filma atestante de sua aventures, e la filma de dura longa de 2012, nominada par AMPAS (la Academia de la Artes e Siensas de Filma) per un filma nonengles.
Heyerdahl ia crede ce popla de America Sude ia pote coloni polinesia en la eda ante-european. Sua gol en crea la mision de Kon-Tiki ia es per mostra, par usa sola la materias e tecnolojias disponable a acel popla a acel eda, e ce on ave no razona tecnical cual ta preveni los de fa lo. An si la mision ia inclui alga tecnolojia moderna, como un radio, orolojias, cartas, sestante, e cotelas de metal, Heyerdahl ia sujeste ce los no ta efeta la intende de demostra ce la balsa mesma pote completa la viaja.
La mision ia es finansiada par prestas privata e donas de aparatos par la Armada de la SUA. Heyerdahl e un ecipo peti ia vade a Peru, do, con la aida de la compleso de la docas furnida par la autorias de Peru, los ia construi la balsa de troncos de balsa e otra materias nativa en un modo antica como rejistrada en desinias par la concistores espaniol. La viaja ia comensa a 28 april 1947. Heyerdahl e sinco camaradas ia veli la balsa per 101 dias tra 6900 km de la Mar Pasifica, ante crase a un resife a Raroia en la Isolas Tuamotus a 7 augusto 1947. La ecipo ia atera susedosa e tota ia reveni secur.
La balsa Kon-Tiki orijinal es aora esibida a la Museo Kon-Tiki a Bygdøy en Oslo, Noria.