Organspend
Eng Organspend ass d'Ewéchhuelen vun engem oder méi Organer aus dem Kierper vun engem Mënsch, dee kuerz virdru gestuerwen ass, oder vun engem gesonde fräiwëllege Spender, deen nach lieft. Dat Organ gëtt dann an de Kierper vun enger anerer, lieweger Persoun transplantéiert. Geleefeg Organtransplantatioune betreffen d'Nieren, d'Häerz, d'Liewer, d'Bauchspäicheldrüs, d'Däerm, d'Longen, d'Schanken, an d'Haut. Dacks ginn d'Tissuspenden (Gewebespenden) (zum Beispill Hornhaut vum Aen) och zu den Organspende gezielt, obwuel et sech net ëm Organer handelt. Donieft gëtt et och nach Bluttspenden a Knachemuerchspenden (Bluttstammzellespenden).
Bestëmmt Organer kënne vu liewege Spender kommen, wéi d'Nier oder Deeler vun der Liewer, mä déi meescht Spende geschéien eréischt nom Doud vum Spender.
All d'Organer an Tissue ginn an enger Prozedur erausgeholl, déi der Chirurgie gläicht, an all d'Schnëtt ginn no deem Agrëff nees zougemaach. An der Zäit virum Begriefnes soll net z'erkenne sinn, datt den Doudegen en Organspender war.
Persounen aus allen Altersklasse kënnen Organspender ginn. Den Alter vum Donateur ass manner wichteg wéi den Zoustand vum Organ, dat gespent gëtt. Dowéinst ginn trotzdeem seelen Organer vu Leit iwwer 70 Joer benotzt.
Weltwäit gëtt et Organspender, an och Waardelëschte fir Leit, déi op en Organ waarden. Vill Patienten op sou Waardelëschte stierwen, well se keen Organ zur Zäit kréien. De 17. November 2016 zum Beispill stoungen eleng an den USA 119.905 Persounen op der Waardelëscht fir en Organ, dat hinnen d'Liewe kéint retten.[1]
Organspenden zu Lëtzebuerg
[änneren | Quelltext änneren]An Europa ass Lëtzebuerg eent vun de Länner mat de mannsten Organspender.[2] 2015 goufen et am ganze Land nëmmen dräi Organspender.[3] Domat war Lëtzebuerg engem Eurostat-Classement no op der leschter Plaz[4] a weltwäit op der sechstleschter Plaz.[5]
2022 goufen et nees 8 doudeg Organspender. Dogéint stoungen am selwechte Joer awer 105 Patienten op der Waardelëscht fir eng Transplantatioun, a 35 Awunner kruten am Ausland eng Organtransplantatioun.[6],[7]
Lëtzebuerg ass nieft der Belsch, Däitschland, Éisträich, Holland, Kroatien, Slowenien an Ungarn eent vun de Länner an deenen d'Organisatioun Eurotransplant aktiv ass, déi sech fir d'Promotioun vun der Organspend asetzt an d'Koordinatioun tëscht de Memberstaaten organiséiert.
| 2004 | 2005 | 2006 | 2007 | 2008 | 2009 | 2010 | 2011 | 2012 | 2013 | 2014 | 2015 | 2016 | 2017 | 2018 | 2019 | 2020 | 2021 | 2022 |
|---|---|---|---|---|---|---|---|---|---|---|---|---|---|---|---|---|---|---|
| 1 | 3 | 6 | 1 | 9 | 0 | 3 | 9 | 4 | 8 | 4 | 3 | 3 | 9 | 7 | 5 | 3 | 2 | 8 |
Vum Gesondheetsministère gëtt et en Organspenderpass, "Passeport de vie" genannt.[11] An dësem dréckt de Besëtzer seng Awëllegung aus, datt him am Fall vun engem stënterlechen Doud Organer ewechgeholl a gespent kënne ginn. E Porte-parole vum Ministère sot 2015, zu Lëtzebuerg géif et d'Potential fir 10-15 Organspenden am Joer ginn.[12]
Referenzen
[Quelltext änneren]- ↑ U.S. Department of Health & Human Services (gekuckt de 17. November 2016)
- ↑ statista.com: Rate of deceased organ donors including both donation after brain death (DBD) and donation after cardiac death (DCD) in Europe in 2020 and 2021, by country (per million population) (gekuckt 5. November 2023)
- ↑ lessentiel.lu: Luxemburg: Nur drei Organspenden 2015 (11. Oktober 2016)
- ↑ wort.lu: Les donneurs se font de plus en plus rares au Luxembourg (4. Abrëll 2016)
- ↑ wortl.lu: Organspende: „Das Gesetz wird nicht eingehalten“ (11. Oktober 2016)
- ↑ gouvernement.lu: Welttag der Organspende (17. Oktober 2023)
- ↑ Eurotransplant Annual Report Highlights 2022
- ↑ eurotransplant.org: Eurotransplant International Foundation Annual Report 2008, Tab. 2.1. "Number of deceased organ donors used for a transplant, by donor country, from 2004 to 2008", Säit 26
- ↑ eurotransplant.org: Eurotransplant International Foundation Annual Report Annual Report 2012, Table 4.1 "Number of deceased donors used for a transplant, by donor country, from 2008 to 2012", Säit 41
- ↑ statistics.eurotransplant.org: Deceased donors used in Eurotransplant, by year, by donor country (gekuckt de 5. November 2023)
- ↑ Carte du donneur d'organes um Site vum Gesondheetsministère (gekuckt den 3. November 2016)
- ↑ lessentiel.lu: Luxemburg hat viel zu wenig Organspender (6. Juli 2015)